ఇప్పటికే 'హనుమాన్' వంటి సినిమాలు తక్కువ పెట్టుబడితో భారీ వసూళ్లు సాధించి సంచలనం సృష్టించాయి. ఇప్పుడు మరో తక్కువ బడ్జెట్ మూవీ ఏకంగా రూ.2,000 కోట్ల మార్క్‌ను దాటి అందరిని ఆశ్చర్యపోయేలా చేస్తోంది. చైనాలో సంచలన విజయం సాధించిన ఈ సినిమా త్వరలో అమెరికాలో కూడా రిలీజ్ కాబోతోంది. ఇంతకీ ఆ సినిమా ఏది? అంత భారీ వసూళ్లు సాధించడానికి కారణమేంటి? అనే వివరాల్లోకి వెళ్తే..

ఇక్కడ మనం ఇప్పుడు చెప్పుకుంటున్న ఈ సినిమా చైనీస్ మూవీ పేరు 'డియర్ యూ'. హాంగ్‌చున్ లాన్ దర్శకత్వం వహించిన ఈ మూవీ 2026 ఏప్రిల్ 30న చైనా థియేటర్లలో విడుదలైంది. సుమారు 14 మిలియన్ డాలర్ల బడ్జెట్‌తో ఈ సినిమాను రూపొందించినట్లు సమాచారం. ఇండియన్ కరెన్సీలో ఇది దాదాపు రూ.132 కోట్లకు సమానం. అయితే పెట్టుబడితో పోలిస్తే ఈ సినిమా సాధించిన వసూళ్లు ఊహించని స్థాయిలో ఉన్నాయి. చైనా బాక్సాఫీస్ వద్ద ఇప్పటికే 300 మిలియన్ డాలర్లకు పైగా వసూలు చేసినట్లు నివేదికలు చెబుతున్నాయి. అంటే ఇండియన్ కరెన్సీలో ఈ మొత్తం సుమారు రూ.2,849 కోట్లుగా ఉంటుంది.

తక్కువ బడ్జెట్‌తో తెరకెక్కిన సినిమా ఇంత భారీ స్థాయిలో వసూళ్లు సాధించడం ఇప్పుడు సినీ వర్గాలు సైతం ఆశ్చర్యం వ్యక్తం చేస్తున్నారు. ముఖ్యంగా 2026లో ఊహించని బాక్సాఫీస్ విజయాల్లో 'డియర్ యూ' ఒకటిగా నిలవడంతో ఈ సినిమా గురించి తెలుసుకునేందుకు ఇంట్రెస్ట్ చూపిస్తున్నారు సినీ ప్రేక్షకులు. చైనాలో ప్రేక్షకుల నుంచి వచ్చిన స్పందనతో అక్కడి మార్కెట్‌ను దాటి ఈ మూవీ అంతర్జాతీయ స్థాయిలో కూడా హల్చల్ చేసేందుకు సిద్దమవుతోంది. ఈ క్రమంలోనే సెప్టెంబర్ 4న 'డియర్ యూ' ఉత్తర అమెరికాలో రిలీజ్ కాబోతోంది.

'డియర్ యూ' అనే టైటిల్‌కు చైనీస్ భాషలో అమ్మమ్మకు ప్రేమలేఖ అనే అర్థం వస్తుంది. పేరు వింటేనే ఇది కుటుంబం, అనుబంధం చుట్టూ తిరిగే కథ అని అర్థమవుతుంది. ‘డియర్ యూ’ (Dear You) అనేది వలసల నేపథ్యంతో కూడిన ఒక ఎమోషనల్ ఫ్యామిలీ డ్రామా. అప్పులు, ఫ్యామిలీ కష్టాల ఊబిలో కూరుకుపోయిన చైనాకు చెందిన ఒక వ్యక్తి, కోటీశ్వరుడిగా స్థిరపడ్డాడని భావిస్తున్న తన తాతను వెతికేందుకు థాయ్‌లాండ్ ప్రయాణమవడంతో ఈ కథ ప్రారంభమవుతుంది. అక్కడకు వెళ్ళిన అతనికి దశాబ్దాల క్రితం నాటి ఒక హృదయవిదారక రహస్యం తెలుస్తుంది. మరి ఆ రహస్యం ఏమిటి? ఫ్యామిలీ కష్టాల నుంచి అతను ఎలా బయట పడ్డాడు ? అనే ఇంట్రెస్టింగ్ టాపిక్ తో ఈ కథ సాగుతుంది.

రూ.132 కోట్ల బడ్జెట్‌తో తెరకెక్కి రూ.2,849 కోట్లకు పైగా వసూలు చేసిన 'డియర్ యూ' ఇప్పుడు కేవలం చైనా బాక్సాఫీస్ హిట్ గానే కాకుండా వరల్డ్ మార్కెట్ లో కూడా ప్రత్యేకతను సంతరించుకుంటోంది. మరిన్ని బాక్సాఫీస్ వసూళ్లు దిశగా పయనిస్తోంది. మనుషుల మధ్య ఉండే భావోద్వేగ బంధాలను కథగా మలచిన ఈ సినిమా అమెరికాలో కూడా మంచి స్పందన తెచ్చుకుంటుందని భావిస్తున్నారు.