మాల్దా జిల్లా మోతాబరిలో ఏడుగురు న్యాయాధికారులను తొమ్మిది గంటల పాటు బందీలుగా ఉంచిన కేసులో ప్రధాన నిందితుడిని సీఐడీ (CID) అరెస్ట్ చేసిందని, ఆ సంస్థ ఇంకా తన ప్రభుత్వ పరిధిలోనే ఉందని ముఖ్యమంత్రి మమతా బెనర్జీ శుక్రవారం స్పష్టం చేశారు.
అసెంబ్లీ ఎన్నికల నేపథ్యంలో కేంద్ర ఎన్నికల సంఘం ఉన్నతాధికారులను బదిలీ చేయడంతో తనకు పరిపాలనా అధికారాలు లేవని, ఈ హింసకు అమిత్ షా, ఈసీలే కారణమని గురువారం విమర్శించిన మమత.. శుక్రవారం తన స్వరం మార్చారు. దక్షిణ దినాజ్పూర్ హరిరాంపూర్లో జరిగిన ర్యాలీలో ఆమె మాట్లాడుతూ.. బాగ్డోగ్రా విమానాశ్రయంలో అడ్వకేట్ మొఫక్కెరుల్ ఇస్లాంను సీఐడీ అరెస్ట్ చేయడం రాష్ట్ర పోలీసుల సామర్థ్యానికి నిదర్శనమని పేర్కొన్నారు.
మమతా బెనర్జీ వ్యాఖ్యలు: "మాల్దా నిందితుడిని ఎవరు పట్టుకున్నారో తెలుసా? మన సీఐడీ అధికారులే. నిందితులు ముంబై నుండి వచ్చి బాగ్డోగ్రా మీదుగా పారిపోతుండగా రెడ్ హ్యాండెడ్గా పట్టుకున్నారు. ఎన్ఐఏ (NIA) రంగంలోకి దిగకముందే మా సీఐడీ నిర్ణయాత్మక చర్యలు తీసుకుంది. గుర్తుంచుకోండి, సీఐడీ ఇంకా నా కంట్రోల్లోనే ఉంది" అని ఆమె స్పష్టం చేశారు.
ఈ హింస వెనుక బీజేపీ కుట్ర ఉందని, అసదుద్దీన్ ఒవైసీ నేతృత్వంలోని ఎంఐఎం (AIMIM)ను బీజేపీ 'బి-టీమ్'గా వాడుకుంటోందని మమత ఆరోపించారు. ఒవైసీని "బీజేపీ అద్దెకు తెచ్చుకున్న ఎన్నికల కోకిల" అని అభివర్ణించారు. అలాగే బెంగాల్ అధికారులను ఉద్దేశించి మాట్లాడుతూ.. "ఈసీ కొత్త అధికారులను నియమించవచ్చు, కానీ వారంతా బెంగాల్ వారే. వారు బీజేపీ మాట వినకుండా ప్రజల కోసం పని చేయాలి" అని సూచించారు.
కేంద్ర బలగాలపై ఆరోపణలు: కేంద్ర బలగాలను బీజేపీ అక్రమ నగదు రవాణాకు వాడుకుంటోందని మమత ఆరోపించారు. సీఆర్పీఎఫ్ వాహనాల్లో డబ్బును తరలిస్తున్నారని, సరైన సమయంలో దీనిని బయటపెడతానని చెప్పారు. అలాగే మహిళా ఓటర్లు పోలింగ్ బూత్లకు చీపుర్లతో వెళ్లాలని, ఎవరైనా అడ్డుకుంటే బుద్ధి చెప్పాలని పిలుపునిచ్చారు.
సువేందు అధికారి ఎదురుదాడి: ప్రతిపక్ష నేత సువేందు అధికారి నిందితుడు మొఫక్కెరుల్ ఇస్లాంకు సంబంధించిన పాత ఫోటోను షేర్ చేస్తూ మమతా బెనర్జీపై విమర్శలు గుప్పించారు. "మాల్దాలో మహిళా న్యాయమూర్తులతో సహా అధికారులపై జరిగిన దాడికి మమతా బెనర్జీయే సూత్రధారి. తృణమూల్ కాంగ్రెస్ ప్లాన్ ప్రకారమే ఈ దాడులు జరిగాయి. ఇప్పుడు నిందితుడిని వేరే పార్టీవాడిగా చిత్రీకరిస్తూ నాటకమాడుతున్నారు" అని ఆయన ఆరోపించారు.