ఈ ఘటనతో రీవాల్యుయేషన్ ఫీజుల చెల్లింపుల్లో అసాధారణ హెచ్చుతగ్గులు కనిపించగా, దాదాపు 50 మంది విద్యార్థుల ఖాతాల్లోకి అనధికారిక లాగిన్ ప్రయత్నాలు జరిగినట్లు సమాచారం.

ఇటీవల ప్రకటించిన CBSE 12వ తరగతి ఫలితాల తర్వాత, కొత్తగా ప్రవేశపెట్టిన On-Screen Marking (OSM) విధానంపై పలువురు విద్యార్థులు అభ్యంతరాలు వ్యక్తం చేశారు. తమ సమాధాన పత్రాలు తారుమారయ్యాయని ఆరోపించిన విద్యార్థుల ఫిర్యాదుల నేపథ్యంలో, CBSE స్కాన్ చేసిన ఆన్సర్ షీట్ల కాపీలను అందుబాటులో ఉంచి రీవాల్యుయేషన్‌కు అవకాశం కల్పించింది.

అయితే రీవాల్యుయేషన్ ఫీజు చెల్లించేందుకు ఉపయోగించే ఆన్‌లైన్ పేమెంట్ సిస్టమ్‌పై సైబర్ దాడి జరగడంతో కొత్త సమస్యలు తలెత్తాయి.

సైబర్ దాడి ప్రభావంతో కొంతమంది విద్యార్థులకు చెల్లించాల్సిన రీవాల్యుయేషన్ ఫీజు అసాధారణంగా కనిపించినట్లు అధికారులు తెలిపారు. సాధారణంగా ఉండాల్సిన ఫీజు స్థానంలో కొన్ని సందర్భాల్లో రూ.1 మాత్రమే చూపించగా, మరికొన్ని సందర్భాల్లో రూ.68,000 వరకు మొత్తాలు కనిపించినట్లు సమాచారం.

ప్రాథమిక విచారణలో ఈ సమస్య ప్రధానంగా HDFC Bank చెల్లింపు గేట్‌వేతో అనుసంధానమైన వ్యవస్థలోనే గుర్తించినట్లు అధికారులు పేర్కొన్నారు.

ఇన్‌ సర్వీస్‌ టీచర్లకు TET తప్పనిసరి.. సుప్రీంకోర్టు కీలక తీర్పు.. ఈ తేదీ వరకు గడువు పొడిగింపు!

సైబర్ భద్రతా సమస్యను అత్యంత ప్రాధాన్యంగా తీసుకున్న అధికారులు, Indian Institute of Technology Madras మరియు Indian Institute of Technology Kanpur కు చెందిన సాంకేతిక నిపుణుల సహకారంతో సమస్యను పరిశీలిస్తున్నారు. పేమెంట్ సిస్టమ్‌ను పూర్తిగా సురక్షితం చేసేందుకు చర్యలు చేపట్టినట్లు వెల్లడించారు.

ఇదే సమయంలో CBSE ఆన్-స్క్రీన్ మార్కింగ్ విధానానికి సంబంధించిన మరో అంశం కూడా చర్చనీయాంశమైంది. విద్యార్థుల నుంచి వచ్చిన ఫిర్యాదులపై విచారణ జరిపిన కేంద్ర ప్రభుత్వ వర్గాలు, మొత్తం 20 జవాబు పత్రాలు తారుమారైనట్లు నిర్ధారించాయి.

అయితే సంబంధిత విద్యార్థులను సంప్రదించి, వారికి సరైన జవాబు పత్రాలను అందించినట్లు అధికారులు తెలిపారు. దీంతో ప్రభావిత విద్యార్థుల సమస్యను పరిష్కరించినట్లు పేర్కొన్నారు.

ITI అర్హతతో హైదరాబాద్‌లో 33 అప్రెంటిస్ పోస్టులు.. మెరిట్ ఆధారంగా ఎంపిక!

CBSE ఈ ఏడాది నిర్వహించిన మూల్యాంకన ప్రక్రియలో 98 లక్షలకుపైగా ఆన్సర్ షీట్లకు సంబంధించిన దాదాపు 40 కోట్ల పేజీలను On-Screen Marking విధానంలో స్కాన్ చేసినట్లు కేంద్ర వర్గాలు వెల్లడించాయి.

ఈ ప్రక్రియలో సుమారు 68 వేల జవాబు పత్రాల్లో నాణ్యత సమస్యలు గుర్తించగా, వాటిని మళ్లీ స్కాన్ చేసి మూల్యాంకనం నిర్వహించినట్లు అధికారులు వివరించారు.

CBSE రీవాల్యుయేషన్ కోసం దరఖాస్తు చేస్తున్న విద్యార్థులు అధికారిక పోర్టల్ ద్వారా మాత్రమే చెల్లింపులు చేయాలని, చెల్లింపు వివరాలను ఒకటి కంటే ఎక్కువసార్లు ధృవీకరించుకోవాలని నిపుణులు సూచిస్తున్నారు. సైబర్ దాడి ఘటనపై పూర్తి స్థాయి విచారణ కొనసాగుతున్న నేపథ్యంలో విద్యార్థులు అప్రమత్తంగా ఉండాలని అధికారులు తెలిపారు.