ఆంధ్రప్రదేశ్ రాజకీయాల్లో అధికార వైఎస్సార్ కాంగ్రెస్ పార్టీ, కాంగ్రెస్ పార్టీల మధ్య ఆపరేషన్ ఆకర్ష్ ఊపందుకుంది. జగన్, షర్మిల ఒకరి పార్టీ నుంచి మరొకరు నాయకులను లాక్కునేందుకు పక్కా ప్లాన్తో అడుగులు వేస్తున్నారు.
ఇటీవల రేపల్లె నియోజకవర్గానికి చెందిన కీలక కాంగ్రెస్ నేతకు వైసీపీ అధినేత వైఎస్ జగన్ స్వయంగా కండువా కప్పి తమ పార్టీలోకి ఆహ్వానించగా, దానికి కౌంటర్గా ఏపీ కాంగ్రెస్ అధ్యక్షురాలు వైఎస్ షర్మిల వైసీపీ నేతలను కాంగ్రెస్ వైపు తిప్పుకుంటూ చెక్ పెడుతున్నారు.
రేపల్లె నియోజకవర్గంలో కాంగ్రెస్ బలోపేతానికి కృషి చేస్తున్న ముఖ్య నేతను వైఎస్ జగన్ రెడ్డి తన క్యాంప్ ఆఫీసుకు పిలిపించుకుని, వైఎస్సార్ సీపీ కండువా కప్పి పార్టీలో చేర్చుకున్నారు. రేపల్లెలో కాంగ్రెస్ క్యాడర్ను దెబ్బతీయడం ద్వారా షర్మిల వేగానికి బ్రేకులు వేయవచ్చని వైసీపీ భావించింది. ఈ చేరిక ద్వారా క్షేత్రస్థాయిలో కాంగ్రెస్ ఉనికిని తగ్గించాలనే వ్యూహాన్ని జగన్ అమలు చేశారు.
అయితే, అన్న వేసిన ఈ వ్యూహాత్మక అడుగుకు చెక్ పెట్టేందుకు వైఎస్ షర్మిల ఏమాత్రం ఆలస్యం చేయలేదు. రేపల్లెలో కాంగ్రెస్ నేతను చేర్చుకున్నందుకు పోటీగా.. విజయవాడలోని ఆంధ్ర రత్న భవన్లో వైసీపీకి చెందిన బలమైన సామాజిక వర్గ నేతలను, మాజీ ప్రజాప్రతినిధులను పెద్ద ఎత్తున కాంగ్రెస్లో చేర్చుకున్నారు. మంగళగిరి హనుమంతరావు లాంటి వైసీపీ కీలక నేతలకు కాంగ్రెస్ కండువా కప్పి, జగన్ రెడ్డి పార్టీకి గట్టి షాక్ ఇచ్చారు. వైసీపీలో అసంతృప్తితో ఉన్న నేతలకు కాంగ్రెస్ కండువాలు కప్పుతూ.. నువ్వు ఒకటి తీస్తే.. నేను రెండు తీస్తా అన్నట్లుగా షర్మిల దూకుడు ప్రదర్శిస్తున్నారు.
ఒకవైపు వైఎస్సార్ వారసత్వాన్ని తానేనని చెప్పుకుంటూ జగన్ ఓటు బ్యాంక్ను దెబ్బతీయడానికి షర్మిల ప్రయత్నిస్తుంటే, మరోవైపు కాంగ్రెస్ పుంజుకోకుండా ఉండేందుకు జగన్ రెడ్డి గట్టి ప్రయత్నాలు చేస్తున్నారు. ఈ పొలిటికల్ వార్లో రాబోయే రోజుల్లో ఏపీ వ్యాప్తంగా మరిన్ని నియోజకవర్గాల్లో ఇరు పార్టీల మధ్య ఈ తరహా వలసల యుద్ధం మరింత ముదిరే అవకాశం ఉంది. కాంగ్రెస్ పుంజుకుంటుందన్న నమ్మకంతో ఎక్కువ మంది వైసీపీ నేతలు కాంగ్రెస్ వైపు చూస్తున్నారు.