CBSE 2025-26 విద్యా సంవత్సరంలో తొలిసారిగా భారీ స్థాయిలో On-Screen Marking (OSM) విధానాన్ని అమలు చేసింది. ఈ విధానంలో విద్యార్థుల జవాబు పత్రాలను స్కాన్ చేసి డిజిటల్ రూపంలో మూల్యాంకనం చేయడం జరుగుతుంది. అయితే ఈ ప్రక్రియ కోసం ఎంపిక చేసిన సంస్థపై ఇప్పుడు అనేక ప్రశ్నలు తలెత్తుతున్నాయి.

CBSE 12వ తరగతి ఫలితాలపై వివాదం.. OSM విధానమే ఉత్తీర్ణత తగ్గుదలకు కారణమా?

12వ తరగతి విద్యార్థి సార్థక్ నిర్వహించిన విశ్లేషణ ప్రకారం, టెండర్‌ను దక్కించుకున్న Coyempt EduTech సంస్థ గతంలో Globarena Technologies పేరుతో కార్యకలాపాలు నిర్వహించినట్లు సమాచారం. 2019 తెలంగాణ ఇంటర్మీడియట్ ఫలితాల వివాద సమయంలో ఈ సంస్థ పేరు వార్తల్లో నిలిచిన విషయం తెలిసిందే. అనంతరం సంస్థ పేరు మారినట్లు నివేదికలు సూచిస్తున్నాయి.

సార్థక్ సేకరించిన సమాచారం ప్రకారం CBSE ఈ ప్రాజెక్టుకు సంబంధించిన టెండర్‌ను ఒకసారి కాదు, మూడుసార్లు జారీ చేసింది. తొలి టెండర్‌కు సంబంధించిన పూర్తి వివరాలు అందుబాటులో లేకపోవడం, రెండో టెండర్‌లో పాల్గొన్న సంస్థలు సాంకేతిక అర్హతలను సాధించకపోవడం, అనంతరం మూడో టెండర్‌లో నిబంధనల మార్పుల తర్వాత ఒకే సంస్థ విజేతగా నిలవడం అనుమానాలకు కారణమవుతోంది.

టెండర్ ప్రక్రియలో చివరి దశలో అనేక నిబంధనలు సవరించబడినట్లు ఆరోపణలు వినిపిస్తున్నాయి. గతంలో బ్లాక్‌లిస్ట్ అయిన సంస్థలను అనర్హులుగా ప్రకటించే షరతులను సడలించడం, సాఫ్ట్‌వేర్ నాణ్యత ప్రమాణాలను తగ్గించడం, డేటా సెంటర్ యాజమాన్యానికి సంబంధించిన కఠిన నిబంధనలను తొలగించడం వంటి మార్పులు చోటుచేసుకున్నాయని విశ్లేషణలు పేర్కొంటున్నాయి.

అలాగే సొంత డేటా సెంటర్ తప్పనిసరి నిబంధనను రద్దు చేసి, థర్డ్ పార్టీ క్లౌడ్ హోస్టింగ్‌కు అనుమతి ఇవ్వడం కూడా ప్రశ్నలు రేకెత్తిస్తోంది. భద్రతా ఆడిట్లకు సంబంధించిన కొన్ని నిబంధనలను సైతం తొలగించినట్లు ఆరోపణలు ఉన్నాయి.

విమర్శకుల అభిప్రాయం ప్రకారం, ఈ మార్పులు ఒకే సంస్థకు అనుకూలంగా జరిగాయా అనే సందేహం తలెత్తుతోంది. ముఖ్యంగా జవాబు పత్రాల స్కానింగ్‌లో ఖచ్చితత్వం, డేటా భద్రత, సాంకేతిక ప్రమాణాలకు సంబంధించిన షరతులను సడలించడం విద్యార్థుల భవిష్యత్తుపై ప్రభావం చూపే అంశంగా భావిస్తున్నారు.

CBSE రీవాల్యుయేషన్ పోర్టల్‌పై సైబర్ దాడి కలకలం.. చెల్లింపుల్లో భారీ అవకతవకలు!

ఇటీవల CBSE రీవాల్యూయేషన్ పోర్టల్‌లో సైబర్ భద్రతా లోపాలు, అనధికార లాగిన్ ప్రయత్నాలు, పేమెంట్ గేట్‌వే సమస్యలు వెలుగులోకి రావడం ఈ వివాదానికి మరింత ప్రాధాన్యం తీసుకొచ్చింది. డిజిటల్ మూల్యాంకన వ్యవస్థ అమలుకు ముందు అవసరమైన భద్రతా పరీక్షలు పూర్తయ్యాయా? లేదా తొందరపాటుతో వ్యవస్థను అమల్లోకి తీసుకువచ్చారా? అనే ప్రశ్నలు కూడా వ్యక్తమవుతున్నాయి.

దేశవ్యాప్తంగా లక్షలాది మంది విద్యార్థుల విద్యా భవిష్యత్తుతో ముడిపడి ఉన్న అంశం కావడంతో టెండర్ ప్రక్రియపై సమగ్ర విచారణ జరపాలని విద్యావేత్తలు, నిపుణులు కోరుతున్నారు. టెండర్ ప్రక్రియలో పారదర్శకత ఉందా లేదా అనే అంశాన్ని పరిశీలించేందుకు స్వతంత్ర ఆడిట్ నిర్వహించాలని, అవసరమైతే సీఏజీ పరిశీలనకు పంపాలని కూడా డిమాండ్లు వినిపిస్తున్నాయి.

CBSE ఆన్‌స్క్రీన్ మార్కింగ్ విధానం భవిష్యత్‌లో దేశవ్యాప్తంగా మూల్యాంకన వ్యవస్థను పూర్తిగా మార్చే అవకాశమున్న నేపథ్యంలో, టెండర్ నిబంధనల మార్పులు, డేటా భద్రత, సాంకేతిక ప్రమాణాలపై వస్తున్న ప్రశ్నలకు సంబంధిత అధికారులు స్పష్టత ఇవ్వాల్సిన అవసరం ఉందని విద్యా వర్గాలు అభిప్రాయపడుతున్నాయి. ప్రస్తుతం ఈ అంశం విద్యార్థులు, తల్లిదండ్రులు, ఉపాధ్యాయులు మరియు విధాన నిర్ణేతల దృష్టిని ఆకర్షిస్తోంది.