కొన్నిసార్లు ముఖ్యమైన సమాచారాన్ని భద్రపరచుకోవడం కోసం లేదా భవిష్యత్ అవసరాల కోసం కాల్ రికార్డ్ చేయాల్సిన పరిస్థితులు ఎదురవుతాయి. అయితే వినియోగదారుల గోప్యతను కాపాడేందుకు మెటా సంస్థ వాట్సాప్‌లో అధికారిక కాల్ రికార్డింగ్ ఫీచర్‌ను అందించలేదు. కానీ కొన్ని ఆప్షన్ల ద్వారా వాట్సాప్ కాల్ కూడా రికార్డింగ్ చేసుకోవచ్చు.

చాలా ఆండ్రాయిడ్ స్మార్ట్‌ఫోన్లలో బిల్ట్-ఇన్ స్క్రీన్ రికార్డర్ ఫీచర్ అందుబాటులో ఉంటుంది. వాట్సాప్ కాల్ ప్రారంభించే ముందు నోటిఫికేషన్ ప్యానెల్‌లో ఉన్న Screen Recorder ఆప్షన్‌ను ఆన్ చేయాలి. రికార్డింగ్ సెట్టింగ్స్‌లోకి వెళ్లి 'Record Audio' ఎంపికను Mic లేదా System Soundగా సెట్ చేయాలి. అనంతరం వాట్సాప్ కాల్ మాట్లాడితే, కాల్‌తో పాటు ఆడియో కూడా రికార్డ్ అవుతుంది. కాల్ ముగిసిన తర్వాత రికార్డింగ్‌ను ఆపేస్తే ఆ వీడియో ఫైల్ గ్యాలరీలో సేవ్ అవుతుంది.

భద్రతా పరిమితుల కారణంగా కొన్ని ఆండ్రాయిడ్ ఫోన్లు అంతర్గత ఆడియో రికార్డింగ్‌ను అనుమతించవు. అలాంటి సందర్భాల్లో స్క్రీన్ రికార్డర్ వీడియోను మాత్రమే రికార్డ్ చేస్తుంది. దీంతో కాల్‌లోని అవతలి వ్యక్తి వాయిస్ రికార్డ్ కాకపోవచ్చు. ఇది ప్రధానంగా ఫోన్ తయారీదారులు అమలు చేసే ప్రైవసీ నిబంధనల వల్ల జరుగుతుంది. ఇంటర్నల్ ఆడియో రికార్డ్ కాకపోతే, వాట్సాప్ కాల్‌ను స్పీకర్ మోడ్‌లో ఉంచి స్క్రీన్ రికార్డింగ్ ప్రారంభించవచ్చు. ఈ విధానంలో ఫోన్ మైక్రోఫోన్ ద్వారా మీ వాయిస్‌తో పాటు అవతలి వ్యక్తి వాయిస్ కూడా రికార్డ్ అయ్యే అవకాశం ఉంటుంది. అయితే చుట్టుపక్కల ఉన్న శబ్దాలు కూడా రికార్డింగ్‌లో చేరే అవకాశం ఉన్నందున నిశ్శబ్ద వాతావరణంలో ఈ పద్ధతిని ఉపయోగించడం మంచిది.

యాపిల్ సంస్థ వినియోగదారుల గోప్యతకు అత్యంత ప్రాధాన్యం ఇస్తుంది. అందుకే ఐఓఎస్‌లో సాధారణ స్క్రీన్ రికార్డర్ ద్వారా లేదా థర్డ్ పార్టీ యాప్స్ ద్వారా వాట్సాప్ కాల్స్‌ను నేరుగా రికార్డ్ చేయడానికి అనుమతి ఉండదు. ఐఫోన్‌లో కాల్ రికార్డింగ్ విషయంలో కఠినమైన భద్రతా నియమాలు అమల్లో ఉంటాయి.ఐఫోన్ వినియోగదారులు వాట్సాప్ కాల్‌ను స్పీకర్ మోడ్‌లో పెట్టి, మరో మొబైల్ ఫోన్ లేదా ప్రత్యేక ఆడియో రికార్డర్ సహాయంతో సంభాషణను రికార్డ్ చేయవచ్చు. ఇది అత్యంత సులభమైన మార్గంగా భావించబడుతోంది. అయితే రికార్డింగ్ నాణ్యత పరిసర పరిస్థితులపై ఆధారపడి ఉంటుంది.

ఐఫోన్‌ను మాక్ కంప్యూటర్‌కు కనెక్ట్ చేసి, QuickTime Player వంటి టూల్స్ ఉపయోగించడం ద్వారా ఆడియోను రికార్డ్ చేసే పద్ధతులు కొన్ని సందర్భాల్లో ఉపయోగపడవచ్చు. అయితే ఇవి సాంకేతిక పరిజ్ఞానం ఉన్నవారికి మాత్రమే సులభంగా అనుసరించగల మార్గాలు. అదనపు సెట్టింగ్స్ అవసరం కావచ్చు. ఏ కాల్‌నైనా రికార్డ్ చేసే ముందు స్థానిక చట్టాలు, గోప్యతా నిబంధనలను తప్పనిసరిగా పరిగణనలోకి తీసుకోవాలి. కొన్ని ప్రాంతాల్లో కాల్‌లో పాల్గొనే వ్యక్తుల అనుమతి లేకుండా రికార్డ్ చేయడం చట్టవిరుద్ధం కావచ్చు. అందువల్ల రికార్డింగ్‌ను బాధ్యతాయుతంగా, అవసరమైన సందర్భాల్లో మాత్రమే ఉపయోగించడం మంచిది.

వాట్సాప్‌లో అధికారిక కాల్ రికార్డింగ్ ఫీచర్ లేకపోయినా, ఆండ్రాయిడ్‌లో స్క్రీన్ రికార్డర్, స్పీకర్ మోడ్ వంటి మార్గాలు అందుబాటులో ఉన్నాయి. ఐఫోన్‌లో మాత్రం భద్రతా పరిమితుల కారణంగా ప్రత్యక్ష రికార్డింగ్ సాధ్యం కాదు. అయినప్పటికీ ప్రత్యామ్నాయ పద్ధతుల ద్వారా అవసరమైనప్పుడు సంభాషణలను భద్రపరచుకునే అవకాశం వినియోగదారులకు ఉంది.