ప్రభుత్వ నిబంధనల ప్రకారం చట్టబద్ధమైన గరిష్ట వేతన పరిమితి రూ.15,000 కాగా, అందులో 12 శాతాన్ని లెక్కిస్తే ఈ రూ.1,800 వస్తుంది. ఈ నిబంధనలో ఎలాంటి కొత్త మార్పు లేదు, కానీ ఉన్న రూల్‌ను ఈపిఎఫ్ఓ మరోసారి స్పష్టం చేసింది. అయితే, ఉద్యోగులు లేదా యాజమాన్యాలు అంతకంటే ఎక్కువ మొత్తాన్ని పొదుపు చేయాలనుకుంటే వాలంటరీ ప్రావిడెంట్ ఫండ్ ద్వారా పొదుపు చేసుకోవచ్చు.

చేతికి వచ్చే జీతం పెరుగుతుందా?

ఇది పూర్తిగా ఉద్యోగి తీసుకునే నిర్ణయంపై ఆధారపడి ఉంటుంది. ఇప్పటివరకు తమ బేసిక్ శాలరీ ఆధారంగా ఎక్కువ మొత్తాన్ని ఈపిఎఫ్ ఖాతాకు జమ చేస్తున్న ఉద్యోగులు.. ఇకపై కేవలం తప్పనిసరి పరిమితి అయిన రూ.1,800 లకే తమ కాంట్రిబ్యూషన్‌ను పరిమితం చేసుకోవచ్చు. అలా చేస్తే, మిగిలిన డబ్బు ప్రతి నెలా చేతికి వచ్చే జీతంలో కలుస్తుంది. ఈ అదనపు డబ్బును ఉద్యోగులు తమ అత్యవసర అవసరాలకు, లోన్లు చెల్లించడానికి లేదా మ్యూచువల్ ఫండ్స్ వంటి ఇతర మార్గాల్లో పెట్టుబడి పెట్టడానికి ఉపయోగించుకోవచ్చు.

ముఖ్యమైన గమనిక: చేతికి వచ్చే డబ్బు పెరుగుతుంది కదా అని పీఎఫ్ కాంట్రిబ్యూషన్ తగ్గిస్తే, దీర్ఘకాలంలో మీ రిటైర్మెంట్ ఫండ్ (పదవీ విరమణ పొదుపు) గణనీయంగా తగ్గిపోతుంది. ఒకవేళ పీఎఫ్ తగ్గిస్తే, ఆ మిగిలిన మొత్తాన్ని వేరే ఇతర లాంగ్-టర్మ్ ఇన్వెస్ట్‌మెంట్‌లలో పెట్టడం మంచిది.

కంపెనీలకు కలిగే ప్రయోజనం ఏమిటి?

ఈ వివరణ వల్ల కంపెనీల పేరోల్ నిర్వహణ సులభతరం అవుతుంది. ముఖ్యంగా ఎక్కువ జీతాలు తీసుకునే ఉద్యోగుల విషయంలో కంపెనీలు ఎంతవరకు పీఎఫ్ వాటా చెల్లించాలనే దానిపై స్పష్టత వస్తుంది. దీనివల్ల కంపెనీల చట్టబద్ధమైన ఖర్చుల అంచనా మరింత ఖచ్చితంగా ఉంటుంది.

పీఎఫ్ కాంట్రిబ్యూషన్ తగ్గించుకోవచ్చా?

ఆర్థిక నిపుణుల అభిప్రాయం ప్రకారం, ప్రస్తుత అవసరాల కంటే భవిష్యత్తు అవసరాలు ముఖ్యం. మీకు ఇప్పటికే పీఎఫ్ కాకుండా ఇతర పబ్లిక్ ప్రావిడెంట్ ఫండ్ (PPF), మ్యూచువల్ ఫండ్స్ లేదా రియల్ ఎస్టేట్ వంటి బలమైన పెట్టుబడులు ఉంటే, పీఎఫ్ కాంట్రిబ్యూషన్‌ను రూ.1,800 కి పరిమితం చేసుకోవచ్చు. కానీ, కేవలం ఇపిఎఫ్ మాత్రమే మీ ఏకైక రిటైర్మెంట్ ప్లాన్ అయితే మాత్రం, పాత పద్ధతిలోనే ఎక్కువ మొత్తాన్ని పొదుపు చేయడం ఉత్తమం. ఈ కొత్త స్పష్టత ఉద్యోగులకు ఆర్థిక స్వేచ్ఛను ఇచ్చినప్పటికీ, భవిష్యత్తును ప్లాన్ చేసుకునే బాధ్యతను కూడా వారిపైనే పెట్టింది.