కరోనా సంక్షోభ సమయంలో తెలంగాణ ప్రజలకు సుపరిచితుడైన ప్రజారోగ్య శాఖ మాజీ డైరెక్టర్ డాక్టర్ గడల శ్రీనివాసరావు జనసేన తీర్థం పుచ్చుకున్నారు.
ఈ పరిణామం ఇప్పుడు తెలుగు రాజకీయ వర్గాల్లో ఆసక్తికర చర్చకు దారితీసింది.
రాబోయే ఎన్నికల్లో తెలంగాణలో జనసేన పోటీ చేస్తుందని పార్టీ అధినేత పవన్ కళ్యాణ్ ప్రకటించిన కొద్ది రోజులకే ఈ చేరిక జరగడం గమనార్హం.
జూబ్లీహిల్స్లోని పవన్ కళ్యాణ్ నివాసంలో డాక్టర్ గడల శ్రీనివాసరావుకు ఆయన పార్టీ కండువా కప్పి సాదరంగా ఆహ్వానించారు.
తమ కుటుంబాల మధ్య దశాబ్దాల అనుబంధం ఉందని గుర్తు చేసుకున్న పవన్.. ప్రజాసేవ పట్ల గడలకున్న నిబద్ధత జనసేనకు తెలంగాణలో మరింత విశ్వసనీయతను, బలాన్ని ఇస్తుందని ఆశాభావం వ్యక్తం చేశారు.
నేటి యువత ఆకాంక్షలకు తగ్గట్టుగా నడిపించగల సమర్థవంతమైన నాయకత్వ లక్షణాలు పవన్ కళ్యాణ్లో ఉన్నాయని, అందుకే తాను జనసేనను ఎంచుకున్నానని గడల శ్రీనివాసరావు తెలిపారు.
తెలంగాణలో పార్టీని గ్రామస్థాయికి బలంగా తీసుకెళ్లేందుకు శ్రమిస్తానని ఆయన వెల్లడించారు.
తెలంగాణలోని వైద్య, ఉద్యోగ, మధ్యతరగతి వర్గాల్లో మంచి గుర్తింపు ఉన్న వ్యక్తిని పార్టీలోకి తీసుకురావడం ద్వారా జనసేన తన సామాజిక పునాదిని విస్తరించుకోనుంది.