భారత్ నుండి అమెరికాకు పెద్ద ఎత్తున మందులు ఎగుమతి అవుతున్న నేపథ్యంలో ట్రంప్ తీసుకున్న ఈ నిర్ణయం ప్రాధాన్యత సంతరించుకుంది.

గత ఏడాది కాలంగా భారత్, కెనడా వంటి మిత్రదేశాలతో సహా ప్రపంచ దేశాలన్నింటిపై ట్రంప్ సుంకాల యుద్ధం ప్రకటించిన సంగతి తెలిసిందే. మధ్యలో కొంతకాలం విరామం ఇచ్చిన ఆయన, ఇప్పుడు మళ్లీ అదే బాట పట్టారు.

100% పన్ను నిబంధనలు: పేటెంట్ మందుల దిగుమతిపై పన్ను మినహాయింపు పొందాలంటే ట్రంప్ రెండు ప్రధాన షరతులు విధించారు:

1. ధరల తగ్గింపు: అమెరికాలో విక్రయించే పేటెంట్ మందుల ధరలను తగ్గించాలి. ఇందుకోసం 'మోస్ట్ ఫేవరెడ్ నేషన్' (Most Favoured Nation) ఒప్పందంపై సంతకం చేయాలి.
2. స్థానిక ఉత్పత్తి: అమెరికాలోనే మందుల తయారీ కేంద్రాలను (ప్లాంట్లను) ఏర్పాటు చేయాలి.

ఈ రెండు షరతులు పాటిస్తేనే పన్ను మినహాయింపు ఉంటుంది. ఒకవేళ ధరలు తగ్గించకుండా కేవలం ఉత్పత్తి కేంద్రాలను మాత్రమే ఏర్పాటు చేస్తే 20% పన్ను విధిస్తారు. నాలుగేళ్లలో ధరల విషయంలో ఒప్పందం కుదుర్చుకోకపోతే పన్నును 100 శాతానికి పెంచుతారు. మందుల దిగుమతి వల్ల జాతీయ భద్రతకు కలిగే ముప్పును నివారించేందుకు ఈ నిర్ణయం అవసరమని ట్రంప్ పేర్కొన్నారు.

సమయం ఇచ్చారు: ఈ పన్నులు తక్షణమే అమలులోకి రావు. కంపెనీలు ప్రభుత్వంతో చర్చలు జరిపి ఒప్పందాలు చేసుకోవడానికి తగిన సమయం ఇచ్చారు. పెద్ద కంపెనీలకు 120 రోజులు, ఇతర కంపెనీలకు 180 రోజుల గడువు ఇస్తున్నట్లు వైట్ హౌస్ అధికారులు తెలిపారు. ఇప్పటికే 17 కంపెనీలు చర్చలు జరుపుతుండగా, అందులో 13 కంపెనీలు ఒప్పందాలపై సంతకాలు చేశాయని సమాచారం.

వ్యతిరేకత: ట్రంప్ నిర్ణయాన్ని అమెరికాలోని ఫార్మా కంపెనీల సంఘం (PhRMA) తీవ్రంగా వ్యతిరేకిస్తోంది. అత్యాధునిక మందులపై పన్నులు వేయడం వల్ల చికిత్స ఖర్చులు పెరుగుతాయని, ఇది బిలియన్ డాలర్ల పెట్టుబడులను ప్రమాదంలో పడేస్తుందని వారు ఆందోళన వ్యక్తం చేస్తున్నారు.

భారత్‌పై ప్రభావం: ట్రంప్ ఉత్తర్వుల వల్ల భారతీయ కంపెనీలకు ప్రస్తుతానికి పెద్దగా నష్టం ఉండకపోవచ్చు. ఎందుకంటే భారత్ నుండి అమెరికాకు ఎగుమతి అయ్యే మందుల్లో అత్యధికం 'జెనరిక్' (Generic) మందులే. ట్రంప్ ఇప్పుడు పన్ను విధించింది కేవలం 'బ్రాండెడ్' మరియు 'పేటెంట్' మందులకు మాత్రమే. కాబట్టి భారత ఫార్మా రంగానికి ఇది పెద్ద ముప్పు కాదని విశ్లేషకులు భావిస్తున్నారు.