సినిమా ఇండస్ట్రీలో మాస్ ఎలివేషన్స్, యాక్షన్ సీక్వెన్స్‌లకు ఉండే క్రేజే వేరు. ముఖ్యంగా ఆ యాక్షన్ వెనుక ఒక బలమైన ఎమోషన్, మునుపెన్నడూ చూడని కొత్తదనం ఉంటే ప్రేక్షకులు థియేటర్లలో పూనకాలతో ఊగిపోతారు.

ఇప్పుడు సరిగ్గా అలాంటి ఒక హై-వోల్టేజ్ యాక్షన్ విందును అందించడానికి సిద్ధమవుతోంది 'పెద్ది' చిత్రం. ఈ సినిమాలోని ఫైట్ మాస్టర్ నభకాంత్ ఇటీవల ఇచ్చిన ఒక ఇంటర్వ్యూలో సినిమాలోని యాక్షన్ బ్లాక్స్‌కు సంబంధించిన ఆసక్తికరమైన విషయాలను పంచుకున్నారు.

ఈ చిత్రానికి యాక్షన్ కొరియోగ్రాఫర్‌గా వ్యవహరించిన నభకాంత్.. టాలీవుడ్ లెజెండరీ ఫైట్ మాస్టర్స్ రామ్-లక్ష్మణ్‌లను తన గురువులుగా పేర్కొన్నారు. ఈ సినిమాలో కేవలం రొటీన్ ఫైట్లే కాకుండా, నేషనల్ లెవెల్ (జాతీయ స్థాయి) కుస్తీ పోటీల నేపథ్యంలో సాగే సరికొత్త యాక్షన్ డ్రామా ఉండబోతోంది. ఇందులోని రెజ్లింగ్ సీక్వెన్స్ అత్యంత సహజంగా, రియలిస్టిక్‌గా రావాలని చిత్ర యూనిట్ గట్టిగా ఫిక్స్ అయింది.

కుస్తీ సీన్ల కోసం బాలీవుడ్ స్టార్ హీరో విక్కీ కౌశల్ తండ్రి, ప్రముఖ యాక్షన్ డైరెక్టర్ శ్యామ్ కౌశల్‌ను రంగంలోకి దించారు. నేషనల్ లెవెల్ రెజ్లింగ్ మ్యాచ్‌లను తలపించేలా ఈ సీక్వెన్స్‌లను ఎక్కడా సినిమాటిక్‌గా అనిపించకుండా, చాలా నాచురల్‌గా డిజైన్ చేశారు. సినిమా మొత్తానికి హైలైట్‌గా నిలిచేలా ఒక భారీ మాస్ రెజ్లింగ్ ఎపిసోడ్‌ను ప్లాన్ చేసినట్లు నభకాంత్ వెల్లడించారు. ఇండియన్ స్క్రీన్ పై ఇప్పటివరకు ప్రేక్షకులు ఇలాంటి రస్టిక్ అండ్ మాస్ కుస్తీ ఫైట్‌ను చూసి ఉండరని ఆయన స్పష్టం చేశారు. అయితే, స్క్రీన్‌పై చూసేటప్పుడు ఈ సీక్వెన్స్ ఎంత అద్భుతంగా ఉంటుందో, దానిని షూట్ చేయడం అంతకంటే వంద రెట్లు సవాలుతో కూడుకున్నదని, ఒకానొక రెజ్లింగ్ ఎపిసోడ్‌ను తెరకెక్కించడానికి యాక్షన్ టీమ్ మొత్తం ప్రాణం పెట్టి పనిచేసిందని ఆయన పేర్కొన్నారు.