అమీర్ ఖాన్ – గౌరీ స్ప్రాట్ సింపుల్ వివాహం ఫొటోలు నెటిజన్లను ఆకట్టుకుంటున్నాయి. ముంబై బాంద్రాలోని అమీర్ నివాసంలో ఇరు కుటుంబ సభ్యులు, స్నేహితుల సమక్షంలో ఈ వివాహం జరిగినట్లు సమాచారం. ప్రత్యేక వివాహ చట్టం కింద వీరిద్దరూ తమ పెళ్లిని అధికారికంగా నమోదు చేసుకున్నారని తెలుస్తుంది.

వైరల్ అవుతున్న ఫోటోల్లో అమీర్ ఖాన్ వివాహ పత్రాలపై సంతకం చేస్తూ కనిపించడం ప్రత్యేక ఆకర్షణగా నిలిచింది. గౌరీ స్ప్రాట్ సంప్రదాయ దుస్తుల్లో, అలంకారాలతో మెరిసిపోతూ అందరి దృష్టిని ఆకర్షించారు. ఆమె ధరించిన ఆభరణాలు కూడా చర్చనీయాంశంగా మారాయి. వేడుకలో ఇద్దరి పిల్లలు ఉంగరాల పెట్టెలతో కనిపించడం రెండు కుటుంబాల కలయికకు ప్రతీకగా షేర్ అవుతోంది. గౌరీ స్ప్రాట్ తన మొదటి వివాహం నుండి కుమారుడితో, అమీర్ ఖాన్ కుమారుడు ఆజాద్ రావ్ ఖాన్ కూడా ఈ కార్యక్రమంలో పాల్గొన్నట్లు ఫోటోలు వెల్లడిస్తున్నాయి.

అయితే ఈ వివాహం ఫోటోలు, వార్తలపై అమీర్ ఖాన్ లేదా గౌరీ స్ప్రాట్ నుండి ఇంకా అధికారిక ప్రకటన రాలేదు. గత మార్చిలో అమీర్ తన 60వ పుట్టినరోజున గౌరీతో పెళ్లి గురించి మాట్లాడిన విషయం గమనార్హం. జులై 5న సింపుల్ పెళ్లి చేసుకుంటున్నామని, కేవలం కుటుంబ సభ్యులు, కొద్దిమంది స్నేహితులు మాత్రమే హాజరవుతారని ఆయన అప్పుడు తెలిపారు. ఇప్పటి ఫోటోలు ఆ ప్రకటనను నిజం చేస్తున్నాయి.

అమీర్ ఖాన్ వివాహ జీవితం చరిత్ర గమనిస్తే, అతను 1986లో రీనా దత్తాను వివాహం చేసుకుని 2002లో విడిపోయారు. ఆ తర్వాత 2005లో కిరణ్ రావును పెళ్లి చేసుకుని 2021లో విడాకులు తీసుకున్నారు. ఇప్పుడు గౌరీ స్ప్రాట్తో కొత్త అధ్యాయం ప్రారంభించిన అమీర్, ఈ వివాహం ద్వారా తన జీవితంలో మరో మలుపు తీసుకున్నారు. అభిమానులు ఈ వివాహం పట్ల సానుకూలంగా స్పందించడం విశేషం.