నవతెలంగాణ-హైదరాబాద్: ఉన్నావ్ అత్యాచార కేసులో మాజీ బీజేపీ ఎమ్మెల్యే కుల్దీప్ సెంగార్ కు బెయిల్ మంజూరు చేస్తూ, శిక్షను నిలిపివేస్తూ ఢిల్లీ హైకోర్టు ఇచ్చిన ఉత్తర్వును సుప్రీంకోర్టు శుక్రవారం నిలిపివేసింది.

ఢిల్లీ హైకోర్టు ఉత్తర్వులను రద్దు చేస్తూ సుప్రీంకోర్టు ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్ మాల్య బాగ్చిలతో కూడిన ధర్మాసనం తీర్పునిచ్చింది. వీలైతే ఈ అంశాన్ని జూన్ లో కోర్టుల వేసవి సెలవులు ప్రారంభమయ్యే లోపు, తిరిగి నిర్ణయించాలని హైకోర్టును ఆదేశించింది. సెంగార్ కు విధించిన శిక్షపై ఆయన చేసిన అప్పీలుపై హైకోర్టు వీలైనంత త్వరగా లేదా రెండు నెలల్లోగా విచారించి తుది నిర్ణయం తీసుకోవాలని, ఒకవేళ సాధ్యం కాకపోతే శిక్షను నిలిపివేయాలన్న అభ్యర్థనను పరిగణనలోకి తీసుకోవాలని ధర్మాసనం తొలుత ఆదేశించింది. అనంతరం శిక్ష నిలుపుదల అంశంపై, బాధితురాలి తరపు న్యాయవాది సహా అన్ని పక్షాల వాదనలను హైకోర్టు తప్పనిసరిగా వినాలని ఆదేశించింది. సెంగార్ పై ఉన్న కేసు యోగ్యత గురించి ఎటువంటి వ్యాఖ్యలు చేయకుండా, శిక్ష నిలుపుదల పిటిషన్ పై హైకోర్టు తన మునుపటి ఉత్తర్వుల ప్రభావానికి లోనుకాకుండా నిర్ణయం తీసుకోవాలని ధర్మాసనం ఆదేశించింది.