Skin Treatment | చర్మ సంరక్షణలో ఇప్పుడు నాన్ ఇన్వేసివ్ ట్రీట్మెంట్లకు డిమాండ్ వేగంగా పెరుగుతోంది. ముఖ్యంగా శస్త్రచికిత్సలు లేకుండా సహజమైన అందాన్ని మెరుగుపరచే విధానాలపై యువత ఆసక్తి చూపుతోంది.
ఈ క్రమంలో మైక్రోకరెంట్ ఫేషియల్స్ అనే స్కిన్ ట్రీట్మెంట్ ఇప్పుడు బ్యూటీ ప్రపంచంలో ట్రెండ్గా మారింది. దీనిని చాలామంది ముఖానికి వర్కౌట్ గా అభివర్ణిస్తున్నారు. సాధారణ ఫేషియల్స్ చర్మాన్ని శుభ్రపరచడం, మృదువుగా మార్చడం, పోషణ అందించడం వరకు మాత్రమే పరిమితమైతే, మైక్రోకరెంట్ ఫేషియల్స్ మాత్రం చర్మం కింద ఉన్న ముఖ కండరాలపై కూడా పనిచేస్తాయని నిపుణులు చెబుతున్నారు. ఈ ఫేషియల్స్ ముఖ్యంగా 20ల చివరి నుంచి 40 ఏళ్ల మధ్య వయసున్నవారిలో ఎక్కువ ఆదరణ పొందుతున్నాయి. ముఖంలో ఉబ్బరం, చర్మం వదులుగా కనిపించడం, అలసట లక్షణాలు వంటి సమస్యలను శస్త్రచికిత్సల అవసరం లేకుండా తగ్గించుకోవాలనుకునే వారు ఈ చికిత్స వైపు మొగ్గు చూపుతున్నారు. సహజమైన మార్పులు రావడం, ముఖం ఆకృతి పూర్తిగా మారకుండా ఫ్రెష్ లుక్ ఇవ్వడం దీని ప్రత్యేకతగా చెబుతున్నారు.
కండరాలకు ఉద్దీపన ఉండాలి..
నిపుణులు చెబుతున్న ప్రకారం మన ముఖంలో మొత్తం 43 కండరాలు ఉంటాయి. ఇవే ముఖ కవళికలు, ఆకృతి, దృఢత్వానికి కారణం అవుతాయి. శరీరంలోని ఇతర కండరాల మాదిరిగానే ముఖ కండరాలు కూడా సరైన ఉద్దీపన లేకపోతే క్రమంగా బలహీనపడతాయి. మైక్రోకరెంట్ ట్రీట్మెంట్ ఈ కండరాలకు స్వల్ప ఎలక్ట్రిక్ ఉద్దీపన అందించి వాటిని యాక్టివ్గా ఉంచడంలో సహాయపడుతుంది. ఈ చికిత్స వల్ల ముఖ కండరాలు మరింత టోన్గా కనిపించి చర్మం గట్టిగా, లిఫ్ట్ అయినట్టుగా కనిపిస్తుందని నిపుణులు చెబుతున్నారు. అలాగే ఇది చర్మ కణాల్లో ATP అనే శక్తి ఉత్పత్తిని పెంచుతుందని పేర్కొంటున్నారు. ATP పెరగడం వల్ల కొల్లాజెన్, ఎలాస్టిన్ ఉత్పత్తికి మద్దతు లభించి చర్మం దృఢత్వం, లవలేశం మెరుగుపడతాయి. మైక్రోకరెంట్ ఫేషియల్స్ రక్త ప్రసరణను కూడా మెరుగుపరుస్తాయని నిపుణులు చెబుతున్నారు. దీంతో చర్మానికి ఆక్సిజన్, పోషకాలు మెరుగ్గా చేరి ముఖం కాంతివంతంగా కనిపిస్తుంది. చికిత్స అనంతరం చాలా మందికి ముఖం తాజాగా, గ్లోతో కనిపించడం ఇందుకే అని వివరిస్తున్నారు.
తరచూ చేయిస్తేనే లాభం..
ముఖ ఆకృతిని సహజంగా మెరుగుపరచడంలో కూడా ఈ ట్రీట్మెంట్ ఉపయోగపడుతుందని చెబుతున్నారు. ముఖ్యంగా చెంపలు లిఫ్ట్ అయినట్టు, జాలైన్ స్పష్టంగా కనిపించేలా చేయడంలో మైక్రోకరెంట్ సహాయపడుతుందని నిపుణులు పేర్కొంటున్నారు. అందుకే దీనిని ముఖానికి జిమ్ సెషన్తో పోలుస్తున్నారు. ఒక్కసారి ఈ ట్రీట్మెంట్ చేయించుకోవడం వల్ల కొంత తక్షణ ఫలితం కనిపించినా, దీర్ఘకాలిక ప్రయోజనాలు క్రమం తప్పకుండా చేయించుకుంటేనే కనిపిస్తాయని నిపుణులు చెబుతున్నారు. శరీరానికి వ్యాయామం ఎలా నిరంతరం అవసరమో, ముఖ కండరాల టోన్ను నిలబెట్టుకోవడానికి కూడా క్రమబద్ధమైన సంరక్షణ అవసరమని వివరిస్తున్నారు. చర్మ సమస్యలు వచ్చిన తర్వాత చికిత్స చేయించుకోవడం కంటే ముందుగానే చర్మ ఆరోగ్యాన్ని కాపాడుకోవాలనుకునే వారు ఈ విధానాన్ని ఎక్కువగా ఎంచుకుంటున్నారని నిపుణులు చెబుతున్నారు. ముఖ్యంగా వయస్సు ప్రభావం మొదలయ్యే దశలో చర్మాన్ని సహజంగా ఆరోగ్యంగా ఉంచేందుకు ఈ ట్రీట్మెంట్ ఉపయోగపడుతుందని సూచిస్తున్నారు.