ఈ ఘటనలను తీవ్రంగా పరిగణించిన గ్రేటర్ హైదరాబాద్ మున్సిపల్ కార్పొరేషన్ , తెలంగాణ రాష్ట్ర విపత్తు స్పందన, అగ్నిమాపక సేవల విభాగం సంయుక్తంగా రంగంలోకి దిగుతున్నాయి. నగరంలోని ప్రైవేట్, కమర్షియల్ మరియు రెసిడెన్షియల్ ఆకాశహర్మ్యాలలో అగ్నిమాపక రక్షణ నిబంధనలు సరిగ్గా అమలు జరుగుతున్నాయో లేదో తేల్చేందుకు విస్తృతస్థాయిలో ఆకస్మిక తనిఖీలు నిర్వహించేందుకు అధికారులు కసరత్తు పూర్తి చేశారు.

ఈ ఆకస్మిక తనిఖీలలో ప్రధానంగా భవనాలకు సంబంధించిన ఫైర్ నో ఆబ్జెక్షన్ సర్టిఫికేట్, ఆక్యుపెన్సీ సర్టిఫికేట్ ల చెల్లుబాటును పరిశీలించనున్నారు. అంతేకాకుండా, ప్రమాదం జరిగినప్పుడు తక్షణమే స్పందించాల్సిన ఆటోమేటిక్ ఫైర్ స్ప్రింక్లర్లు, స్మోక్ డిటెక్టర్లు, ఫైర్ హోస్ రీల్స్, అత్యవసర పంపులు సరైన కండిషన్‌లో పనిచేస్తున్నాయా లేదా అని గ్రౌండ్ లెవెల్‌లో చెక్ చేయనున్నారు. నిబంధనల ప్రకారం ఫైర్ సేఫ్టీ సిస్టమ్స్‌ను సక్రమంగా నిర్వహించని భవనాల యజమానులు మరియు రెసిడెంట్ వెల్ఫేర్ అసోసియేషన్ల కు తక్షణమే నోటీసులు జారీ చేయాలని యోచిస్తున్నారు.

అన్నింటికంటే ముఖ్యంగా, అత్యవసర సమయంలో ప్రజల ప్రాణాలు కాపాడేందుకు కేటాయించిన రెఫ్యూజ్ ఏరియా ల వినియోగంపై అధికారులు కఠినమైన దృష్టి సారించనున్నారు. జాతీయ భవన నిర్మాణ నిబంధనల ప్రకారం ప్రతి కొన్ని అంతస్తుల మధ్య ఖాళీగా ఉంచాల్సిన ఈ స్థలాలను.. అనేక భవనాల్లో క్లబ్ హౌస్‌లుగా, వినోద కేంద్రాలుగా లేదా ఆఫీస్ స్పేస్‌లుగా నిబంధనలకు విరుద్ధంగా మార్చేశారనే ఆరోపణలు ఉన్నాయి. ఇటువంటి అక్రమ రూపాంతరాలను గుర్తిస్తే, వాటిని వెంటనే స్వాధీనం చేసుకోవడంతో పాటు బాధ్యులపై కఠిన చర్యలు తీసుకోవడానికి ఫైర్ ఆఫీసర్లు సిద్ధమవుతున్నారు.

ఈ విస్తృత తనిఖీల ద్వారా కేవలం జరిమానాలు విధించడమే కాకుండా, హైరైజ్ అపార్ట్‌మెంట్ నివాసితులలో భద్రతా స్పృహను పెంపొందించడం కూడా అధికారుల ముఖ్య ఉద్దేశం. అగ్నిప్రమాదం సంభవించినప్పుడు మెట్ల మార్గాలు పొగతో నిండిపోకుండా ఉంచడం, కనీసం ఏటా ఒకసారైనా మాక్ డ్రిల్స్ నిర్వహించడం వంటి అంశాలపై అవగాహన కల్పించనున్నారు. చట్టపరమైన అనుమతులు పొందడంతో సరిపెట్టుకోకుండా, భద్రతా వ్యవస్థలను ఎప్పటికప్పుడు ఆడిట్ చేసుకుంటేనే ఆకాశహర్మ్యాలలో నివాసం సురక్షితంగా ఉంటుందని అధికారులు స్పష్టం చేస్తున్నారు.