‘బాహుబలి 2’ తర్వాత తెలుగు రాష్ట్రాల్లో ది బెస్ట్ రన్ ని సొంతం చేసుకున్న ఏకైక సినిమా ‘ఇరుముడి’ మాత్రమేనని ట్రేడ్ విశ్లేషకులు సైతం తమ అభిప్రాయాన్ని వ్యక్తం చేస్తున్నారు. ఒక్కొక్క సెంటర్ లో ఈ చిత్రానికి నమోదు అవుతున్న వసూళ్లు ఆ రేంజ్ లో ఉన్నాయి మరి. ఇప్పటికీ ఈ సినిమా వర్కింగ్ డేస్ లో 5 కోట్ల రూపాయిల రేంజ్ లో షేర్ వసూళ్లను రాబట్టే పరిస్థితి లో ఉందంటే, ఏ రేంజ్ బ్లాక్ బస్టర్ అనేది అర్థం చేసుకోవచ్చు. అయితే ఒక సినిమా పెద్ద హిట్ అయ్యినప్పుడు , దాని చుట్టూ వివాదాలు కూడా చక్కర్లు కొట్టడం సహజమే.

అనాదిగా ఈ సంస్కృతి కొనసాగుతూ వస్తోంది. ఇరుముడి చుట్టూ కూడా అలాంటి వివాదాలే అలుముకున్నాయి. ఈ సినిమాలో ప్రభుత్వ స్కూల్స్ ని కించపరిచే విధంగా ఉన్నాయని, ఉపాధ్యాయులను తప్పుగా చూపించారని, వారి మనోభావాలు దెబ్బ తిన్నాయని, తక్షణమే ఆ సన్నివేశాలను తొలగించాలని , లేదని పక్షం లో సినిమాని బ్యాన్ చేయాలంటూ రీసెంట్ గా కొన్ని విద్యార్థి సంఘాలు రోడ్డు మీదకు వచ్చాయి. ఆంధ్ర ప్రదేశ్ విద్యా శాఖ మంత్రి నారా లోకేష్ కి లేఖలు కూడా రాశారు. రోజురోజుకి ఈ వ్యవహారం హీట్ ఎక్కుతుండడం తో ఈ సన్నివేశాలను మేకర్స్ తొలగించబోతున్నారా అనే అనుమానాలు అభిమానుల్లో వ్యక్తం అవుతున్నాయి. ఆ సన్నివేశాలను తొలగిస్తే అసలు సినిమాలో పవర్ ఉండదని, కొత్తగా చూసే ఆడియన్స్ కి సినిమా నచ్చదని అంటున్నారు విశ్లేషకులు. కానీ మేకర్స్ నుండి ఇప్పటి వరకు ఈ వివాదం పై ఎలాంటి రెస్పాన్స్ రాకపోవడం గమనార్హం.

ఒక సక్సెస్ మీట్ ని ఏర్పాటు చేశారు, అక్కడ స్పందిస్తారేమో అనుకుంటే , అసలు ఈ విషయాన్నే ప్రస్తావన కి తీసుకొని రాలేదు. త్వరలోనే అభిమానుల సమక్షం లో గ్రాండ్ గా ఒక విజయోత్సవ సభని ఏర్పాటు చేయబోతున్నారట మేకర్స్. ఈ సభ లోనైనా మాట్లాడుతారో లేదో చూడాలి. మరోపక్క ఈ చిత్రం నేటితో ప్రతిష్టాత్మక 200 కోట్ల గ్రాస్ క్లబ్ లోకి అడుగుపెట్టబోతుంది. 100 కోట్ల గ్రాస్ ని రాబడితే ఎక్కువ అని విడుదల రోజు అంతా అనుకున్నారు. కానీ కట్ చేస్తే 200 కోట్ల గ్రాస్ కొల్లగొట్టడమే కాకుండా , ఫుల్ రన్ లో 250 కోట్ల గ్రాస్ దిశగా అడుగులేస్తోంది ఈ చిత్రం. చూడాలి మరి ఎక్కడ దాకా వెళ్లి ఆగుతుంది అనేది.