డీఎస్సీ పరీక్షల నిర్వహణలో పారదర్శకత లోపించిందని, దీనిపై సీబీఐ లేదా న్యాయ విచారణ జరిపించాలని డిమాండ్ చేస్తూ పెద్ద సంఖ్యలో నిరుద్యోగ యువత, ఉద్యోగార్థులు ఈ నిరసనలో పాల్గొన్నారు. నగరంలోని వీఆర్సీ సెంటర్ నుంచి కలెక్టరేట్ వరకు ఈ ప్రదర్శన కొనసాగింది. వైఎస్సార్సీపీ నాయకులు కాకాణి గోవర్ధన్ రెడ్డి, పర్వతరెడ్డి చంద్రశేఖర్ రెడ్డి, నెల్లూరు రూరల్ ఇన్‌చార్జ్ ఆనం విజయ్ కుమార్ రెడ్డి ఈ ర్యాలీకి నాయకత్వం వహించారు.

ర్యాలీ ప్రారంభానికి ముందు నాయకులు అంబేద్కర్ విగ్రహానికి నివాళులర్పించారు. ఈ సందర్భంగా వైసీపీ నేత చంద్రశేఖర్ రెడ్డి మాట్లాడుతూ.. మెగా డీఎస్సీ నియామక ప్రక్రియలో అక్రమాల వల్ల దాదాపు 3.5 లక్షల మంది అభ్యర్థులు నష్టపోయారని ఆరోపించారు. తక్షణమే ఈ వ్యవహారంపై సీబీఐ విచారణ జరిపించి అభ్యర్థులకు న్యాయం చేయాలని డిమాండ్ చేశారు. అనంతరం నిరుద్యోగుల సమస్యలను పరిష్కరించాలని, సమగ్ర దర్యాప్తు జరిపించాలని కోరుతూ వైఎస్సార్సీపీ నాయకులు, పార్టీ యువజన విభాగం ప్రతినిధులు జిల్లా రెవెన్యూ అధికారికి (డీఆర్వో) వినతిపత్రం అందజేశారు.