వేసవి కాలం రాగానే పగటిపూట ఎండల కంటే రాత్రి పూట ఉక్కపోతతో చాలామంది సగటు మనుషులు తీవ్రంగా ఇబ్బంది పడుతుంటారు. రాత్రిళ్లు సరిగ్గా నిద్రపట్టక, ఒళ్లంతా చెమటలు పట్టి విసిగిపోతుంటారు.

అయితే, ఈ ఉక్కపోత నుంచి ఉపశమనం పొందడానికి మనం రాత్రి వేళల్లో చేసే కొన్ని చిన్న చిన్న తప్పులు మన ఆరోగ్యాన్ని దెబ్బతీస్తాయి. మరి వేసవి రాత్రుల్లో ఎలాంటి జాగ్రత్తలు తీసుకోవాలో ఇప్పుడు చూద్దాం.

ఏసీ (AC) టెంపరేచర్ చాలా ముఖ్యం: ఉక్కపోత తట్టుకోలేక చాలామంది రాత్రి పూట ఏసీని 16 లేదా 18 డిగ్రీల వద్ద ఉంచి పడుకుంటారు. రూమ్ త్వరగా చల్లబడుతుందని ఇలా చేస్తుంటారు. కానీ, ఇలా చేయడం వల్ల తెల్లవారుజామున ఒళ్లు నొప్పులు, జలుబు, మరియు గొంతు నొప్పి వంటి సమస్యలు వస్తాయి. ఇక వేసవిలో ఏసీ టెంపరేచర్‌ను ఎప్పుడూ 24 లేదా 25 డిగ్రీల వద్ద ఉంచడమే ఆరోగ్యానికి మంచిదని నిపుణులు చెబుతున్నారు.

లేట్ నైట్ హెవీ డిన్నర్ వద్దు: ఎండకాలంలో రాత్రి పూట ఆలస్యంగా భోజనం చేయడం, అది కూడా చికెన్, మటన్ లేదా ఎక్కువ మసాలాలు ఉన్న ఫుడ్ తినడం అస్సలు మంచిది కాదు. ఇలాంటి హెవీ ఫుడ్స్ వల్ల శరీరంలో అంతర్గత వేడి (బాడీ హీట్) మరింత పెరుగుతుంది. ఇక దీనివల్ల జీర్ణక్రియ మందగించి కడుపులో మంట, అజీర్ణం వంటి సమస్యలు వస్తాయి మరియు రాత్రి అస్సలు నిద్రపట్టదు. రాత్రి పూట తేలికపాటి ఆహారం తీసుకోవడమే బెస్ట్.

పడుకునే ముందు చల్లటి నీళ్ల స్నానం: రాత్రి పడుకునే ముందు చాలామంది బాగా చల్లగా ఉండే ఐస్ వాటర్‌తో స్నానం చేయడానికి ఇష్టపడతారు. కానీ, అతి చల్లటి నీటి వల్ల మన రక్తనాళాలు కుంచించుకుపోయి, శరీరం మరింత వేడెక్కుతుంది.ఇక అందుకే రాత్రి పూట సాధారణ ఉష్ణోగ్రత ఉన్న నీటితో (గోరువెచ్చని లేదా నార్మల్ వాటర్) స్నానం చేస్తే.. శరీరం రిలాక్స్ అయ్యి హాయిగా నిద్ర పడుతుంది.

కాటన్ దుస్తులకే ప్రాధాన్యత ఇవ్వండి: రాత్రి పడుకునేటప్పుడు సిల్క్ లేదా నైలాన్ లాంటి సింథటిక్ బట్టలు వేసుకుంటే చర్మంపై గాలి ఆడక చెమట కాయలు, దురదలు వస్తాయి. కాబట్టి వేసవి నైట్స్‌లో ఎప్పుడూ లూజ్‌గా ఉండే కాటన్ (నూలు) దుస్తులనే ధరించాలి. ఇక ఇవి చెమటను త్వరగా పీల్చుకుని శరీరానికి చల్లదనాన్ని ఇస్తాయి. అలాగే పడుకునే ముందు ఎక్కువ నీళ్లు తాగడం కూడా మర్చిపోవద్దు.