రిజిస్ట్రేషన్కు ప్రత్యేక పోర్టల్.. వాహన తుక్కు విధానంపై మార్గదర్శకాలు
న్యూఢిల్లీ: జాతీయ వాహన తుక్కు విధానంలో భాగంగా ఫిట్నెస్ టెస్టింగ్ స్టేషన్లు(ఏటీఎస్), వాహన తుక్కు కేంద్రాల(ఎస్వీఆర్ఎఫ్) ఏర్పాటుపై కేంద్రం మార్గదర్శకాలను జారీచేసింది.
ఫిట్నెస్ కేంద్రాలపై మార్గదర్శకాలు:
- ఏటీఎస్లో నిర్వహించిన ఫిట్నెస్ టెస్టులో వాహనం పాస్ అయితే ఫిట్నెస్ సర్టిఫికెట్ జారీచేస్తారు. ఫెయిల్ అయితే మళ్లీ టెస్టు నిర్వహించాలని వాహన యజమాని కోరవచ్చు. కానీ, దీనికి నిర్దిష్ట రుసుము చెల్లించాలి.
- రీ-టెస్టులోనూ ఫెయిల్ అయితే వాహన కాలపరిమితి ముగిసినట్టే. వాహన యజమానికి అభ్యంతరాలు ఉంటే అప్పిలేట్ అథారిటీకి దరఖాస్తు చేసుకోవచ్చు. అయితే, అథారిటీ మళ్లీ టెస్టు నిర్వహించవచ్చు/నిర్వహించకపోవచ్చు. ఫిట్నెస్ సర్టిఫికెట్ విషయంలో అప్పిలేట్ అథారిటీదే తుది నిర్ణయం.
- టెస్టింగ్ నిర్వహించడానికి అన్ని సదుపాయాలు ఉంటేనే దరఖాస్తు చేసుకోవాలి.
- మొదటి దశలో 75 ఏటీఎస్లను ఏర్పాటు చేస్తారు. తర్వాత వీటి సంఖ్యను 450-500కు పెంచుతారు.
తుక్కు కేంద్రాలపై మార్గదర్శకాలు
- వాహన తుక్కు కేంద్రం(ఎస్వీఆర్ఎఫ్) రిజిస్ట్రేషన్ గడువు పదేండ్లు. తర్వాత రెన్యువల్ చేసుకోవాలి.
- ఈ కేంద్రాల్లో వాహనాలను యజమానులు అప్పజెప్పినప్పుడు సర్టిఫికెట్ ఇస్తారు. ఇది కొత్త వాహనాల కొనుగోలులో ప్రభుత్వం ప్రకటించిన వెసులుబాట్లు పొందడానికి అవసరం.
- దొంగతనం చేసిన వాహనాల వివరాలకు ఈ కేంద్రాల్లో ఎన్సీఆర్బీ డాటా అందుబాటులో ఉంటుంది.
- వాహనాల తుక్కుకు సంబంధించిన అనుమతులు, సర్టిఫికేషన్ అంతా డిజిటల్ రూపంలోనే జరుగుతుంది. కాబట్టి ఒక రాష్ట్రం వాహనాలను మరో రాష్ట్రంలోని ఎస్వీఆర్ఎఫ్లలో కూడా తుక్కు చేయవచ్చు.