తైవాన్ విషయంలో అమెరికా ఎలాంటి పొరబాటు నిర్ణయాలు తీసుకున్నా సహించేది లేదని చైనా హెచ్చరించింది. అమెరికా అధ్యక్షుడు డొనాల్డ్ ట్రంప్ చైనా పర్యటనలో భాగంగా వాణిజ్య ఒప్పందాలతో బాటు తైవాన్ అంశంపై కూడా చర్చించినట్లు తెలిసింది.
చైనా అధ్యక్షుడు షీ జిన్పింగ్ అమెరికా అధ్యక్షుడు ట్రంప్ మధ్య బీజింగ్లో ప్రారంభమైన కీలక ద్వైపాక్షిక సదస్సు ప్రపంచవ్యాప్తంగా ఆసక్తిని రేకెత్తిస్తోంది. రెండు రోజులపాటు జరిగే ఈ సమావేశంలో వాణిజ్య ఒప్పందాలు, తైవాన్ అంశం, కృత్రిమ మేధస్సు, అంతర్జాతీయ భద్రత వంటి కీలక అంశాలపై చర్చలు జరుగుతున్నాయి.
బీజింగ్లోని గ్రేట్ హాల్ ఆఫ్ ది పీపుల్లో ఘన స్వాగతం మధ్య జరిగిన ప్రారంభ సమావేశంలో షీ జిన్పింగ్ మాట్లాడుతూ అమెరికా-చైనా సహకారం ప్రపంచ స్థిరత్వానికి ఎంతో కీలకమని పేర్కొన్నారు. "రెండు దేశాలు సహకరిస్తే ఇరువురికీ లాభం, ఎదురెదురుగా నిలిస్తే ఇరువురికీ నష్టం" అని ఆయన అన్నారు.
దీనికి స్పందించిన ట్రంప్ షీని "గొప్ప నాయకుడు"గా అభివర్ణించారు. "ఇది ప్రపంచంలోనే అతిపెద్ద సదస్సు కావచ్చని కొందరు అంటున్నారు" అని వ్యాఖ్యానించారు.
పెట్టుబడులను కొనసాగించాలి
అధికారిక చర్చల అనంతరం చైనా ప్రభుత్వ మీడియా విడుదల చేసిన వివరాల ప్రకారం, వాణిజ్య బృందాల మధ్య జరిగిన చర్చలు "సమతుల్యమైన, సానుకూల ఫలితాలకు" దారితీశాయని షీ ట్రంప్కు తెలిపారు. గత ఏడాది అక్టోబర్లో కుదిరిన ట్రేడ్ ట్రూస్ను కొనసాగించడం, భవిష్యత్తు పెట్టుబడులు మరియు వాణిజ్య సహకారానికి కొత్త వ్యవస్థలను రూపొందించడం ఈ చర్చల ప్రధాన లక్ష్యంగా ఉన్నట్లు సమాచారం.
అయితే తైవాన్ అంశాన్ని షీ జిన్పింగ్ అత్యంత ప్రాధాన్యంగా ప్రస్తావించారు. తైవాన్ విషయంలో తప్పుదారి పట్టే నిర్ణయాలు తీసుకుంటే అమెరికా-చైనా సంబంధాలు ప్రమాదకర దిశగా వెళ్లే అవకాశం ఉందని ట్రంప్కు హెచ్చరించినట్లు చైనా మీడియా పేర్కొంది. తైవాన్కు అమెరికా ఆయుధాల విక్రయంపై చైనా తీవ్ర అభ్యంతరం వ్యక్తం చేసింది.
ఈ సమావేశానికి ప్రపంచ వ్యాపార రంగ ప్రముఖులు కూడా హాజరయ్యారు. ఎలాన్ మస్క్, జెన్సెన్ హువాంగ్, టిమ్ కుక్ వంటి ప్రముఖులు ట్రంప్ ప్రతినిధి బృందంలో భాగమయ్యారు. చైనా మార్కెట్ను అమెరికా కంపెనీలకు మరింతగా తెరవాలని ట్రంప్ షీని కోరనున్నట్లు సమాచారం.
ఇరాన్ యుద్ధంపై కూడా చర్చలు
ఇరాన్ యుద్ధ ప్రభావం, అమెరికాలో పెరుగుతున్న ద్రవ్యోల్బణం, మధ్యంతర ఎన్నికల ఒత్తిడి నేపథ్యంలో ట్రంప్ ఈ సమావేశాలకు హాజరవుతుండగా, మరోవైపు చైనా ఆర్థిక వ్యవస్థ మందగించినప్పటికీ షీ జిన్పింగ్పై అంతర్గత రాజకీయ ఒత్తిడి తక్కువగా ఉందని విశ్లేషకులు చెబుతున్నారు.
అమెరికా బోయింగ్ విమానాలు, వ్యవసాయ ఉత్పత్తులు, ఇంధన ఎగుమతులను చైనాకు పెంచాలని చూస్తుండగా, చైనా మాత్రం చిప్ తయారీ పరికరాలు, ఆధునిక సెమీకండక్టర్లపై అమెరికా విధించిన పరిమితులను సడలించాలని కోరుతోంది.
ఇక ఇరాన్ అంశంలో కూడా ట్రంప్ చైనాను ఒప్పించే ప్రయత్నం చేయనున్నట్లు సమాచారం. అయితే ఇరాన్ను అమెరికాకు వ్యతిరేక వ్యూహాత్మక భాగస్వామిగా భావిస్తున్న చైనా ఆ విషయంలో పెద్దగా ఒత్తిడి తీసుకురాదని విశ్లేషకులు అభిప్రాయపడుతున్నారు.
ఈ సదస్సులో భాగంగా ట్రంప్, షీ జిన్పింగ్ కలిసి టెంపుల్ ఆఫ్ హెవెన్ను సందర్శించనుండగా, రాష్ట్ర విందు, టీ సమావేశాలు కూడా ఏర్పాటు చేశారు. షీ జిన్పింగ్ ఈ ఏడాది చివర్లో అమెరికా పర్యటనకు వెళ్లే అవకాశమున్నట్లు సమాచారం.