బరేలీ: ఉత్తరప్రదేశ్‌లోని బరేలీ పోలీసులు ఒక వింతైన దొంగల ముఠాను పట్టుకున్నారు. ఈ ముఠాలో సభ్యులు తమ సొంత భార్యలనే దోపిడీలకు వాడుకోవడం గమనార్హం. బ్యాంకు నుండి నగదు తీసుకుని వచ్చే అమాయక పెన్షనర్లు, ప్రభుత్వ ఉద్యోగులే లక్ష్యంగా వీరు దాడులు చేసేవారు.

వ్యూహం అదిరింది.. కానీ దొరికిపోయారు!

దొంగతనం చేసే ముందు ఈ కిలాడీ భర్తలు తమ భార్యలకు చక్కగా మేకప్ వేసి, ఖరీదైన బట్టలు తొడిగించి బ్యాంకు బయట వేర్వేరు ఆటో రిక్షాల్లో ప్రయాణికుల్లా కూర్చోబెట్టేవారు. బ్యాంకు నుండి డబ్బులు తీసుకుని బయటకు వచ్చి, ఇంటికి వెళ్లేందుకు వాహనం కోసం వేచి చూసే అమాయకులు.. ఆటోలో మహిళలు ఉండటాన్ని చూసి సురక్షితం అనుకుని అందులో ఎక్కేవారు.

ఆ తర్వాత నిర్మానుష్య ప్రాంతానికి వెళ్ళాక, ఆటో రిపేర్ వచ్చిందని సాకు చెప్పి ప్రయాణికులను దించి, వారి వద్ద ఉన్న నగదును దోచుకునేవారు. ప్రస్తుతం పోలీసులు ఐదుగురు సభ్యుల ముఠాను అరెస్ట్ చేశారు. ఇందులో ఇద్దరు భార్యాభర్తల జంటలు కూడా ఉన్నాయి. వీరి వద్ద నుండి సుమారు ఒక లక్ష రూపాయల నగదును స్వాధీనం చేసుకున్నారు.

ముఠా వివరాలు:

• ఆదిల్ - షబా: భార్యాభర్తలు.
• అస్గర్ - నూరి: భార్యాభర్తలు.
• ఉస్మాన్ అలీ: ఈ ముఠాకు సలహాదారు. ఇతని ప్లాన్ ప్రకారమే దోపిడీలు జరిగేవి.
• నూరి: ఈ ముఠాకు నాయకురాలు (గ్యాంగ్ లీడర్). తన స్నేహితురాలు షబాతో కలిసి ఈ ముఠాను నడిపించేది.

దోపిడీ సాగిందిలా..

బరేలీలో గత ఏడాది కాలంగా బ్యాంకు నుండి వచ్చే వారిపై దోపిడీలు పెరగడంతో పోలీసులు ఎస్‌ఓజీ (SOG) బృందాన్ని రంగంలోకి దింపారు. ఉస్మాన్ అలీ నెల మొదటి వారంలో బ్యాంకులకు వెళ్లి పెన్షన్ లేదా జీతం తీసుకునే వారిని గమనించి (రెక్కీ నిర్వహించి) ఇతర సభ్యులకు సమాచారం ఇచ్చేవాడు. ఆటోలో అప్పటికే అందంగా తయారై కూర్చున్న మహిళలు.. ప్రయాణికులు ఆటో ఎక్కేటప్పుడు వారికి సహాయం చేస్తున్నట్లు నటించేవారు. మహిళలు ఉన్నారు కదా అని నమ్మి ఆటో ఎక్కిన వారిని తర్వాత దోచుకునేవారు.