ఢిల్లీ వార్తలు: ఢిల్లీ అసెంబ్లీ భద్రతను ఛేదించి లోపలికి చొరబడిన ఘటన రాజధాని నుండి ఉత్తరప్రదేశ్ వరకు పెను సంచలనం సృష్టించింది. ఈ ఘటనకు ఉపయోగించిన కారు నంబర్ ఉత్తరప్రదేశ్ రాష్ట్రం పిలిభిత్ జిల్లాకు చెందినదిగా దర్యాప్తులో తేలింది.
డ్రైవర్ను సరబ్జీత్ సింగ్ అని గుర్తించారు.
ఈ విషయం బయటపడటంతో ఢిల్లీ పోలీసులతో పాటు భద్రతా సంస్థలు పిలిభిత్లో కూడా రంగంలోకి దిగాయి. సరబ్జీత్ కుటుంబ సభ్యులు తెలిపిన వివరాల ప్రకారం.. అతను ఇంటి నుండి బయలుదేరేటప్పుడు "నేను ప్రధానమంత్రి నరేంద్ర మోదీని కలవడానికి వెళ్తున్నాను" అని చెప్పినట్లు వెల్లడైంది.
మానసిక స్థితిపై కుటుంబ సభ్యుల వివరణ
సరబ్జీత్ సోదరుడు అవతార్ సింగ్ తెలిపిన వివరాల ప్రకారం.. గత కొంతకాలంగా సరబ్జీత్ మానసిక స్థితి సరిగ్గా లేదు. దీని కోసం షాజహాన్పూర్లోని ఒక ఆసుపత్రిలో చికిత్స పొందుతున్నాడు. ప్రతి సంవత్సరం ఫిబ్రవరి నుండి మే నెలల మధ్య అతని పరిస్థితి విషమిస్తుందని, ఆ సమయంలో అతను వింతగా ప్రవర్తిస్తాడని కుటుంబం తెలిపింది. ఆ సమయంలో అతను కోపంగా ఉండటం, అసభ్యంగా మాట్లాడటం వంటివి చేస్తాడని పేర్కొన్నారు. ఢిల్లీ అసెంబ్లీ వరకు అతను వెళ్లడం వెనుక కూడా ఈ మానసిక అనారోగ్యమే కారణమని కుటుంబ సభ్యులు భావిస్తున్నారు.
పీఎంను కలుస్తానని వెళ్లి..
కుటుంబ సభ్యుల కథనం ప్రకారం.. సరబ్జీత్ తన మేనల్లుడు జైదీప్ మరియు మరో బంధువు హర్మంత్దీప్ కోసం వెతుకుతూ ఇటీవల పంజాబ్లోని ఆనంద్పూర్ సాహిబ్కు కూడా వెళ్లాడు. మూడు రోజుల క్రితం జరిగిన చివరి సంభాషణలో తాను చండీగఢ్ వెళ్తున్నానని, అక్కడ ఎవరినో కలవాలని చెప్పాడు. కానీ, అంతకుముందు మాత్రం పీఎం మోదీని కలుస్తానని చెప్పి వెళ్లాడు.
పోలీసుల దర్యాప్తు..
ఈ ఘటన తర్వాత పిలిభిత్ పోలీసులు సరబ్జీత్ ఇంటికి చేరుకుని కుటుంబ సభ్యులను విచారించారు. విచారణకు పూర్తి సహకారం అందిస్తామని, అసలు నిజం బయటపడాలని కుటుంబ సభ్యులు కోరారు. ప్రస్తుతం సరబ్జీత్ ఢిల్లీ పోలీసుల అదుపులో ఉన్నట్లు సమాచారం. ఇంతటి కట్టుదిట్టమైన భద్రత ఉన్నప్పటికీ అతను అసెంబ్లీ ఆవరణలోకి ఎలా ప్రవేశించాడనే కోణంలో భద్రతా సంస్థలు దర్యాప్తు చేస్తున్నాయి.