"రాజకీయాల్లో తమ స్వంత వ్యక్తిత్వం కోల్పోయిన వారే.. ఎదుటివారి శీలాన్ని కూడా శంకించేలా అబద్ధాల ప్రచారాలకు తెరలేపుతారు."
బీజేపీ, జనసేన విషయంలో ఇప్పుడు వైఎస్ఆర్సీపీ అదే చేస్తోంది.
వ్యక్తిగత జీవితాల్లో వివాహేతర బంధాలు ఎలాగైతే నైతిక విలువల పతనానికి, సామాజిక అపవాదులకు దారితీస్తాయో, రాజకీయాల్లో కూడా అటువంటి అక్రమ సిద్ధాంత బంధాలు ప్రజాస్వామ్య వ్యవస్థను, ఓటర్ల నమ్మకాన్ని కాలరాస్తాయి. ప్రస్తుతం ఆంధ్రప్రదేశ్ రాజకీయాల్లో సరిగ్గా ఇలాంటి విలక్షణమైన, నైతికత లేని రాజకీయ క్రీడను వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి నడుపుతున్నారు. రాష్ట్రంలో తెలుగుదేశం , జనసేన, భారతీయ జనతా పార్టీ అధికారికంగా నేషనల్ డెమోక్రటిక్ అలయన్స్ కూటమిగా ఏర్పడి ప్రభుత్వాన్ని నడుపుతున్నాయి. వివాహ బంధం లాంటి ఈ పటిష్టమైన కూటమి బహిరంగంగా కనిపిస్తున్నప్పటికీ, తెరవెనుక మాత్రం బీజేపీ మాకు శాశ్వత మిత్రుడు, కేంద్ర పెద్దలు మా వైపే ఉన్నారు అంటూ వైసీపీ ఒక కుట్రపూరితమైన, అక్రమ సంబంధ ప్రచారాన్ని నిరంతరం మార్కెట్ చేస్తోంది. పెయిడ్ రాజకీయ విశ్లేషకులు, సోషల్ మీడియా హ్యాండిల్స్, తమ సొంత మీడియా సామ్రాజ్యాన్ని ఉపయోగించుకుని వైసీపీ సృష్టిస్తున్న ఈ గాసిప్ పాలిటిక్స్ వెనుక ఉన్న అసలు లక్ష్యం ఏమిటో అందరికీ తెలుసు.
బీజేపీతో అక్రమ సంబంధం ఉందని ప్రచారం చేసుకుంటున్న వైసీపీ
అబద్ధాన్ని ఆయుధంగా చేసుకుని బతికేవాడు.. పక్కవాడి నిజాయితీని కూడా శంకించేలా మాయా ప్రపంచాన్ని సృష్టిస్తాడు. కానీ, కాలం మారినప్పుడు ఆ మాయా పొరలు తొలగిపోక తప్పదు. నిజజీవితంలో వివాహేతర బంధాల గురించి వచ్చే వార్తల్లో కొన్ని నిజాలు ఉంటే, మెజారిటీ భాగం గాసిప్స్ మాత్రమే ఉంటాయి. సమాజంలో ఒక వ్యక్తి తన ఉనికిని చాటుకోవడానికి, లేదా అవతలి వ్యక్తి ప్రతిష్టను దిగజార్చడానికి నాకు ఫలానా వారితో బంధం ఉంది అని కుట్రపూరితంగా ప్రచారం చేసుకున్నప్పుడు ఇలాంటి వికృత గాసిప్స్ పుట్టుకొస్తాయి. ఆంధ్రప్రదేశ్లో ప్రస్తుతం బీజేపీ-వైసీపీ బంధం కూడా సరిగ్గా ఇదే కోవకు చెందుతుంది. రాష్ట్రంలోని సామాన్య ప్రజలుగానీ, తటస్థ ఓటర్లుగానీ ఈ రెండు పార్టీల మధ్య తెరవెనుక ఏదో ఉందనే భ్రమల్లో లేరు. కానీ, వైఎస్సార్ కాంగ్రెస్ పార్టీ మాత్రం ఈ వాస్తవాన్ని అంగీకరించలేక, తమ పెయిడ్ విశ్లేషకుల ద్వారా చర్చా వేదికల్లో ఈ అంశాన్ని పదే పదే లేవనెత్తుతోంది. రాజకీయాల్లో బహిరంగంగా పెట్టుకునే పొత్తుల కంటే, ఇలాంటి మైండ్ గేమ్లు అత్యంత ప్రమాదకరం. ఇటీవలి ఎన్నికల ఓటమితో తాము రాజకీయంగా పూర్తిగా ఒంటరయ్యామనే భయాన్ని కప్పిపుచ్చుకోవడానికి, కేడర్ చేజారిపోకుండా చూసుకోవడానికే వైసీపీ ఈ మైండ్ గేమ్ వ్యూహాన్ని అమలు చేస్తోంది. ఈ నిరంతర దుష్ప్రచారం వెనుక వైసీపీ అధినేత వైఎస్ జగన్ మోహన్ రెడ్డి ఆలోచన చాలా స్పష్టంగా కనిపిస్తోంది. క్షేత్రస్థాయిలో తమ పొలిటికల్ క్యారెక్టర్ పూర్తిగా దెబ్బతిన్నందున, పటిష్టమైన కూటమి బంధంలో ఉన్న బీజేపీని కూడా అదే గాటన కట్టేయాలని వారు చూస్తున్నారు. మేము మునిగినా.. పక్క వాడిని ముంచుతాం అనే చందంగా, తాము అవినీతి కేసుల్లో ఇరుక్కున్నట్లే, కేంద్రంలోని పెద్దలను కూడా ఈ వివాదాల్లోకి లాగడం ద్వారా తమ తప్పులను సమర్థించుకోవాలని చూస్తున్నారు. తద్వారా అధికార కూటమిలో అత్యంత కీలక భాగస్వాములుగా ఉన్న తెలుగుదేశం, జనసేన శ్రేణుల్లో తీవ్ర అయోమయాన్ని, పరస్పర అనుమానాలను సృష్టించవచ్చనేది జగన్ రెడ్డి వేస్తున్న మైండ్ గేమ్ వ్యూహం.
ఎన్డీఏలో చేరుతామని నేరుగా చెప్పుకునే ధైర్యం లేదా?
సొంత గూడు కూలిపోతుంటే.. పక్కవాడి నీడ కోసం ఆరాటపడటం రాజకీయ ఆత్మహత్యకు సమానం. నమ్మిన సిద్ధాంతాన్ని కాలరాస్తే, నమ్ముకున్న జనం వెన్ను చూపడం ఖాయం. వైసీపీ ప్రచారం చేస్తున్నట్లుగా బీజేపీ నిజంగానే ఆ పార్టీకి, జగన్ మోహన్ రెడ్డికి శాశ్వత స్నేహితుడని ఒక్క క్షణం అనుకుందాం. మరి అలాంటప్పుడు బీజేపీతో బహిరంగంగా, నేరుగా పొత్తు పెట్టుకునే ధైర్యం జగన్కు ఉందా? అంటే దానికి కలలో కూడా సాధ్యం కాదు అనే సమాధానమే వస్తుంది. ఒకవేళ పొరపాటునైనా అలాంటి పరిణామం నిజమైతే.. ఆ రోజే వైఎస్ జగన్ రాజకీయ జీవితానికి అధికారికంగా ముగింపు పలకాల్సి వస్తుంది. ఎందుకంటే వైఎస్సార్ కాంగ్రెస్ పార్టీ ఉనికి, దాని బలం పూర్తిగా మతపరమైన, సామాజిక సమీకరణాలపై ఆధారపడి ఉన్న సాంప్రదాయ ఓటు బ్యాంకుపైనే నిలబడ్డాయి. 2014 రాష్ట్ర విభజన తర్వాత మారిన ప్రత్యేక రాజకీయ పరిస్థితుల వల్ల, ఆంధ్రప్రదేశ్లో కాంగ్రెస్ శూన్యమవడంతో.. ముస్లింలు, క్రైస్తవులు, దళితులలోని ఒక పెద్ద వర్గం ఆ పార్టీని వీడి జగన్ వెనుక నడిచారు. అయితే, వారంతా జగన్ రెడ్డికి లేదా వైఎస్ కుటుంబానికి బానిసలు కారు. కేవలం దేశవ్యాప్తంగా మారుతున్న రాజకీయ పరిణామాల తో , రాష్ట్రస్థాయిలో తమ సామాజిక ప్రయోజనాలు, భద్రత కోసమే వైసీపీని ఒక బలమైన ప్రత్యామ్నాయ రక్షణ కవచంగా ఎంచుకున్నారు. ఇప్పుడు గనుక జగన్ తన వ్యక్తిగత స్వార్థం కోసమో, లేదా కేసుల భయం వల్లో నేరుగా బీజేపీ గూటికి చేరితే, ఆ మైనారిటీ, దళిత ఓటు బ్యాంకు అంతా పోలోమని తిరిగి కాంగ్రెస్ వైపు లేదా స్థానికంగా ఉండే ఇతర ప్రత్యామ్నాయాల వైపు మళ్లిపోవడం ఖాయం. ప్రస్తుతం జాతీయ స్థాయిలో కాంగ్రెస్ పుంజుకుంటున్న తరుణంలో, ఏపీలో కూడా మైనారిటీలు తమ పాత గూటికి చేరడానికి సిద్ధంగా ఉన్నారు. ఈ పరమార్థం , ఓటు బ్యాంకు నైజం జగన్ రెడ్డికి చాలా బాగా తెలుసు. అందుకే ఆయన ఎన్నటికీ బీజేపీతో నేరుగా వేదికను పంచుకోలేరు, పొత్తుల ప్రకటనలు చేయలేరు. కానీ, తెరవెనుక మాత్రం మేము లోపాయికారీగా కలిసే ఉన్నాం అనే నకిలీ కలరింగ్ ఇస్తూ, అటు కేంద్ర పెద్దలను ప్రసన్నం చేసుకుంటూ, ఇటు రాష్ట్రంలోని తన కేడర్ను తీవ్ర అయోమయంలోకి నెడుతున్నారు.
కేసుల రక్షణ కోసమే బీజేపీతో చెలగాటం!
తమపై ఉన్న సీబీఐ, ఈడీ అక్రమాస్తుల కేసుల విచారణ నెమ్మదించేలా కేంద్ర పెద్దలను ప్రసన్నం చేసుకోవడం. అధికార యంత్రాంగానికి సంకేతాలు పంపడం. మేము అధికారంలో లేకపోయినా ఢిల్లీలో మా పట్టు తగ్గలేదు అని రాష్ట్ర స్థాయి బ్యూరోక్రసీని భయపెట్టడం. క్యాడర్ పలాయనం ఆపడం. వంటి లక్ష్యాలతో ఈ తప్పుడు అక్రమ సంబంధాలను ప్రచారంచేసుకుంటున్నారు. ఈ కారణాలతోనే బీజేపీ శీలాన్ని అందరూ శంకించేలా వైసీపీ ప్రచారం చేస్తోంది. ఈ వ్యూహాత్మక ప్రచారం వల్ల ఇప్పుడు అసలైన సంక్షోభంలో పడింది వైఎస్సార్ కాంగ్రెస్ పార్టీ కాదు.. భారతీయ జనతా పార్టీ! వైసీపీ చేస్తున్న ఈ అక్రమ సంబంధ ప్రచారాల వల్ల ఢిల్లీలోని బీజేపీ నాయకత్వంపై ఏపీ ప్రజల్లో నమ్మకం సడలే ప్రమాదం ఉంది. తాము రాష్ట్రంలో చంద్రబాబు నాయుడు, పవన్ కళ్యాణ్లతో కలిసి అధికారంలో ఉన్నప్పటికీ, తెరవెనుక జగన్తో దోస్తీ చేస్తున్నారనే నెగెటివ్ ఇంప్రెషన్ పబ్లిక్లోకి వెళ్తే అది బీజేపీ ప్రతిష్టకు తీవ్ర భంగం కలిగిస్తుంది. కాబట్టి, ఇప్పుడు తనకు వైసీపీతో ఎలాంటి అక్రమ రాజకీయ సంబంధం లేదని నిరూపించాల్సిన బాధ్యత పూర్తిగా బీజేపీపైనే ఉంది. మాటలతో ప్రకటనలు గుప్పించడం వల్ల ఈ అనుమానాలు పటాపంచలు కావు. ఇందుకు బీజేపీ ముందున్న ఒకే ఒక్క మార్గం - చట్టపరమైన కఠిన చర్యలు!. గత 12 ఏళ్లుగా సాగుతున్న జగన్ మోహన్ రెడ్డి అక్రమాస్తుల కేసుల విచారణను వేగవంతం చేయాలి. ప్రతి వారం కోర్టు హాజరు నుంచి మినహాయింపులు పొందుతూ విచారణను పొడిగిస్తున్న తీరుకు అడ్డుకట్ట వేయాలి. చట్టం తన పని తాను వేగంగా చేసుకుంటూ పోతేనే కేంద్ర ప్రభుత్వంపై ప్రజల్లో విశ్వసనీయత పెరుగుతుంది. మాజీ మంత్రి వైఎస్ వివేకానంద రెడ్డి హత్య కేసు విచారణను సీబీఐ ఎన్నాళ్లు సాగదీస్తుంది? ఈ కేసులో కేవలం కింది స్థాయి నిందితులను మాత్రమే కాకుండా, దీని వెనుక ఉన్న అసలు రాజకీయ సూత్రధారులు, లబ్ధిదారులు ఎవరో తేల్చి వారిని జైలుకు పంపాల్సిన బాధ్యత కేంద్ర దర్యాప్తు సంస్థలపై ఉంది. ఈ కేసు తేలితేనే క్లీన్ పాలిటిక్స్ సాధ్యమవుతాయి.
బీజేపీతోనే మైండ్ గేమ్సా?
ఐదేళ్ల వైసీపీ పాలనలో జరిగిన మద్యం వ్యాపారంలో వేల కోట్ల రూపాయల నగదు లూటీ జరిగిందని, డిజిటల్ పేమెంట్లు లేకుండా కేవలం క్యాష్ రూపంలోనే లావాదేవీలు నడిపించారనే ఆరోపణలు ఉన్నాయి. ఢిల్లీ లిక్కర్ స్కామ్ తరహాలోనే ఏపీ లిక్కర్ స్కాంపై ఈడీ పూర్తిస్థాయి విచారణ జరిపి, ఆ అక్రమ సొమ్ము ఎక్కడికి చేరిందో బహిర్గతం చేయాలి. రాజకీయాల్లో తాత్కాలిక ప్రయోజనాల కోసం అబద్ధాలను, అక్రమ సంబంధాల సిద్ధాంతాలను ప్రచారం చేసుకోవడం తాత్కాలికంగా లబ్ధి చేకూర్చవచ్చు కానీ, అది దీర్ఘకాలంలో వినాశనానికి దారితీస్తుంది. వైఎస్ జగన్ మోహన్ రెడ్డి అనుసరిస్తున్న ఈ మైండ్ గేమ్ ఒకరకంగా గోతిలో పడ్డవాడు పక్కనున్న వాడిని లాగినట్లు ఉంది. తమపై ఉన్న అవినీతి ముద్రను పోగొట్టుకోలేక, పక్కనే ఉన్న జాతీయ పార్టీకి కూడా ఆ ముద్ర వేయాలని చూడటం రాజకీయ దివాళాకోరతనమే అవుతుంది. బీజేపీ నాయకత్వం ఇప్పటికైనా ఏపీ ప్రజల మనోభావాలను గుర్తించాలి. అవినీతిపై జీరో టాలరెన్స్ అని నినదించే ప్రధాని మోదీ, నిజంగానే ఏపీలో జరిగిన దోపిడీపై చట్టపరమైన చర్యలు తీసుకున్నప్పుడే ఈ రాజకీయ గాసిప్స్కు శాశ్వతంగా తెరపడుతుంది. లేనిపక్షంలో, ఈ అక్రమ సంబంధ ప్రచారాలను ప్రజలు నిజమని నమ్మితే, అది కూటమి భవిష్యత్తుకే కాకుండా, రాష్ట్ర ప్రయోజనాలకు కూడా తీవ్ర విఘాతం కలిగిస్తుంది. రాజకీయం అనేది ప్రజల నమ్మకంపై నడవాలి తప్ప, ఇలాంటి తెరవెనుక గాసిప్స్పై కాదనే విషయాన్ని నాయకులు ఎంత త్వరగా గుర్తిస్తే అంత మంచిది.
రాజకీయాల్లో ఉండేది ఆత్మహత్యలే !
రాజకీయాల్లో హత్యలుండవు.. కేవలం ఆత్మహత్యలే ఉంటాయి. ఒక తప్పుడు వ్యూహం శత్రువుకు బలాన్ని ఇస్తే.. ఒక వికృత ప్రచారం సొంత గూటినే బూడిద చేస్తుంది.ఆంధ్రప్రదేశ్ రాజకీయ చరిత్రలో ఎందరో దిగ్గజాలు కాలగర్భంలో కలిసిపోవడానికి శత్రువుల వ్యూహాల కంటే, వారి సొంత తప్పుడు నిర్ణయాలే ప్రధాన కారణమయ్యాయి. ఇప్పుడు వైఎస్సార్ కాంగ్రెస్ పార్టీ కూడా సరిగ్గా అదే రాజకీయ ఆత్మహత్య దిశగా వేగంగా అడుగులు వేస్తోంది. ఇప్పుడు బంతి పూర్తిగా భారతీయ జనతా పార్టీ కోర్టులోనే ఉంది. వైసీపీ సృష్టిస్తున్న ఈ అక్రమ సంబంధాల మకిలి తనపై పడకుండా చూసుకోవాల్సిన బాధ్యత ఢిల్లీ పెద్దలపైనే ఉంది. మాటల సరిహద్దులు దాటి.. జగన్ మోహన్ రెడ్డి అక్రమాస్తుల కేసులు, బాబాయ్ హత్య కేసు విచారణ, ఏపీ లిక్కర్ స్కామ్ దోపిడీలపై కేంద్ర దర్యాప్తు సంస్థలు చట్టపరమైన కఠిన చర్యలు తీసుకున్నప్పుడే బీజేపీ తన రాజకీయ శీలాన్ని నిరూపించుకున్నట్లవుతుంది. అలా కాకుండా ఈ సాగతీత దోస్తీ ఇలాగే కొనసాగితే, ప్రజల దృష్టిలో ఆ ప్రచారం నిజమేననే ముద్ర పడే ప్రమాదం ఉంది. ఏదేమైనా, అబద్ధాన్ని నమ్ముకుని రాజకీయం చేసే కాలం ముగిసింది. ఇప్పటికైనా వైసీపీ ఈ 'ఫేక్ ఊహాలోకం' నుంచి బయటకు రాకపోతే.. శత్రువుల అవసరం లేకుండానే, తమ సొంత ప్రచారాల వలలో చిక్కుకుని వైసీపీ చరిత్రలోనే ఒక అతిపెద్ద రాజకీయ ఆత్మహత్య కు సజీవ సాక్ష్యంగా మిగిలిపోవడం చారిత్రక సత్యం!