ఆంధ్రప్రదేశ్ శాసనసభ సమావేశాలను ఈ నెల 17వ తేదీ నుంచి నిర్వహించాలని రాష్ట్ర ప్రభుత్వం ప్రాథమికంగా నిర్ణయించింది. సాధారణ రోజుల్లో చట్టసభల పనిదినాలను దృష్టిలో ఉంచుకుని ఈ సమావేశాలను ప్రాథమికంగా 4 రోజుల పాటు నిర్వహించాలని భావిస్తున్నప్పటికీ, విపక్షాల ప్రతిపాదనలు మరియు శాసనసభ వ్యవహారాల సలహా కమిటీ (BAC) భేటీలో చర్చించిన అనంతరం అవసరమైతే మరో 3 రోజులు పొడిగించే అవకాశముంది.
మరోవైపు సచివాలయంలో ముఖ్యమంత్రి నారా చంద్రబాబు నాయుడు అధ్యక్షతన రాష్ట్ర మంత్రివర్గ సమావేశం జరగనుంది. ఈ భేటీలో రాజధాని అమరావతి అభివృద్ధి పనులు, ఇన్నర్ రింగ్ రోడ్డు, రైల్వే ట్రాక్ నిర్మాణ ప్రాజెక్టులు, మరియు హ్యాపీ నెస్ట్ ప్రాజెక్ట్ వంటి అంశాలపై ఇటీవల రాజధాని ప్రాంత అభివృద్ధి ప్రాధికార సంస్థ (CRDA) తీసుకున్న కీలక నిర్ణయాలకు మంత్రివర్గం ఆమోదముద్ర వేయనుంది. వీటితో పాటు రాబోయే అసెంబ్లీ సమావేశాల్లో ప్రవేశపెట్టాల్సిన బిల్లులు, సభ నిర్వహణ వ్యూహం మరియు పలు భూ కేటాయింపు ప్రతిపాదనలపై కేబినెట్ విస్తృతంగా చర్చించనుంది.