ఐపీఎల్ సృష్టికర్త లలిత్ మోదీ చేసిన ప్రతిపాదన ఇప్పుడు క్రికెట్ ప్రపంచంలో పెను సంచలనంగా మారింది. ఐపీఎల్‌ను కేవలం రెండు నెలల టోర్నీగా కాకుండా, ఫుట్‌బాల్ లీగ్‌ల తరహాలో ఏడాదిలో మెజారిటీ కాలం నిర్వహించాలని ఆయన ప్రతిపాదిస్తున్నారు.

లలిత్ మోదీ ప్రతిపాదన ప్రకారం.. ఐపీఎల్ ఇకపై ఏటా నవంబర్‌లో ప్రారంభమై సుమారు 6 నుండి 7 నెలల పాటు సాగాలి. ప్రస్తుతం ఉన్న 74 మ్యాచ్‌ల సంఖ్యను 94 మ్యాచ్‌లకు పెంచి, ప్రతి జట్టు ఇతర జట్లతో హోమ్ అండ్ అవే సొంత గడ్డపై ఒకటి, ప్రత్యర్థి గడ్డపై ఒకటి పద్ధతిలో తలపడాలి. వారాంతాల్లో మాత్రమే మ్యాచ్‌లు నిర్వహించాలన్నది ఆయన ప్రతిపాదనల్లో కీలక అంశం.

ఫుట్‌బాల్ తరహా మోడల్

క్రికెట్ ప్రపంచంలో ద్వైపాక్షిక సిరీస్‌ల కంటే లీగ్ క్రికెట్‌కే భవిష్యత్తు ఉంటుందని లలిత్ మోదీ నమ్ముతున్నారు. ఫుట్‌బాల్‌లో క్లబ్ మ్యాచులు జరుగుతున్నప్పుడు అంతర్జాతీయ మ్యాచ్‌ల కోసం చిన్న విరామం ఇచ్చినట్లుగా, ఐపీఎల్ జరుగుతున్నప్పుడు కూడా అవసరమైతే మధ్యలో విరామం ఇచ్చి ద్వైపాక్షిక మ్యాచ్‌లు నిర్వహించుకోవచ్చని ఆయన సూచించారు. దీనివల్ల ఐపీఎల్ బ్రాండ్ వాల్యూ విపరీతంగా పెరుగుతుందని ఆయన అంచనా.

బీసీసీఐ ఆలోచనలకు తగ్గట్టుగానే..

ఆసక్తికరమైన విషయం ఏమిటంటే, బీసీసీఐ కూడా రాబోయే కాలంలో ముఖ్యంగా 2028 నుండి మ్యాచ్‌ల సంఖ్యను 94కి పెంచాలని ఇప్పటికే ప్రాథమికంగా యోచిస్తోంది. ఐపీఎల్ ఛైర్మన్ అరుణ్ ధుమాల్ కూడా గతంలో ఇలాంటి సంకేతాలే ఇచ్చారు. ప్రస్తుతమున్న వర్చువల్ గ్రూప్ విధానం వల్ల అభిమానుల్లో కొంత అయోమయం నెలకొంటోందని, ప్యూర్ లీగ్ ఫార్మాట్ అంటే అందరూ అందరితో రెండు సార్లు ఆడటం ఉంటేనే ఆదాయం, ఆసక్తి పెరుగుతాయని బోర్డు పెద్దలు భావిస్తున్నారు.

సవాళ్లు - విమర్శలు

మోదీ ప్రతిపాదన బాగున్నప్పటికీ, దీనివల్ల అంతర్జాతీయ క్రికెట్ అస్తిత్వం ప్రమాదంలో పడుతుందనే ఆందోళన వ్యక్తమవుతోంది. ఒకవేళ ఐపీఎల్ 6 నెలల పాటు సాగితే, ప్రపంచంలోని టాప్ ప్లేయర్లు తమ దేశాల తరపున ఆడేందుకు సమయం దొరకదు. ఇది టెస్ట్ క్రికెట్, ఇతర చిన్న దేశాల క్రికెట్ బోర్డుల మనుగడను దెబ్బతీస్తుందని విశ్లేషకులు హెచ్చరిస్తున్నారు. కేవలం డబ్బు కోసమే క్రికెట్‌ను ఒక వినోద సాధనంగా మార్చేస్తున్నారనే విమర్శలు కూడా వస్తున్నాయి.