Reheating Food health risks: ప్రస్తుత కాలంలో చాలా మంది బిజీ వాతావరణంలో గడుపుతున్నారు. దీంతో ఒకేసారి ఎక్కువగా ఆహారాన్ని వండుకొని ఫ్రిజ్‌లో పెట్టి మళ్లీ వేడి చేసుకుని తినడం అలవాటు చేసుకున్నారు.

అయితే కొన్ని రకాల ఆహారాలను పదేపదే వేడి చేయడం ఆరోగ్యానికి ప్రమాదకరమని వైద్యులు హెచ్చరిస్తున్నారు. ఇలా చేయడం వల్ల వాటిలోని పోషకాలు తగ్గిపోవడమే కాకుండా కొన్ని సందర్భాల్లో విషపూరిత రసాయనాలు ఏర్పడే అవకాశం ఉందని నిపుణులు చెబుతున్నారు. ఎలాంటి ఆహార పదార్థాలను మళ్లీ మళ్లీ వేడి చేయకూడదు? అలా చేస్తే ఏం జరుగుతుంది?

బంగాళదుంపలను వండి ఎక్కువసేపు గది ఉష్ణోగ్రతలో ఉంచి మళ్లీ వేడి చేస్తే బ్యాక్టీరియా పెరిగే అవకాశం ఉంటుంది. ముఖ్యంగా సరైన విధంగా నిల్వ చేయకపోతే వాటిలో హానికర సూక్ష్మక్రిములు అభివృద్ధి చెందుతాయి. దీంతో కడుపునొప్పి, వాంతులు, విరేచనాలు వంటి సమస్యలు రావచ్చు.

గుడ్లను రెండోసారి వేడి చేయడం కూడా ప్రమాదకరమేనని వైద్యులు చెబుతున్నారు. గుడ్లలో అధికంగా ప్రోటీన్ ఉండటంతో పదేపదే వేడి చేస్తే వాటి నిర్మాణం మారి జీర్ణ సమస్యలు కలిగించవచ్చు. ఎక్కువసేపు బయట ఉంచిన గుడ్లలో బ్యాక్టీరియా పెరిగి ఫుడ్ పాయిజనింగ్‌కు దారితీసే ప్రమాదం కూడా ఉంటుంది.

పాలకూర వంటి ఆకుకూరల్లో నైట్రేట్లు అధికంగా ఉంటాయి. వీటిని మళ్లీ వేడి చేసినప్పుడు నైట్రేట్లు నైట్రైట్లుగా మారే అవకాశం ఉంది. ఇవి శరీరంలో హానికర ప్రభావాలు చూపవచ్చని ఆరోగ్య నిపుణులు హెచ్చరిస్తున్నారు. చిన్నపిల్లలు, వృద్ధులు, గర్భిణీలు ప్రత్యేకంగా జాగ్రత్తలు తీసుకోవాలని సూచిస్తున్నారు.

పుట్టగొడుగులను తాజాగా ఉన్నప్పుడే తినడం మంచిదని వైద్యులు చెబుతున్నారు. వీటిలో ఉండే ప్రోటీన్లు మళ్లీ వేడి చేసినప్పుడు రసాయన మార్పులకు గురై జీర్ణవ్యవస్థపై ప్రభావం చూపవచ్చు. కడుపు ఉబ్బరం, అజీర్ణం వంటి సమస్యలు తలెత్తే అవకాశం ఉంది.

చాలామందికి టీని మళ్లీ వేడి చేసి తాగే అలవాటు ఉంటుంది. అయితే ఎక్కువసేపు ఉంచిన టీని తిరిగి వేడి చేస్తే దాని రుచి, పోషకాలు తగ్గిపోతాయి. అలాగే బ్యాక్టీరియా పెరిగే అవకాశమూ ఉంటుంది. ముఖ్యంగా పాలు కలిపిన టీని ఎక్కువసేపు నిల్వ చేయడం మంచిది కాదని నిపుణులు సూచిస్తున్నారు.

చికెన్‌ను సరైన ఉష్ణోగ్రతలో నిల్వ చేయకుండా మళ్లీ వేడి చేస్తే ప్రమాదం ఎక్కువగా ఉంటుంది. చికెన్‌లో ప్రోటీన్లు అధికంగా ఉండటంతో అవి తిరిగి వేడి చేసినప్పుడు రసాయన మార్పులకు గురవుతాయి. సరైన విధంగా వేడి చేయకపోతే బ్యాక్టీరియా పూర్తిగా నశించక ఫుడ్ పాయిజనింగ్‌కు దారితీయవచ్చు.

అన్నం విషయంలో మరింత జాగ్రత్త అవసరమని వైద్యులు చెబుతున్నారు. వండిన అన్నాన్ని ఎక్కువసేపు బయట ఉంచితే 'బాసిల్లస్ సెరియస్' అనే బ్యాక్టీరియా పెరిగే అవకాశం ఉంటుంది. తర్వాత మళ్లీ వేడి చేసినా ఆ బ్యాక్టీరియా ఉత్పత్తి చేసిన విషపదార్థాలు పూర్తిగా నశించకపోవచ్చు. దీంతో వాంతులు, విరేచనాలు వచ్చే ప్రమాదం ఉంది.