తాజావార్తలు
మరో హాస్పిటల్‌కు టైగర్‌ వుడ్స్‌ తరలింపు

లాస్‌ఏంజిల్స్‌ : గోల్ఫ్‌ సూపర్‌స్టార్‌ టైగర్‌ వుడ్స్‌ను లాస్‌ ఏంజిల్స్‌ వైద్య సదుపాయానికి తరలించినట్లు హార్బర్‌ - యూసీఎల్‌ఏ మెడికల్‌ సెంటర్‌ గురువారం ఒక ప్రకటనలో తెలిపింది. గత మంగళవారం జరిగిన రోడ్డు ప్రమాదంలో ఆయన కారు ప్రమాదానికి గురైంది. లాస్‌ఏంజిల్స్‌లోని రోలింగ్‌ హిల్స్‌ ఎస్టేట్‌ సమీప సబర్బన్‌ రహదారిపై ఒంటరిగా డ్రైవ్‌ చేసుకుంటూ వెళ్తున్న సమయంలో ఎస్‌యూవీ కారు డివైడర్‌ను ఢీకొని పల్టీలు కొడుతూ ఏకంగా రెండు లైన్ల రహదారిని దాటి పక్కనే పడిపోయింది. దీంతో సమాచారం అందుకున్న ఫైర్‌ ఫైటర్స్‌ కారు అద్దాలు పగులగొట్టి ఆయనను బయటకి తీసుకువచ్చి, హాస్పిటల్‌కు తరలించారు. ప్రమాదం జరిగిన సమయంలో కారులోని ఎయిర్‌ బ్యాగ్స్‌ తెరుచుకోవడంతో ప్రాణాపాయం నుంచి తప్పించుకున్నారు. రెండు కాళ్లు మాత్రం తీవ్రంగా గాయాలయ్యాయి. కుడికాలికి చాలా తీవ్రమైన గాయంకావడంతో వైద్యులు శస్త్ర చికిత్స చేశారు. ప్రస్తుతం టైగర్‌ వుడ్స్‌ ఆర్థోపెడిక్‌ కేర్‌, రికవరీ కొనసాగించేందుకు సెడార్స్‌-సినాయ్‌ మెడికల్‌ సెంటర్‌కు తరలించినట్లు వుడ్స్‌ మొదట చికిత్స తీసుకున్న హాస్పిటల్‌ వైద్యుడు అనీష్‌ మహాజన్‌ పేర్కొన్నారు. కుడి కాలు చీలమండకు ఆపరేషన్‌ చేసి, పిన్స్‌ వేసినట్లు చెప్పారు. ప్రస్తుతం అతను స్పృహలోనే ఉన్నాడని, కోలుకుంటున్నాడని తెలిపారు.