హైదరాబాద్ మహానగరంలో ఆకాశాన్నంటేలా వెలుస్తున్న హైరైజ్ అపార్ట్‌మెంట్లు ఇప్పుడు నివాసితులలో ఒక రకమైన భయాందోళనలను రేకెత్తిస్తున్నాయి. ఇటీవల కూకట్‌పల్లిలోని లోధా అపార్ట్‌మెంట్స్, వనస్థలిపురంలోని ట్రైడెంట్ నమిశ్రీ, కొల్లూర్‌లోని సిగ్నేచర్ ఆల్టియస్ వంటి ప్రతిష్టాత్మక గేటెడ్ కమ్యూనిటీలలో జరిగిన వరుస అగ్నిప్రమాదాలు నగరంలో హైరైజ్ భద్రతపై పెద్ద ఎత్తున చర్చకు దారితీశాయి.

ముఖ్యంగా, వందలాది కుటుంబాలు నివసించే ఒక టవర్‌లోని పై అంతస్తుల్లో లేదా ఏదైనా ఒక నిర్దిష్ట ఫ్లాట్‌లో అగ్నిప్రమాదం సంభవిస్తే, మిగిలిన ఫ్లాట్ల పరిస్థితి ఏమిటనేది ఇప్పుడు సర్వత్రా వ్యక్తమవుతున్న అతిపెద్ద ప్రశ్న.

సాధారణంగా ఆధునిక హైరైజ్ బిల్డింగులను ఫైర్ రేటెడ్ కాంక్రీట్ , నిర్మాణ సామాగ్రితో నిర్మిస్తారు. దీనివల్ల ఒక ఫ్లాట్‌లో మంటలు చెలరేగితే, అవి పక్క ఫ్లాట్‌కు లేదా పై అంతస్తుకు వెంటనే వ్యాపించకుండా కొంత సమయం పాటు అడ్డుకునే వీలుంటుంది. అయితే, ప్రమాదం జరిగిన ఫ్లాట్ నుండి వెలువడే దట్టమైన పొగ, విషవాయువులు సెంట్రల్ డక్ట్‌లు, లిఫ్ట్ షాఫ్ట్‌లు , కిటికీల ద్వారా క్షణాల మీద ఇతర ఫ్లాట్లకు విస్తరిస్తాయి. అగ్నిప్రమాదాల్లో మంటల కంటే ఈ పొగ వల్లే ఊపిరాడక ఎక్కువ మంది ప్రాణాలు కోల్పోయే ప్రమాదం ఉందని నిపుణులు హెచ్చరిస్తున్నారు.

ఒకవేళ టవర్‌లోని పై అంతస్తుల్లో ప్రమాదం జరిగితే, కింద ఉన్న ఫ్లాట్ల నివాసితులు సురక్షితంగా బయటపడటానికి అవకాశం ఎక్కువ ఉంటుంది కానీ, అదే అంతస్తులో లేదా అంతకంటే పై అంతస్తుల్లో ఉన్నవారి పరిస్థితి అత్యంత ప్రమాదకరంగా మారుతుంది. ఆధునిక నిబంధనల ప్రకారం ప్రతి హైరైజ్ బిల్డింగ్‌లో ఫైర్ స్ప్రింక్లర్లు, స్మోక్ డిటెక్టర్లు, ప్రతి కొన్ని అంతస్తులకు ఒక సురక్షిత ప్రాంతం ఉండాలి. కానీ, ఇటీవల జరిగిన ప్రమాదాలలో చాలా చోట్ల అంతర్గత ఫైర్ ఫైటింగ్ సిస్టమ్స్ సరిగ్గా పనిచేయకపోవడం, లేదా నివాసితులకు వాటిని ఎలా ఆపరేట్ చేయాలో తెలియకపోవడం వల్ల చిన్న ప్రమాదాలు కూడా పెద్దవిగా మారుతున్నాయి.