ఈసారి ఆయన వార్తల్లోకి రావడానికి కారణం ఆయన వివాహం. సుదీర్ఘ విరామం తర్వాత సోమవారం (ఏప్రిల్ 06) అభయ్ సింగ్ హర్యానాలోని జజ్జర్‌లో తన భార్యతో కలిసి కనిపించారు.

ఫిబ్రవరి 15న మహాశివరాత్రి సందర్భంగా హిమాచల్ ప్రదేశ్‌లోని అఘంజర్ మహాదేవ్ ఆలయంలో తాము వివాహం చేసుకున్నట్లు ఆయన వెల్లడించారు. ఆ తర్వాత ఫిబ్రవరి 19న కోర్టు వివాహం కూడా చేసుకున్నట్లు తెలిపారు.

జీవిత భాగస్వామి గురించి..
తాము కొత్త జీవితంతో చాలా సంతోషంగా ఉన్నామని, ప్రస్తుతం సాదాసీదా జీవితాన్ని గడుపుతున్నామని అభయ్ సింగ్ పేర్కొన్నారు. "నా భార్య ప్రతీక, స్వతహాగా కర్ణాటకకు చెందినవారు. ఆమె కూడా వృత్తిరీత్యా ఇంజనీర్. పెళ్లి తర్వాత మేమిద్దరం ప్రస్తుతం హిమాచల్ ప్రదేశ్‌లోని ధర్మశాలలో నివసిస్తున్నాం" అని ఆయన వివరించారు.

కుటుంబంతో భేటీ
సోమవారం జజ్జర్‌లో తన తల్లిదండ్రులను కలిసేందుకు అభయ్ సింగ్ వచ్చారు. కాషాయ వస్త్రాలు ధరించి తన తండ్రి ఛాంబర్‌కు వెళ్లిన ఆయన పాత జ్ఞాపకాలను నెమరువేసుకున్నారు. ఆధ్యాత్మికత వైపు మొగ్గు చూపకముందు, తండ్రి వద్ద కూర్చుని లీగల్ అప్లికేషన్లు, కేస్ స్టడీలు చూసేవాడినని చెప్పారు. జీవిత పరమార్థం కోసం సాగించిన అన్వేషణే తనను సైన్స్, టెక్నాలజీ ప్రపంచం నుండి ఆధ్యాత్మికత వైపు నడిపించిందని ఆయన అన్నారు.

సనాతన ధర్మం కోసం కృషి
అభయ్ సింగ్ గురించి ఆయన భార్య ప్రతీక మాట్లాడుతూ.. "అభయ్ చాలా నిరాడంబరమైన, నిజాయితీ గల వ్యక్తి" అని కొనియాడారు. ఏడాది క్రితం వీరిద్దరికీ పరిచయం ఏర్పడింది. భవిష్యత్తులో ఇద్దరం కలిసి సనాతన ధర్మాన్ని, ఆధ్యాత్మికతను ముందుకు తీసుకెళ్తామని, ఒక 'సనాతన యూనివర్సిటీ'ని ఏర్పాటు చేయాలనే ఆలోచనలో ఉన్నామని ఆమె తెలిపారు.

ఎవరీ ఐఐటి బాబా అభయ్ సింగ్?
నేపథ్యం: హర్యానాలోని జజ్జర్‌ జిల్లా సాస్రోలి గ్రామానికి చెందినవారు. తండ్రి కర్ణ్ సింగ్ సీనియర్ లాయర్.

విద్య: ఐఐటి బాంబే (IIT Bombay) నుండి ఏరోస్పేస్ ఇంజనీరింగ్ పూర్తి చేశారు.

కెరీర్: కెనడాలోని ఒక ఏరోస్పేస్ కంపెనీలో నెలకు 3 లక్షల రూపాయల జీతంతో ఉద్యోగం చేశారు.

వైరల్: 2025 మహాకుంభమేళాలో సాధువు వేషధారణలో కనిపించడంతో అభయ్ సింగ్ కథ సోషల్ మీడియాలో విపరీతంగా వైరల్ అయ్యింది.