బసవతారకం ఇండో అమెరికన్ క్యాన్సర్ ఆసుపత్రికి బాలీవుడ్ దిగ్గజ నటుడు సంజయ్ దత్ రావడం ఎంతో సంతోషంగా ఉందని ఆసుపత్రి చైర్మన్, నటుడు, ఎమ్మెల్యే నందమూరి బాలకృష్ణ తెలిపారు.
తమ ఆసుపత్రి రజతోత్సవాలు జరుపుకుంటున్న ఈ ప్రత్యేక సంవత్సరంలో సంజయ్ దత్ పర్యటన ఒక మధుర జ్ఞాపకంగా నిలిచిపోతుందని ఆయన అన్నారు. ఈ మేరకు బాలకృష్ణ ఒక ప్రకటన విడుదల చేశారు.
నిన్న ఆసుపత్రి సందర్శనకు విచ్చేసిన సంజయ్ దత్కు బాలకృష్ణ సాదర స్వాగతం పలికారు. ఈ సందర్భంగా సంజయ్ దత్ ఆసుపత్రిలోని రోగులతో ఆత్మీయంగా ముచ్చటించారు.
వారిలో ధైర్యం నింపే ప్రయత్నం చేయడంతో పాటు, ఆసుపత్రి సిబ్బందితో కూడా మాట్లాడారు. ఆయన రాక తమ సిబ్బందికి, రోగులకు ఎంతో ప్రోత్సాహాన్ని ఇచ్చిందని బాలకృష్ణ పేర్కొన్నారు.
“సంజయ్ దత్ పర్యటన, ఆయన అందించిన ప్రోత్సాహం మాకు మరింత బలాన్ని ఇచ్చాయి.
రోగులకు కారుణ్యంతో కూడిన శ్రేష్ఠమైన వైద్య సేవలు అందించాలన్న మా ఆశయాన్ని ఇది మరింత పటిష్ఠం చేస్తుంది. ఆశ, స్వస్థత, శ్రేష్ఠతతో కూడిన మా ప్రయాణాన్ని కొనసాగిస్తాం” అని బాలకృష్ణ తన ప్రకటనలో వివరించారు.