సమ్మర్ సీజన్‌లో ఫ్యామిలీ అంతా కలిసి హాయిగా నవ్వుకునే క్లీన్ ఎంటర్‌టైనర్ల కోసం ఆడియన్స్ ఎదురుచూస్తున్న తరుణంలో, నేడు (మే 22, శుక్రవారం) ప్రేక్షకుల ముందుకు వచ్చిన చిత్రం 'పురుషః'.

కొత్త కుర్రాడు పవన్‌ కళ్యాణ్‌ బత్తుల, సప్తగిరి, కసిరెడ్డి రాజ్‌కుమార్ ప్రధాన పాత్రలు పోషించిన ఈ సినిమాను వీరు వులవల దర్శకత్వంలో, కళ్యాణ్‌ ప్రొడక్షన్స్ బ్యానర్‌పై బత్తుల కోటేశ్వరరావు అత్యంత ప్రతిష్టాత్మకంగా నిర్మించారు. మరి ఈ భార్యాభర్తల ఫ్యామిలీ డ్రామా ప్రేక్షకులను ఏ మేరకు మెప్పించిందో రివ్యూలో చూద్దాం…

పురుషః కథ:
చిన్నప్పటి నుంచి ప్రాణ స్నేహితులైన గోవింద్‌ (పవన్‌ కళ్యాణ్‌), సత్తిబాబు (సప్తగిరి), శ్రీను (కసిరెడ్డి రాజ్‌ కుమార్‌), కిస్‌ (వెన్నెల కిశోర్‌) ప్రతి విషయాన్ని షేర్ చేసుకుంటూ ఉంటారు. కాలక్రమేణా వీరందరికీ పెళ్లిళ్లు అవుతాయి. గోవింద్‌.. కమల (రాయంచ కొక్కుర)ను ప్రేమించి పెళ్లి చేసుకోగా, సత్తిబాబుకు లక్ష్మి (హాసిని)తో, శ్రీనుకు గీత (విషిక)తో వివాహం జరుగుతుంది. అయితే, వీరి మ్యారేజ్ లైఫ్ అస్సలు సవ్యంగా సాగదు. నిత్యం గొడవలతో విసిగిపోయిన భార్యలే.. తమకు విడాకులు కావాలంటూ కోర్టు మెట్లు ఎక్కుతారు. విడాకుల కోసం ఈ ముగ్గురు భర్తలు కోర్టు చుట్టూ తిరుగుతుంటారు కానీ, భార్యలు మాత్రం రారు. దీంతో కేసు వాయిదాల మీద వాయిదా పడుతుంటుంది. వీరి బాధను అర్థం చేసుకున్న జడ్జ్ (వీటీవీ గణేష్‌) అసలు సమస్య ఏంటో తెలుసుకోవాలని డిసైడ్ అవుతాడు. ఇంతకీ గోవింద్‌, కమల ప్రేమ కథ ఎలా స్టార్ట్ అయ్యింది? వారు ఎందుకు విడిపోవాలనుకుంటున్నారు సత్తిబాబు, శ్రీనులపై వారి భార్యలకు ఎందుకు అంత అనుమానం వచ్చింది? వీరి కాపురం కూల్చడంలో స్నేహితుడు ‘కిస్’ పాత్ర ఏంటి? చివరికి ఈ భార్యాభర్తల కథ ఎలాంటి ముగింపునకు చేరింది? అనేదే మిగతా సినిమా.

విశ్లేషణ:
సాధారణంగా విడాకులు, భార్యాభర్తల గొడవల చుట్టూ తిరిగే ఫ్యామిలీ కథలు చాలా అరుదుగా వస్తుంటాయి. ఇలాంటి సినిమాల్లో కామెడీతో పాటు బలమైన డ్రామా పండితేనే సక్సెస్ అవుతాయి. దర్శకుడు వీరు వులవల కూడా ఈ ‘పురుషః’ సినిమాను అవుట్ అండ్ అవుట్ హిల్లేరియస్ కామెడీ ప్రధానంగా మలిచి, ఆద్యంతం నాటకీయంగా నడిపించడంలో సఫలమయ్యారు. సినిమా ప్రారంభమే ముగ్గురు భర్తలు విడాకుల కోసం కోర్టు చుట్టూ తిరిగే సీన్లతో ఇంట్రెస్టింగ్‌గా మొదలవుతుంది. వీరికి లాయర్‌గా అనంత శ్రీరామ్‌ కనిపిస్తారు. వాయిదాలతో విసిగిపోయి, ఇళ్లు వదిలేసి ముగ్గురు భర్తలు ఒకే రూమ్‌లో ఉంటూ తమ కష్టాలు చెప్పుకునే సీన్లు థియేటర్లలో నవ్వులు పూయిస్తాయి. జడ్జ్ ముందు ఒక్కొక్కరి ఫ్లాష్‌బ్యాక్ రివీల్ అయ్యే క్రమంలో.. గోవింద్‌ లవ్ ట్రాక్ ఇంట్రెస్టింగ్‌గా సాగుతుంది. అలాగే సప్తగిరి, కసిరెడ్డిలు ఇంట్లో భార్యల చేతిలో పడే తన్నులు, మధ్యలో వీరు సూపర్‌మేన్‌లుగా మారే సీన్లు హిలేరియస్‌గా ఉన్నాయి. కసిరెడ్డి తన మార్క్ జంపింగ్ పదాలు, డబుల్ మీనింగ్ కామెడీతో బాగా నవ్వించాడు. సినిమాలో అక్కడక్కడా కొన్ని సీన్లు సాగదీసినట్టుగా అనిపించినా, క్లైమాక్స్ మాత్రం గట్టిగా కట్టిపడేస్తుంది. హార్ట్‌కు సంబంధించిన ఒక ఊహించని ట్విస్ట్ సినిమాను నెక్స్ట్ లెవెల్‌కి తీసుకెళ్లింది. “ప్రేమే అన్నింటికీ పరిష్కారం” అంటూ దర్శకుడు ఇచ్చిన కన్‌క్లూజన్ బాగుంది.