హైదరాబాద్లో తెలంగాణ రక్షణ సేన నిర్వహించిన రాష్ట్ర స్థాయి సాధారణ సమావేశంలో పార్టీ జెండా గద్దె నమూనాను పార్టీ చీఫ్ కల్వకుంట్ల కవిత ఆవిష్కరించారు.
బంజారాహిల్స్లోని పార్టీ కార్యాలయంలో జరిగిన ఈ సమావేశంలో రాష్ట్రవ్యాప్తంగా ఒకే నమూనాలో జెండా గద్దెలు నిర్మించాలని పార్టీ శ్రేణులకు ఆమె పిలుపునిచ్చారు. పార్టీ గుర్తింపు, ఏకరూపత మరియు తెలంగాణ భావజాలాన్ని ప్రతిబింబించే విధంగా ఈ జెండా గద్దెల రూపకల్పన చేసినట్లు తెలిపారు.
జెండా గద్దెల నిర్మాణానికి సంబంధించి ప్రత్యేక మార్గదర్శకాలను కూడా కల్వకుంట్ల కవిత వెల్లడించారు. ప్రతి జెండా గద్దె మూడు అడుగుల ఎత్తు, రెండు అడుగుల వెడల్పుతో నిర్మించాలని సూచించారు. ఇందులో కింద భాగం ఒక అడుగు ఎత్తులో ఉండే బేస్గా రూపొందించగా, పైభాగం మరో రెండు అడుగుల ఎత్తుతో ఉండేలా నమూనా రూపొందించినట్లు తెలిపారు.
జెండా గద్దె బేస్కు ఆకుపచ్చ రంగు, పైభాగంలోని జెండా గద్దెకు పసుపు రంగు ఉపయోగించాలని సూచించారు. మధ్యలో నీలం రంగుతో తెలంగాణ రాష్ట్ర పటాన్ని ఏర్పాటు చేసి, ఆ పటంలో మధ్యభాగంలో ఆంగ్ల అక్షరాల్లో పార్టీ పేరును పొందుపరచాలని తెలిపారు. అలాగే కింద భాగంలోని ఆకుపచ్చ రంగు బేస్ మధ్యలో తెలుగులో "తెలంగాణ రక్షణ సేన" అని రాయాలని సూచించారు.
పార్టీ జెండాలకు సంబంధించిన రంగుల ప్రమాణాలను కూడా ఖచ్చితంగా పాటించాలని ఆమె స్పష్టం చేశారు. పార్టీ కేంద్ర కార్యాలయం నిర్దేశించిన రంగుల కోడ్లను అనుసరించినప్పుడే రాష్ట్రవ్యాప్తంగా అన్ని జెండాలు ఒకే విధంగా కనిపిస్తాయని తెలిపారు. పార్టీ కార్యకర్తలు ఎక్కడా స్వేచ్ఛగా రంగులు మార్చకుండా క్రమశిక్షణతో వ్యవహరించాలని సూచించారు.
ఈ నెల 20వ తేదీ నుంచి వచ్చే నెల 20వ తేదీ వరకు రాష్ట్రవ్యాప్తంగా నెల రోజుల పాటు "జెండా పండుగ" నిర్వహించాలని పార్టీ శ్రేణులకు కల్వకుంట్ల కవిత పిలుపునిచ్చారు. ప్రతి గ్రామం, మండలం, పట్టణం, నగరంలో పార్టీ జెండా గద్దెల నిర్మాణంతో పాటు తెలంగాణ ఆత్మగౌరవాన్ని ప్రజల్లో మరింత బలంగా చాటాలని ఆమె అన్నారు. పార్టీ విస్తరణ, సిద్ధాంత ప్రచారం మరియు కార్యకర్తల్లో ఉత్సాహం పెంపొందించేందుకు ఈ కార్యక్రమం ఉపయోగపడుతుందని పేర్కొన్నారు.