బషీర్‌గంజ్ గ్రామం సమీపంలో, ఎక్స్‌ప్రెస్‌వే 423.6వ కిలోమీటర్ వద్ద ఈ భారీ గుంత పడినట్లు సమాచారం. దీంతో మీరట్-ప్రయాగ్‌రాజ్ మార్గంలో వాహనాల రాకపోకలను తాత్కాలికంగా నిలిపివేసి, రోడ్డు మరమ్మతు పనులను చేపట్టారు. కాగా, రహదారి రంగులోనే ఉన్న ఓ గుడ్డ లేదా కంబళి లాంటి పదార్థంతో ఆ గుంతను కప్పి ఉంచినట్లు చూపిస్తున్న వీడియో ఒకటి సోషల్ మీడియాలో విపరీతంగా వైరల్ అవుతోంది.

ఎడతెరిపి లేని వర్షాల వల్ల రహదారి ఒక్కసారిగా కుంగిపోయి పెద్ద గుంత ఏర్పడిందని స్థానికులు చెబుతున్నారు. ప్రమాదాలు జరగకుండా ఉండేందుకు అధికారులు ఆ మార్గంలో ట్రాఫిక్‌ను నియంత్రించారు. అయితే, ఆ గుంతను కనిపించకుండా దాచేందుకే రోడ్డు రంగు వస్త్రాన్ని ఉపయోగించారంటూ నెటిజన్లు ప్రశ్నల వర్షం కురిపిస్తున్నారు. కాగా, ఆ వస్త్రాన్ని అసలు ఏ కారణంతో అక్కడ పరిచారు అనే విషయంపై ఇంకా ఎలాంటి అధికారిక స్పష్టత రాలేదు.