Monday, 14 Jun, 4.21 pm SMTV 24x7 NEWS

క్రీడలు
"అశ్విన్, జడేజాలతో కివీస్ బ్యాట్స్‌మెన్‌లకు చుక్కలే"

భారత సీనియర్ ఆల్‌రౌండర్ రవీంద్ర జడేజా ఎడమచేతి వాటం బ్యాట్స్‌మెన్‌లకి అద్భుతంగా బౌలింగ్ చేస్తాడని ఆస్ట్రేలియా ఓపెనర్ డేవిడ్ వార్నర్ కితాబిచ్చాడు. భారత్, న్యూజిలాండ్ మధ్య ఇంగ్లాండ్‌లోని సౌథాంప్టన్ వేదికగా జూన్ 18 నుంచి 22 వరకూ ఐసీసీ వరల్డ్ టెస్టు ఛాంపియన్‌షిప్ ఫైనల్ మ్యాచ్ జరగనుండగా.. ఈ మ్యాచ్‌లో ముగ్గురు పేసర్లు, ఒక స్పిన్నర్‌తో టీమిండియా బరిలోకి దిగాలని మాజీ క్రికెటర్లు సూచిస్తున్నారు. ఈ క్రమంలో ఒక స్పిన్నర్‌గా జడేజాకి బదులుగా అశ్విన్‌ని ఆడించాలని కూడా చాలా మంది సూచిస్తున్నారు. కానీ.. ఈ ఇద్దరూ ఆ ఫైనల్‌లో ఆడితే బాగుంటుందని వార్నర్ అభిప్రాయపడ్డాడు. ''ఎడమచేతి వాటం బ్యాట్స్‌మెన్‌లకి గత కొన్నేళ్లుగా రవీంద్ర జడేజా అద్భుతంగా బౌలింగ్ చేస్తున్నాడు. పిచ్‌పై కేవలం రోటీ సైజ్ ఫుట్ మార్క్‌ ఉన్నా రవీంద్ర జడేజాకి చాలు. ఆ ప్రదేశంలో నిలకడగా బంతులు విసురుతూ.. బ్యాట్స్‌మెన్‌లను ఇబ్బంది పెట్టగలడు. నా అంచనా ప్రకారం ఫైనల్లో అశ్విన్, జడేజా కివీస్ బ్యాట్స్‌మెన్‌లను ఇబ్బందిపెట్టగలరు'' అని డేవిడ్ వార్నర్ వెల్లడించాడు.

న్యూజిలాండ్‌తో ఫైనల్ ముగిసిన తర్వాత ఆగస్టు 4 నుంచి సెప్టెంబరు 14 వరకూ ఇంగ్లాండ్‌తో ఐదు టెస్టుల సిరీస్‌లో భారత్ ఢీకొట్టనుంది. ఈ నేపథ్యంలో.. జట్టులోకి రవీంద్ర జడేజాతో పాటు ఆల్‌రౌండర్లుగా అక్షర్ పటేల్, వాషింగ్టన్ సుందర్‌లను కూడా భారత సెలెక్టర్లు ఎంపిక చేశారు. ఫాస్ట్ బౌలర్ శార్ధూల్ ఠాకూర్‌ని కూడా ఆల్‌రౌండర్‌గా టీమిండియా మేనేజ్‌మెంట్ పరిగణిస్తోంది.
Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: SMTV Telugu
Top