ప్రజాస్వామ్యంలో నిరసనకారులు అడిగే ప్రశ్నలకు సమాధానం చెప్పాల్సింది పోయి, భిన్నాభిప్రాయాలు వ్యక్తం చేసే వారిపై 'విదేశీ ఏజెంట్లు' అని ముద్ర వేస్తున్నారని కేంద్రంపై ధ్వజమెత్తారు.

సీజేపీ నిరసన వ్యూహాలతో తాను ఏకీభవించనప్పటికీ, ప్రజాస్వామ్యంలో నిరసన తెలిపే హక్కు ప్రతి ఒక్కరికీ ఉంటుందని అన్నామలై స్పష్టం చేశారు. ఈ మేరకు ఆయన సోషల్ మీడియా వేదికగా స్పందిస్తూ కేంద్ర ప్రభుత్వాన్ని ఉద్దేశించి 5 కీలక ప్రశ్నలను సంధించారు. సీజేపీ దరఖాస్తు చేసుకోగానే జంతర్ మంతర్‌ను నిరసన వేదిక జాబితా నుంచి ఎందుకు తొలగించారు? స్పెషల్ ఎగ్జిక్యూటివ్ మేజిస్ట్రేట్ల అధికారాల పరిధి ఏమిటి? అక్టోబర్ 13న అరెస్టయిన వారికి బెయిల్ నిరాకరించడం, ఎనిమిది మంది పూచీకత్తులను తిరస్కరించడం ఎంతవరకు న్యాయం? అలాగే నీట్ ఆందోళనల సమయంలో నిబంధనలకు విరుద్ధంగా పెల్లెట్ గన్లను ఎందుకు ప్రయోగించాల్సి వచ్చిందో సమాధానం చెప్పాలని డిమాండ్ చేశారు. హైకోర్టు జోక్యం చేసుకున్న తర్వాతే అరెస్టయిన నేతలను మేజిస్ట్రేట్ విడుదల చేశారని గుర్తుచేశారు.

అంతేకాకుండా, బీజేపీని ఎద్దేవా చేస్తూ అన్నామలై ఘాటు వ్యాఖ్యలు చేశారు. "బీజేపీ నిజంగానే సీజేపీని వ్యతిరేకిస్తోందా? లేక దానికి ఉచితంగా ప్రచారం కల్పిస్తోందా? సీజేపీని ఒక ప్రధాన రాజకీయ శక్తిగా నిలబెట్టి విపక్షాల ఓట్లను చీల్చాలని చూస్తోందా? డబ్బులిచ్చినా సీజేపీకి ఇంతకంటే మంచి పబ్లిసిటీ టీమ్ దొరకదు" అని విమర్శించారు. కొందరు బీజేపీ నేతలు తన వైఖరిని ప్రశ్నించడంపై స్పందిస్తూ.. తాను 2026 జూన్ 5నే బీజేపీని వీడానన్న విషయాన్ని గుర్తుపెట్టుకోవాలని హితవు పలికారు.