Saturday, 23 Jan, 4.21 pm SMTV 24x7 NEWS

జాతీయం
మహిళకు ఐదు నెలల్లో 31సార్లు కరోనా పాజిటివ్

చైనాలో పుట్టిన కరోనా మహమ్మారి ఏడాదిగా ప్రపంచాన్ని అల్లకల్లోలం చేస్తున్న సంగతి చూస్తూనే ఉన్నాం. దీని దెబ్బకు అనేక దేశాలు నెలల పాటు లాక్‌డౌన్‌లోకి వెళ్లిపోయాయి. ప్రపంచం ఇప్పుడిప్పుడే ఈ వైరస్ నుంచి క్రమంగా కోలుకుంటోంది. ఈ క్రమంలోనే ఈ వైరస్‌కు సంబంధించి వెలుగులోకి వస్తున్న విషయాలు షాకింగ్‌కు గురిచేస్తున్నాయి. తాజాగా రాజస్థాన్‌కు చెందిన మహిళకు ఒకటి కాదు రెండు ఏకంగా 31సార్లు కోవిడ్ పాజిటివ్ వచ్చినట్లు వెలుగులోకి వచ్చింది. ఐదు నెలల్లో 31సార్లు కోవిడ్ టెస్ట్ చేయించుకోగా అన్నిసార్లూ ఆమెకు పాజిటివ్ రావడం చూసి డాక్టర్లే నివ్వెరపోయారట. అయితే ఇన్ని నెలల్లో ఆమెకు ఒక్కసారి కూడా కరోనా లక్షణాలు కనిపించకపోవడం మరొక వింత. మిస్టరీగా మారిన ఈ ఘటనపై సైంటిస్టులు, వైద్య నిపుణులు అధ్యయనం చేస్తున్నారు. రాజస్థాన్‌లోని భరత్‌పూర్ జిల్లాలోని ఓ గ్రామానికి చెందిన శారద అనే మహిళకు గతేడాది ఆగస్టు 28 కోవిడ్ టెస్ట్ చేయగా పాజిటివ్ అని వచ్చింది. దీంతో ఆమెను భరత్‌పూర్‌ జిల్లాలోని ఆర్‌బీఎం ఆస్పత్రిలో చేర్పించి వైద్యం అందించారు. క్వారంటైన్ పూర్తయ్యాక కోవిడ్ టెస్ట్ చేయగా మళ్లీ పాజిటివ్ అని వచ్చింది.

ఇలా ఐదు నెలలుగా 31సార్లు ఆమెకు కోవిడ్ టెస్ట్ చేయగా అన్నిసార్లూ పాజిటివ్ అనే వచ్చింది. దీంతో డాక్టర్లు ఆమెకు అల్లోపతి, ఆయుర్వేద, హోమియోపతి... ఇలా అన్ని పద్ధతుల్లోనూ వైద్యం అందించినా పరిస్థితిలో ఎలాంటి మార్పు రాలేదు. అయితే ఈ ఐదు నెలల్లో శారద పూర్తి ఆరోగ్యంగా ఉందని, 7-8కిలోల బరువు కూడా పెరిగిందని డాక్టర్లు చెబుతున్నారు.

భరత్‌పూర్ జిల్లాలో ఇప్పుడు కరోనా రోగుల సంఖ్య జీరోకు చేరుకుంది. అయితే శారద విషయం మాత్రం అధికారులకు తలనొప్పిగా మారింది. కరోనా సోకిన రోగికి చికిత్స తర్వాత నెగిటివ్ వస్తేనే ఇంటికి పంపేస్తారు. అయితే శారదకు ఎన్నిసార్లు టెస్టులు చేసినా పాజిటివే వస్తుండటంతో ఆమెను ఇంటికి పంపే సాహసం చేయడం లేదు.

తొలిసారి వచ్చిన వైరస్‌ చికిత్స తీసుకున్నప్పటికీ కొంతకాలం శరీరంలోనే ఉంటుందని.. అందువల్లే శారదకు తరచూ పాజిటివ్‌ వస్తోందని వైద్యులు భావిస్తున్నారు. ఆమె కడుపు భాగంలో కరోనా వైరస్‌ ఆనవాళ్లు ఉండటంతోనే ఇలా జరుగుతుందని చెబుతున్నారు. శారద నుంచి నమూనాలు తీసుకుని పరిశీలిస్తున్నామని, నివేదిక వచ్చాకే దీనిపై స్పష్టత వస్తుందని వైద్యులు తెలిపారు.
Dailyhunt
Disclaimer: This story is auto-aggregated by a computer program and has not been created or edited by Dailyhunt. Publisher: SMTV Telugu
Top