Friday, 22 Jan, 12.09 am ప్రజాశక్తి

ప్రకాశం
రైతుల పరేడ్‌కు మద్దతు : సిపిఎం

ప్రజాశక్తి-పొదిలి : వ్యవసాయ నల్ల చట్టాలను రద్దు చేయాలని కోరుతూ ఢిల్లీలో రైతులు చేస్తున్న పోరాటానికి మద్దతుగా ఈ నెల 26న నిర్వహిస్తున్న రైతుల పెరేడ్‌కు మద్దతు తెలుపుతున్నట్లు సిపిఎం రాష్ట్ర నాయకులు జాలా అంజయ్య తెలిపారు. స్థానిక కార్యాలయంలో సిపిఎం పశ్చిమ ప్రకాశం కమిటీ సమావేశం జిల్లా కార్యదర్శివర్గ సభ్యులు ఎం.రమేష్‌ అధ్యక్షతన గురువారం నిర్వహించారు. ఈ సందర్భంగా అంజయ్య మాట్లాడుతూ కొందరు బడా పెట్టుబడీదారుల కోసం మోడీ ప్రభుత్వం వ్యవసాయ నల్లచట్టాలను తెచ్చిందన్నారు. రైతులను బానిసలుగా మార్చే ఈ చట్టాలను రద్దు చేయాలని కోరుతూ రైతులు చేస్తున్న పోరాటానికి సిపిఎం మద్దతు ప్రకటించినట్లు ఆయన పేర్కొన్నారు. సంక్షోభంలోనున్న రైతులకు సబ్సీడీలు ఇచ్చి ఆదుకోవాల్సిన కేంద్ర ప్రభుత్వం అదానీ, అంబానీల వంటి కార్పొరేట్లకు వ్యవసాయ రంగాన్ని అప్పగిస్తుందన్నారు. ప్రభుత్వం కో ఆపరేటివ్‌ సొసైటీలు, మార్కెట్‌లను నిర్వీర్యం చేసి ప్రైవేటు వ్యాపారుల దొపిడీకి రాచబాటలు వేస్తుందన్నారు. స్వామినాధన్‌ కమిషన్‌ సిఫారసుల ప్రకారం పంట పెట్టుబడి ఖర్చులకు 50 శాతం కలిపి మద్దతు ధర నిర్ణయించాలన్న విషయాన్ని పక్కన పెట్టి రైతు ఎక్కడైనా అమ్ముకోవచ్చని చెప్పడం వెనుక మోడీ కుట్ర దాగి ఉందన్నారు. ఆహార పప్పుధాన్యాలను నిత్యావసర సరుకుల చట్టం నుంచి మినహాయించి ఎంతైనా నిల్వ చేసుకునే వెసలుబాటు కల్పిస్తూ అనుమతించడం ద్వారా కృతిమ కొరత ఏర్పడి ధరలు పెరిగి పేదలు ఆకలిచావులకు గురికావాల్సి వస్తుందన్నారు. కాంటాక్టు వ్యవసాయంతో రైతు స్వతంత్రతను కోల్పోయి తమ పోలాల్లోనే కూలీలుగా బతకాల్సి వస్తుందన్నారు. కాంటాక్టు ఒప్పందాన్ని కంపెనీలు ఉల్లఘిస్తే కోర్టులకు వెళ్లరాదనే నిబంధన రైతులను కార్పొరేట్‌లకు బలిచేస్తుందన్నారు. సిపిఎం పశ్చిమ ప్రకాశం కార్యదర్శి సయ్యద్‌ హనీఫ్‌ మాట్లాడుతూ కేంద్రం తెచ్చిన కొత్త విద్యుత్‌ సవరణ బిల్లుతో వ్యవసాయం దివాళా తీయడమే కాక ప్రజలపై భారాలు పెరుగు తాయన్నారు. రోజురోజుకు పెరుగుతున్న పెట్రోల్‌, డీజిల్‌ ధరల కారణంగా వ్యవసాయంలో పెట్టుబడులు భారీగా పెరిగి రైతులకు తడిసి మోపెడవు తోందన్నారు. రైతుల పోరాటానికి మద్దతుగా పశ్చిమ ప్రకాశం నుంచి ఢిల్లీ వెళ్లి 13 రోజుల పాటు ఉద్యమంలో పాల్గొన్న ఏడుగురు రైతు ప్రతినిధులకు జిల్లా కమిటీ సభ్యులు అభినందనలు తెలిపారు. ఈ కార్యక్రమంలో సిపిఎం జిల్లా నాయకులు గాలి వెంకట రామిరెడ్డి, డి.సోమయ్య, పిల్లి తిప్పారెడ్డి, వెల్లంపల్లి ఆంజనేయులు, ఉసా వెంకటేశ్వర్లు, పిసి. కేశవరావు, టి.రంగారావు, కె.మాల్యాద్రి, జి. బాల నాగయ్య, టి. ఆవులయ్య, డికెఎం. రఫీ, వి. మాలకొండా రెడ్డి, ఉసా రాజ్యలక్ష్మి పాల్గొన్నారు.

Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: prajasakti
Top