* ఫలితాన్నివ్వని 370 రద్దు
* ఇప్పటివరకు 88 ఘటనలు
న్యూఢిల్లీ : ఉగ్రవాద నిర్మూలన కోసమే జమ్ము కాశ్మీర్‌కు స్వతంత్ర ప్రతిపత్తినిచ్చే ఆర్టికల్‌ 370 రద్దు చేసామని చెప్తున్న మోడీ సర్కార్‌ మాటలు నిజం కాదని కేంద్ర ప్రభుత్వము ఇచ్చిన లెక్కలే చెబుతున్నాయి. 370 రద్దు తరువాత పెద్దఎత్తున బలగాలను దించి పూర్థిస్థాయిలో ఆంక్షలు అమలు చేసినప్పకీ కాశ్మీర్‌లో ఉగ్రవాద ప్రమాదం ఇంకా కొనసాగుతూనే ఉందని ఈ గణంకాలు తెలుపు తున్నాయి. ఆర్టికల్‌ 370 రద్దు చేసిన నాటి నుండి 88 ఉగ్రవాద సంఘటనలు నమోదయ్యాయని హోం మంత్రిత్వ శాఖ మంగళవారం పార్లమెంట్‌లో వెల్లడించింది. జమ్ము కాశ్మీర్‌కు ప్రత్యేక హోదా కల్పించే ఆర్టికల్‌ 370ని ఈ ఏడాది ఆగస్టు 5న కేంద్ర ప్రభుత్వం రద్దు చేసిన నాటి నుండి రాష్ట్రంలో అంతకుముందెన్నడూ లేని విధంగా భద్రతా ఆంక్షలు కొనసాగిన సంగతి తెలిసిందే.

నాటి నుండి నవంబరు 27వ తేదీ వరకు మొత్తం 115 రోజుల కాలంలో 88 సంఘటనలు నమోదైనట్లు తెలిపింది. ప్రత్యేక హోదా రద్దు చేయడానికి ముందుకు ఏప్రిల్‌ 12 నుండి ఆగస్టు 4 వరకు చూసుకుంటే 106 ఉగ్రవాద సంఘటనలు నమోదయ్యాయని వెల్లడించింది. ప్రత్యేక హోదాను ఎత్తివేయడానికి ముందు, తరువాత ఆ దాడుల్లో ఎంతమంది మృతి చెందారనే విషయాన్ని ప్రభుత్వం వెల్లడించలేదు. లోక్‌సభలో నలుగురు ఎంపీలు అడిగిన సంబంధిత ప్రశ్నకు హోంశాఖ సహాయ మంత్రి జి కిషన్‌ రెడ్డి ఈ వివరాలను వెల్లడించారు. ఆగస్టు 5 నుండి సరిహద్దుల్లో చొరబాటు యత్నాలు 84కు పెరిగాయని వెల్లడించింది. అంతకుముందు ఇదే కాలంలో 53 సార్లు మాత్రమే చొరబాటు యత్నాలు జరిగినట్లు తెలిపింది. కాశ్మీర్‌ లోయలో ఉగ్రవాదులను అణిచవేసేందుకు భద్రతా బలగాలు పటిష్టమైన చర్యలు చేపట్టాయని, దీని ఫలితంగా 2019లో 157 మంది ఉగ్రవాదులు హతమైనట్లు వెల్లడించింది.