రష్యా అధ్యక్షుడు వ్లాదిమిర్ పుతిన్కు ఇప్పుడు 74 ఏళ్లు. కానీ ఈ వయసులో కూడా ఆయన ఎంత ఫిట్గా ఉంటారో చూస్తే మతిపోవాల్సిందే. ఆయన ఆరోగ్యం, నిగనిగలాడే చర్మం ఎప్పుడూ ప్రపంచవ్యాప్తంగా పెద్ద చర్చనీయాంశంగానే ఉంటాయి.

మనుషులు ముసలివాళ్లు కాకుండా అమరత్వాన్ని సాధించవచ్చని పుతిన్ బలంగా నమ్ముతారు. కేవలం నమ్మడమే కాదు, దీనికోసం రష్యా ప్రభుత్వం ఇప్పుడు ఒక అద్భుతమైన పరిశోధన కూడా మొదలుపెట్టింది. వృద్ధాప్యాన్ని అడ్డుకోవడమే లక్ష్యంగా రష్యాలో యాంటీ-ఏజింగ్ రీసెర్చ్ చాలా వేగంగా సాగుతోంది.

పెరిగిపోతున్న వయసును ఆపడానికి రష్యా అధ్యక్షుడు ఏకంగా 26 బిలియన్ డాలర్లు అంటే మన భారతీయ కరెన్సీలో దాదాపు 2.47 లక్షల కోట్ల రూపాయల భారీ బడ్జెట్తో ఒక ప్రభుత్వ ప్రాజెక్టును ప్రారంభించారు. ఈ మిషన్ ద్వారా మనుషులు ముసలివాళ్లు అయ్యే ప్రక్రియ చాలా నెమ్మదిగా మారుతుందని, ఈ దశాబ్దం ముగిసేసరికి దాదాపు ఒక లక్షా డెబ్బై ఐదు వేల మంది ప్రాణాలు కాపాడవచ్చని రష్యా ప్రభుత్వం నమ్ముతోంది. న్యూ హెల్త్ ప్రిజర్వేషన్ టెక్నాలజీస్ అని పిలిచే ఈ ప్రాజెక్టులో భాగంగా.. ల్యాబ్లోనే మనుషుల శరీర అవయవాలను తయారు చేయడం, జీన్ థెరపీ అలాగే అత్యంత శీతల ఉష్ణోగ్రతల్లో ఉంచే క్రాయోథెరపీ వంటి సరికొత్త సాంకేతికతలపై రష్యా శాస్త్రవేత్తలు రాత్రింబవళ్లు పనిచేస్తున్నారు.

టెక్నాలజీలపై రష్యా దృష్టి

ఈ పరిశోధనల్లో ముఖ్యంగా నాలుగు రకాల టెక్నాలజీలపై రష్యా దృష్టి పెట్టింది. మొదటిది జీన్ థెరపీ, అంటే మనుషుల డీఎన్ఏ లేదా జీన్స్ను మార్చడం ద్వారా రోగాలను నయం చేయడం. రెండోది త్రీడీ బయోప్రింటింగ్, దీని ద్వారా బతికున్న కణాల సహాయంతో శరీర అవయవాలను, కణజాలాలను ల్యాబ్లోనే ప్రింట్ చేస్తారు. మూడోది పెప్టైడ్ థెరపీ, శరీరంలోని కణాలు సరిగ్గా పనిచేసేలా సిగ్నల్స్ ఇచ్చే ప్రొటీన్ లాంటి పదార్థాలను ఇందులో వాడుతారు. నాలుగోది క్రాయో థెరపీ, ఇందులో మనిషి శరీరాన్ని కొద్దిసేపటి వరకు అత్యంత చల్లటి ఉష్ణోగ్రతలో ఉంచి చికిత్స అందిస్తారు.

ఈ అమరత్వం గురించి పుతిన్ గతంలో చైనా అధ్యక్షుడు షీ జిన్పింగ్తో కూడా మాట్లాడారు. సెప్టెంబర్ 2025లో చైనాలో జరిగిన విక్టరీ డే పరేడ్ సమయంలో వీరిద్దరి మధ్య జరిగిన ఈ ఆసక్తికరమైన సంభాషణ అక్కడ ఉన్న మైక్లో రికార్డయ్యింది. సాంకేతికతలో వస్తున్న మార్పుల గురించి పుతిన్ మాట్లాడుతూ.. మనుషుల శరీర అవయవాలను ఎప్పటికప్పుడు మార్చుకుంటూ ఉంటే చాలా కాలం బతకొచ్చని, ఒక రకంగా మళ్లీ యవ్వనంలోకి రావచ్చు లేదా అమరత్వాన్ని కూడా పొందవచ్చని జిన్పింగ్తో చెప్పారు. దానికి జిన్పింగ్ స్పందిస్తూ.. ఈ శతాబ్దం ముగిసేసరికి భవిష్యత్తులో మనుషులు 150 ఏళ్ల వరకు బతికే అవకాశం ఉందని అంచనా వేశారు. ఈ మాటలు వింటూ పక్కనే ఉన్న ఉత్తర కొరియా అధ్యక్షుడు కిమ్ జోంగ్ ఉన్ నవ్వుతూ కనిపించారు.

అమెరికా సిలికాన్ వ్యాలీకి చెందిన జెఫ్ బెజోస్, సామ్ ఆల్ట్మాన్, పీటర్ థీల్ వంటి బిలియనీర్లలాగే పుతిన్కు కూడా వయసు పెరగకుండా ఆపే పరిశోధనలపై చాలా కాలంగా విపరీతమైన ఆసక్తి ఉంది. దీన్ని బట్టి వృద్ధాప్యాన్ని జయించే విషయంలో రష్యా ఎంత సీరియస్గా ఉందో అర్థం చేసుకోవచ్చు. ఇందులో భాగంగానే 2026 ఏప్రిల్లో రష్యా ప్రభుత్వం ఒక కీలక ప్రకటన చేసింది. మనుషుల కణాలు ముసలిబారిపోకుండా ఆపడానికి శాస్త్రవేత్తలు ఒక ప్రత్యేకమైన జీన్-థెరపీ చికిత్సను తయారు చేస్తున్నట్లు ప్రకటించింది. రష్యా డిప్యూటీ సైన్స్ మినిస్టర్ డెనిస్ సెకిరిన్స్కీ మాట్లాడుతూ.. ఈ కొత్త మందు బుढ़ाపెంపై జరిగే పోరాటంలో చాలా కీలక పాత్ర పోషిస్తుందని చెప్పారు.