ముంబై: రుణ మాఫీ చేస్తామంటూ సామాన్య ప్రజలను తప్పుదోవ పట్టించే వ్యక్తులు, సంస్థల పట్ల రిజర్వ్ బ్యాంక్ ఆఫ్ ఇండియా (ఆర్‌బీఐ) తీవ్ర హెచ్చరికలు జారీ చేసింది.

ఇలాంటి అనధికారిక ప్రచారాలను నమ్మవద్దని, వాటితో సంబంధాలు పెట్టుకుంటే నేరుగా ఆర్థికంగా నష్టపోయే ప్రమాదం ఉందని స్పష్టం చేసింది.

కొన్ని సంస్థలు బ్యాంకు లేదా ఎన్‌బీఎఫ్‌సీ (NBFC) బకాయిలను రద్దు చేస్తామని వాగ్దానాలు చేస్తూ, నకిలీ 'రుణ మాఫీ సర్టిఫికెట్లు' ఇస్తున్నట్లు ఆర్‌బీఐ దృష్టికి వచ్చింది. ఇందుకు ప్రతిఫలంగా సర్వీస్ ఛార్జీలు లేదా లీగల్ ఫీజుల పేరుతో ప్రజల నుంచి డబ్బు వసూలు చేస్తున్నట్లు కేంద్ర బ్యాంక్ ఆందోళన వ్యక్తం చేసింది. ఇలాంటి తప్పుడు వాగ్దానాలు చేసేవారిపై కఠిన చట్టపరమైన చర్యలు తీసుకుంటామని హెచ్చరించింది. రుణాలకు సంబంధించిన ఏదైనా సమాచారం కోసం నేరుగా తమ రుణదాతలను (బ్యాంకులను) సంప్రదించాలని, ఇలాంటి మోసపూరిత ప్రకటనలను వెంటనే పోలీసులకు ఫిర్యాదు చేయాలని ప్రజలకు సూచించింది.

డిప్యూటీ గవర్నర్ల శాఖల పునర్వ్యవస్థీకరణ

మరోవైపు, కొత్త డిప్యూటీ గవర్నర్‌గా రోహిత్ జైన్ బాధ్యతలు స్వీకరించిన నేపథ్యంలో, ఆర్‌బీఐ తన నలుగురు డిప్యూటీ గవర్నర్ల శాఖలను మార్చింది. రోహిత్ జైన్ ఇకపై ఫిన్‌టెక్, ఇన్ఫర్మేషన్ టెక్నాలజీ, ఫారిన్ ఎక్స్ఛేంజ్, ఫైనాన్షియల్ మార్కెట్స్ రెగ్యులేషన్ మరియు రిస్క్ మానిటరింగ్ వంటి కీలక విభాగాలను పర్యవేక్షించనున్నారు.

డిప్యూటీ గవర్నర్ శిరీష్ చంద్ర ముర్ముకు కరెన్సీ మేనేజ్‌మెంట్ మరియు పేమెంట్స్ అండ్ సెటిల్‌మెంట్ సిస్టమ్స్ వంటి కీలక బాధ్యతలను అప్పగించారు. స్వామినాథన్ జె పర్యవేక్షణ (Supervisory) మరియు వినియోగదారుల రక్షణ విభాగాలను చూస్తుండగా, డాక్టర్ పూనమ్ గుప్తా మానిటరీ పాలసీ, ఆర్థిక స్థిరత్వం (Financial Stability) మరియు ఆర్థిక పరిశోధన విభాగాల్లో కొనసాగుతారు. ఈ మార్పుల ద్వారా బ్యాంకింగ్ కార్యకలాపాల్లో మరింత పారదర్శకత, సామర్థ్యాన్ని పెంచాలని ఆర్‌బీఐ లక్ష్యంగా పెట్టుకుంది