Electric Vehicles Summer Heat: వేసవి కాలంలో ఎండలు మండిపోతున్నప్పుడు ఎలక్ట్రిక్ వాహనాల (EVలు) భద్రతపై చాలా మందిలో రకరకాల సందేహాలు తలెత్తుతుంటాయి.

ముఖ్యంగా స్మార్ట్‌ఫోన్‌ల లాగే ఈవీల్లో కూడా లిథియం అయాన్ బ్యాటరీలను ఉపయోగించడం వల్ల అధిక వేడికి ఇవి ప్రమాదాలకు గురవుతాయా అనే భయం ఉంటుంది. అయితే సరైన అవగాహన, జాగ్రత్తలు ఉంటే వేసవిలో కూడా ఈవీలను పూర్తి సురక్షితంగా ఉపయోగించవచ్చు. ఎండల తీవ్రత పెరిగినప్పుడు ఈవీల పనితీరు ఎలా ఉంటుంది, ఏయే వాహనాలు సురక్షితంగా ఉంటాయి, ఎలాంటి జాగ్రత్తలు తీసుకోవాలో ఇక్కడ చూద్దాం.

సాధారణంగా పెట్రోల్, డీజిల్ కార్లతో పోలిస్తే ఎలక్ట్రిక్ వాహనాలు ప్రమాదాలకు గురయ్యే అవకాశాలు చాలా తక్కువని అంతర్జాతీయ పరిశోధనలు చెబుతున్నాయి. అయితే వేసవిలో 40 డిగ్రీల సెల్సియస్ దాటి ఎండలు ఉన్నప్పుడు, బ్యాటరీలపై అదనపు ఒత్తిడి పడుతుంది. నాణ్యత లేని లోకల్ బ్యాటరీలు, మోడిఫైడ్ వైరింగ్ లేదా బ్యాటరీ మేనేజ్‌మెంట్ సిస్టమ్ (BMS) లోపాలు ఉన్నప్పుడు మాత్రమే వేడి వల్ల ప్రమాదాలు జరిగే అవకాశం ఉంటుంది. బ్రాండెడ్ , గుర్తింపు పొందిన కంపెనీల వాహనాల్లో ఇవి చాలా అరుదుగా జరుగుతాయి.

ఎండ తీవ్రతకు తోడు కారును లాంగ్ డ్రైవ్ చేసినప్పుడు బ్యాటరీ లోపల ఉష్ణోగ్రత విపరీతంగా పెరుగుతుంది. ఈ సమయంలో బ్యాటరీ వేడిని నియంత్రించలేకపోతే ‘థర్మల్ రన్‌అవే’ (Thermal Runaway) అనే ప్రక్రియ జరుగుతుంది. అంటే ఒక బ్యాటరీ సెల్ వేడెక్కి పక్కన ఉన్న సెల్స్‌కు ఆ వేడిని వేగంగా బదిలీ చేస్తుంది. దీనివల్ల బ్యాటరీ ఉబ్బిపోవడం, దట్టమైన పొగ రావడం లేదా షార్ట్ సర్క్యూట్ వల్ల మంటలు వచ్చే ప్రమాదం ఉంటుంది. అయితే, ఆధునిక కార్లలోని సిస్టమ్ బ్యాటరీ వేడెక్కగానే కారు పవర్‌ను తగ్గించడం లేదా ఛార్జింగ్‌ను ఆటోమేటిక్‌గా నిలిపివేయడం చేస్తుంది.

భారతదేశంలో విక్రయించే ఎలక్ట్రిక్ కార్లకు ప్రభుత్వం ‘AIS-156’ అనే కఠినమైన భద్రతా ప్రమాణాలను తప్పనిసరి చేసింది. దీని ప్రకారం కంపెనీలు అడ్వాన్స్‌డ్ కూలింగ్ టెక్నాలజీని వాడుతున్నాయి.

లిక్విడ్ కూలింగ్ సిస్టమ్ : టాటా నెక్సాన్ ఈవీ (Tata Nexon ev), పంచ్ ఈవీ, మహీంద్రా XUV400, మరియు BYD అటో 3 వంటి ప్రముఖ కార్లలో లిక్విడ్ కూలింగ్ టెక్నాలజీ ఉంటుంది. ఇందులో బ్యాటరీ చుట్టూ ప్రత్యేకమైన కూలెంట్ ద్రవం ప్రవహిస్తూ బ్యాటరీని ఎల్లప్పుడూ చల్లగా ఉంచుతుంది.

LFP బ్యాటరీ సాంకేతికత: టాటా, ఇతరులు వాడుతున్న LFP (Lithium Iron Phosphate) బ్యాటరీలు భారతీయ వేసవి వాతావరణానికి బాగా తట్టుకుంటాయి. ఇవి ఇతర NMC బ్యాటరీల కంటే ఎక్కువ వేడిని (సురక్షితంగా) భరించగలవు.

వేసవిలో ఈవీలు ఉన్నవారు తీసుకోవాల్సిన జాగ్రత్తలు:
లాంగ్ డ్రైవ్ లేదా ఎండలో ప్రయాణించి వచ్చిన వెంటనే కారును ఛార్జింగ్‌కు కనెక్ట్ చేయవద్దు. కారును కనీసం 45 నుండి 60 నిమిషాల పాటు నీడలో పార్క్ చేసి, బ్యాటరీ చల్లబడిన తర్వాతే ఛార్జ్ చేయాలి. కారును వీలైనంత వరకు నేరుగా ఎండ తగలకుండా చెట్ల కిందనో లేదా ఇండోర్ పార్కింగ్‌లోనే ఉంచాలి. ఛార్జింగ్ పాయింట్ కూడా మంచి గాలి వెలుతురు ఉండే ప్రదేశంలో ఉండాలి. మధ్యాహ్నం 12 నుండి సాయంత్రం 4 గంటల మధ్య తీవ్రమైన ఎండలు ఉంటాయి. ఈ సమయంలో ‘డీసీ ఫాస్ట్ ఛార్జింగ్’ (DC Fast Charging) వాడటం తగ్గించాలి. రాత్రి వేళల్లో లేదా ఉదయాన్నే హోమ్ ఛార్జర్ ద్వారా ఛార్జ్ చేసుకోవడం బ్యాటరీ ఆరోగ్యానికి ఎంతో మంచిది. వేసవి కాలంలో రోజువారీ వాడకం కోసం బ్యాటరీని 80% వరకు ఛార్జ్ చేయడం ఉత్తమం. నిరంతరం 100% ఛార్జ్ చేసి ఎండలో ఉంచితే బ్యాటరీపై ఒత్తిడి పెరుగుతుంది.