పోలవరం జిల్లాలోని దేవీపట్నం మండలం వెలగపల్లి ప్రాంతంలో గిరిజనుల కష్టాలు మరోసారి వెలుగుచూశాయి. సీతపల్లి వాగుపై వంతెన లేకపోవడంతో గ్రామస్తులు ప్రాణాలను పణంగా పెట్టి తాడు సహాయంతో వాగు దాటుతున్నారు.
అత్యవసర పరిస్థితుల్లో చిన్నారులను కూడా ఇదే విధంగా తరలించాల్సిన దుస్థితి నెలకొంది.
దేవీపట్నం మండలం వెలగపల్లి సమీపంలోని సీతపల్లి వాగు ఉద్ధృతంగా ప్రవహిస్తుండటంతో లక్ష్మీపురం, గుంపెనపల్లి గ్రామాల గిరిజనులు తీవ్ర ఇబ్బందులు పడుతున్నారు. వాగుపై వంతెన లేకపోవడంతో తాడు సహాయంతోనే వాగును దాటాల్సిన పరిస్థితి ఏర్పడింది. అత్యవసర పరిస్థితుల్లో ప్రాణాలను అరచేత పట్టుకుని వాగు దాటుతున్న దృశ్యాలు ఆందోళన కలిగిస్తున్నాయి. లక్ష్మీపురం గ్రామానికి చెందిన ఓ బాలుడిని వైద్యం కోసం దామనపల్లి ఆసుపత్రికి తరలించేందుకు అతని తండ్రి వాగు మధ్యలో తాడు పట్టుకుని దాటించిన ఘటన స్థానికులను కలచివేసింది. వాగు ఉద్ధృతి ఎక్కువగా ఉన్నప్పటికీ మరో మార్గం లేక గిరిజనులు ప్రాణాలను పణంగా పెట్టి ప్రయాణం చేస్తున్నారు.
ఏళ్ల తరబడి సీతపల్లి వాగుపై వంతెన నిర్మించాలని అధికారులను, ప్రజాప్రతినిధులను కోరుతున్నప్పటికీ సమస్యకు శాశ్వత పరిష్కారం లభించలేదని గ్రామస్తులు ఆవేదన వ్యక్తం చేస్తున్నారు. ప్రతి వర్షాకాలంలో ఇదే పరిస్థితి ఎదురవుతోందని, అత్యవసర వైద్య సేవలు, విద్య, నిత్యావసరాల కోసం కూడా తీవ్ర ఇబ్బందులు పడాల్సి వస్తోందని చెబుతున్నారు. వెంటనే వంతెన నిర్మించి తమ కష్టాలకు ముగింపు పలకాలని గిరిజనులు ప్రభుత్వాన్ని కోరుతున్నారు.