తమిళనాడు అసెంబ్లీ ఎన్నికల్లో విజయ్ నేతృత్వంలోని తమిళగ వెట్రి కళగం 108 స్థానాలతో అతిపెద్ద పార్టీగా అవతరించినప్పటికీ, ప్రభుత్వ ఏర్పాటుకు అవసరమైన 118 మెజారిటీ మార్కుకు స్వల్ప దూరంలో నిలిచింది.

కాంగ్రెస్ పార్టీ మద్దతు ఇచ్చినా ఆ సంఖ్య 112 దగ్గరే ఆగిపోయింది. అయినా గవర్నర్ వద్దకు వెళ్లి ప్రమాణ స్వీకారం చేయించాలని కోరారు.అయితే గవర్నర్ మాత్రం.. పూర్తి మెజార్టీ మార్క్ తో రావాలని చెప్పినట్లుగా తెలుస్తోంది. అలా రావడమే విజయ్ నైతికతకు కూడా కరెక్ట్.

ప్రజా తీర్పుకు గౌరవం - అతిపెద్ద పార్టీగా గుర్తింపు

దశాబ్దాల కాలంగా ద్రావిడ పార్టీల గుత్తాధిపత్యంలో ఉన్న తమిళనాట, తొలి ప్రయత్నంలోనే 108 సీట్లు సాధించడం విజయ్ పట్ల ప్రజలకు ఉన్న ఆదరణకు నిదర్శనం. ప్రజలు మార్పును కోరుకుంటూ టీవీకేను సింగిల్ లార్జెస్ట్ పార్టీగా నిలబెట్టారు. అయితే, ప్రజాస్వామ్యంలో కేవలం ఆదరణ సరిపోదు, సాంకేతికపరమైన మెజారిటీ కూడా తప్పనిసరి. అందుకే, ఇతర పార్టీల మద్దతు కూడగట్టి, రాజ్యాంగబద్ధంగా 118 మంది ఎమ్మెల్యేల బలంతో అధికార పీఠాన్ని అధిరోహించినప్పుడే ఆ తీర్పుకు సంపూర్ణ గౌరవం లభిస్తుంది.

కాంగ్రెస్ తప్ప ముందుకు రాని మరో పార్టీ

ప్రస్తుతం కాంగ్రెస్‌కు చెందిన ఐదుగురు ఎమ్మెల్యేలు విజయ్‌కు మద్దతు ప్రకటించడం ఆయనకు పెద్ద ఊరటనిచ్చింది. రెండు దశాబ్దాల పాటు డీఎంకేతో ఉన్న బంధాన్ని తెంచుకుని కాంగ్రెస్ టీవీకే వైపు రావడం, విజయ్ నాయకత్వంపై ఉన్న నమ్మకాన్ని సూచిస్తోంది. అయితే, కేవలం 112 మందితో ప్రమాణ స్వీకారానికి వెళ్లడం కంటే, స్వతంత్రులు లేదా ఇతర చిన్న పార్టీల మద్దతుతో మ్యాజిక్ ఫిగర్‌ను దాటి గవర్నర్ ముందుకు వెళ్లడం వల్ల ప్రభుత్వానికి స్థిరత్వం, విజయ్‌కు నైతిక బలం లభిస్తాయి.

అధికారం చేపట్టాక ఆకర్ష్ ప్రయోగించడం నైతికత కాదు!

గతంలో అనేక రాష్ట్రాల్లో అతిపెద్ద పార్టీగా అవతరించిన వారు మెజారిటీ లేకపోయినా ప్రమాణ స్వీకారం చేసి, ఆ తర్వాత బలపరీక్షలో విఫలమైన సందర్భాలు ఉన్నాయి. అటువంటి అస్థిరతకు తావు లేకుండా, ముందే స్పష్టమైన మెజారిటీని చూపించడం ద్వారా విజయ్ తన రాజకీయ పరిణతిని చాటుకోవచ్చు. రాజ్యాంగ నైతికత ప్రకారం, సభలో విశ్వాసం ఉన్న వ్యక్తి మాత్రమే ముఖ్యమంత్రిగా ఉండాలి. అందుకే, మెజారిటీని ముందే ఖరారు చేసుకుని సగర్వంగా అసెంబ్లీలోకి అడుగుపెట్టడమే విజయ్ కు మంచిది.