గోదావరి నుంచి సుమారు 750 టీఎంసీలు, కృష్ణా నది నుంచి 250 టీఎంసీల వరద నీరు దిగువకు వృథాగా పోతున్నా, కాంగ్రెస్ ప్రభుత్వం కాళేశ్వరం (కన్నెపల్లి), దేవాదుల, పాలమూరు-రంగారెడ్డి వంటి ప్రధాన ఎత్తిపోతల పథకాల పంపులను ఆన్ చేయలేదని ఆరోపించారు.

ఈ ఏడాది ఎల్‌నినో ప్రభావం వల్ల కరువు ముప్పు పొంచి ఉందని వాతావరణ నిపుణులు పది నెలల క్రితమే హెచ్చరించినా, ప్రభుత్వం ఎలాంటి నివారణ చర్యలు తీసుకోకుండా పెడచెవిన పెట్టిందని మండిపడ్డారు.

అందుబాటులో నీరున్నా సాగుకు ఇవ్వకపోవడంతో పంటలు ఎండిపోతున్నాయని, రైతులు సొంత ఖర్చులతో వాటర్ ట్యాంకర్లు కొనుగోలు చేసి పంటలను కాపాడుకోవాల్సిన దుస్థితి వచ్చిందని సోషల్ మీడియా వేదికగా ఆవేదన వ్యక్తం చేశారు.

గత కేసీఆర్ ప్రభుత్వ హయాంలో ముందస్తు ప్రణాళికలతో రైతులకు సాగునీరు, సకాలంలో ఎరువులు అందేవని, కానీ ప్రస్తుత కాంగ్రెస్ నిర్లక్ష్య వైఖరి వల్ల రైతాంగం తీవ్రంగా నష్టపోతోందని కేటీఆర్ విమర్శించారు.