టెస్లా సంస్థ భారతదేశంలో గిగాఫ్యాక్టరీ నిర్మించడం లేదని అధికారికంగా స్పష్టం చేసింది. గత కొన్ని సంవత్సరాలుగా టెస్లా భారత్‌లోకి వస్తుందని, బిలియన్ల డాలర్ల పెట్టుబడులు పెడుతుందని పెద్ద ఎత్తున ప్రచారం సాగినప్పటికీ, అంతిమంగా ఎలోన్ మస్క్ నేతృత్వంలోని టెస్లా యాజమాన్యం ఈ నిర్ణయం నుంచి వెనక్కి తగ్గింది.

ప్లాంట్ ఏర్పాటు కోసం భారత ప్రభుత్వంతో జరిపిన సుదీర్ఘ చర్చలు ఆశించిన ఫలితాన్ని ఇవ్వకపోవడంతోనే టెస్లా ఈ వ్యూహాత్మక వెనకడుగు వేసింది.

టెస్లా ఈ నిర్ణయాన్ని తీసుకోవడానికి ప్రధాన కారణం దిగుమతి సుంకాలు, స్థానిక అమ్మకాలపై రెండు వర్గాల మధ్య కుదరని సయోధ్య. భారత ప్రభుత్వం దేశీయ తయారీని ప్రోత్సహించేందుకు విదేశాల నుంచి వచ్చే కార్లపై భారీగా సుంకాలు విధిస్తోంది. అయితే, టెస్లా మొదట విదేశాల నుంచి తమ కార్లను తక్కువ పన్నులతో భారత్‌కు దిగుమతి చేసుకుని, ఇక్కడి మార్కెట్లో డిమాండ్‌ను పరీక్షించిన తర్వాతే ప్లాంట్ నిర్మిస్తామని పట్టుబట్టింది. దీనికి భారత ప్రభుత్వం నిరాకరిస్తూ.. ముందుగా ప్లాంట్ నిర్మించి, స్థానికంగా ఉత్పత్తి ప్రారంభిస్తేనే రాయితీలు ఇస్తామని స్పష్టం చేయడంతో డీల్ ముందుకు సాగలేదు.

మరో ప్రధాన కారణం ఏమిటంటే.. ప్రస్తుత అంతర్జాతీయ ఆటోమొబైల్ మార్కెట్లో ఎలక్ట్రిక్ వాహనాల అమ్మకాల వృద్ధి రేటు ప్రపంచవ్యాప్తంగా కొంత నెమ్మదించింది. చైనాకు చెందిన బీవైడీ వంటి చౌక ఈవీ కార్ల నుంచి టెస్లా తీవ్రమైన పోటీని ఎదుర్కొంటోంది. దీంతో టెస్లా అంతర్గతంగా ఖర్చులను తగ్గించుకోవడం, ఇప్పటికే ఉన్న ఫ్యాక్టరీల సామర్థ్యాన్ని పెంచుకోవడంపైనే దృష్టి పెట్టింది. కొత్తగా భారతదేశం వంటి అభివృద్ధి చెందుతున్న మార్కెట్లో భారీ పెట్టుబడితో సరికొత్త ప్లాంట్‌ను నిర్మించడం ప్రస్తుత పరిస్థితుల్లో ఆర్థికంగా లాభదాయకం కాదని టెస్లా బోర్డు భావించింది.