ప్రస్తుతం జక్కన్న తెరకెక్కిస్తున్న గ్లోబల్ అడ్వెంచర్ మూవీ 'వారణాసి'పై భారీ అంచనాలు ఉన్నాయి. అయితే వారణాసి అనంతరం రాజమౌళి ఏ సినిమా చేస్తాడనే ఆసక్తి అందరిలో నెలకొంది. వారణాసి తర్వాత రాజమౌళి బిగ్ ప్లాన్ వేసినట్లు తెలుస్తోంది. బ్రెజిల్‌లో జరుగుతున్న 50వ సావో పాలో అంతర్జాతీయ చలనచిత్రోత్సవంలో పాల్గొన్న జక్కన్న.. హాలీవుడ్‌లో కనీసం ఒక్క సినిమా అయినా చేయాలనుందని చెప్పారు. దాంతో తన తదుపరి సినిమా హాలీవుడ్‌లోనే అని దర్శకధీరుడు ఓ హింట్ ఇచ్చారని నెటిజెన్స్ అంటున్నారు.

కనీసం ఒక్క హాలీవుడ్ చిత్రానికైనా దర్శకత్వం వహించాలని ఉందని ఎస్ఎస్ రాజమౌళి తన మనసులో మాటను తాజాగా వెల్లడించారు. ‘ఆర్‌ఆర్‌ఆర్‌ అనంతరం హాలీవుడ్‌ నుంచి నాకు చాలా ఛాన్సెస్ వచ్చాయి. కానీ అప్పటికే వారణాసి నిర్మాణ పనులు మొదలు పెట్టాను. ఒకే సమయంలో నేను 2-3 సినిమాలకు పనిచేయలేను. ఒక మూవీ పూర్తయిన తర్వాతే.. నా దృష్టి మరో సినిమాపై పెడతాను. అప్పుడే 100 శాతం ఇవ్వగలుగుతాను. ఇప్పటికీ కొన్ని ఆఫర్లు నా చేతిలో ఉన్నాయి. వారణాసి పూర్తయ్యాక వాటి గురించి ఆలోచిస్తాను. హాలీవుడ్‌లో పని చేయడం నాకు చాలా ఇష్టం. అక్కడి పనితీరు, నిర్మాణాత్మక శైలి అద్భుతంగా ఉంటాయి. హాలీవుడ్‌ పరిశ్రమ నుంచి నేర్చుకోవాల్సింది ఇంకా చాలా ఉంది. కనీసం ఒక్క హాలీవుడ్ చిత్రానికైనా దర్శకత్వం వహించాలని ఉంది’ అని జక్కన్న చెప్పారు.

ప్రస్తుతం జక్కన్న దృష్టి మొత్తం సూపర్ స్టార్ మహేశ్ బాబుతో తెరకెక్కిస్తున్న వారణాసి పైనే ఉంది. ఈ భారీ యాక్షన్ అడ్వెంచర్‌పై ప్రపంచ వ్యాప్తంగా ఇప్పటికే భారీ అంచనాలు నెలకొన్నాయి. షూటింగ్‌కు సంబంధించి తాజాగా రాజమౌళి ఆసక్తికర అప్‌డేట్ ఇచ్చారు. షూటింగ్ మరో 10 రోజుల్లో ముగుస్తుందని చెప్పారు. వారణాసి 2027 ఏప్రిల్ 7న థియేటర్లలో విడుదల కానుంది. ఇందులో ప్రియాంక చోప్రా, పృథ్వీరాజ్ సుకుమారన్ ప్రధాన పాత్రల్లో నటిస్తున్నారు. కేఎల్ నారాయణ, ఎస్‌ఎస్ కార్తికేయ సంయుక్తంగా ఈ చిత్రాన్ని నిర్మిస్తున్నారు.