ప్రకాష్ రాజ్ ఇటీవల ఒక కార్యక్రమంలో మాట్లాడుతూ, నేను మొదట మనిషిని, ఆ తర్వాత నటుడిని. నాకు కులం లేదా మతం అనే భేదాలు అర్థం కావు అంటూ ఎమోషనల్ కామెంట్స్ చేశారు. ఈ విషయాలు సోషల్ మీడియాలో విస్తృతంగా చర్చించబడుతున్నాయి.

తన తల్లి స్వర్ణలత జీవితం గురించి ప్రకాష్ రాజ్ వివరించారు. 1960లో బెంగళూరుకు వలస వచ్చి, 12 ఏళ్ల వయసులో తల్లి మరణంతో ఆమె అనాథాశ్రమంలో పెరిగారు. నర్సింగ్ శిక్షణ పూర్తి చేసి, క్రిస్టియన్ మిషనరీలో చేరి క్రైస్తవ మతాన్ని స్వీకరించారు. తన కుటుంబానికి తమ జాతి, కులం గురించి ఎటువంటి అవగాహన లేదని నటుడు చెప్పారు. తల్లి మరణించిన తర్వాత, ఆమె చివరి కోరికను గౌరవిస్తూ బెంగళూరు చర్చిలో క్రైస్తవ సంప్రదాయంతో అంత్యక్రియలు నిర్వహించారు.

గతంలో ప్రకాష్ రాజ్ తాను నాస్తికుడినని బహిరంగంగా ప్రకటించిన విషయం తెలిసిందే. దీనితో తల్లి మతపరమైన అంత్యక్రియల పట్ల సోషల్ మీడియాలో విమర్శలు వచ్చాయి. ఒక నెటిజన్ పాత వీడియోతో పోల్చుతూ ప్రశ్నించగా, ప్రకాష్ రాజ్ స్పందించారు. నాకు దేవుడిపై నమ్మకం లేదు. కానీ మా అమ్మకు ఆమె దేవుడిపై విశ్వాసం ఉంది. ఆమె విశ్వాసాన్ని గౌరవించడం నా బాధ్యత. ఆమె నమ్మకం ప్రకారం అంత్యక్రియలు జరగాల్సిన హక్కును నేను ఎలా నిరాకరిస్తాను? అని ఆయన ఎమోషనల్ కామెంట్స్ చేశారు.

ప్రకాష్ రాజ్ చేసిన ఈ వ్యాఖ్యలు సామాజిక మాధ్యమాల్లో వివిధ వర్గాల నుండి భిన్న అభిప్రాయాలు వ్యక్తం చేస్తున్నాయి. ఈ విషయంలో నటుడి స్పష్టత, తల్లి పట్ల గౌరవం చాలా మంది హృదయాలను హత్తుకుంది. మరోవైపు, కుల మత భావనలు లేని అతని ఆలోచనా ధోరణి ప్రశంసలు అందుకుంటోంది. ఇది కేవలం వ్యక్తిగం విషయమే కాదు, సమాజంలో విశ్వాసాలు మరియు సంప్రదాయాలపై మళ్లీ ఆలోచించేలా చేస్తుంది.