వైసీపీ మహిళా నేత విడదల రజని ఆదివారం పల్నాడు జిల్లా నరసరావుపేట డీఎస్పీ కార్యాలయంలో తన పాస్‌పోర్ట్‌ను అధికారులకు అప్పగించారు. హైకోర్టు జారీ చేసిన స్పష్టమైన ఉత్తర్వుల మేరకే ఆమె డీఎస్పీ హనుమంతరావును కలిసి అధికారికంగా పాస్‌పోర్ట్‌ను సరెండర్ చేయాల్సి వచ్చింది.

గతంలో చిలకలూరిపేట పట్టణానికి చెందిన తెలుగుదేశం పార్టీ నేత పిల్లి కోటిని అధికారంలో ఉన్నప్పుడు పోలీసులతో హింసించారు. పోలీసులు కోటిని కొట్టడాన్ని ఆమె స్వయంగా వీడియోకాల్‌లో చూశారని కోటి ఫిర్యాదుచేశారు. ఈ ఫిర్యాదుతో పోలీస్ స్టేషన్‌లో విడదల రజనితో పాటు ఆమె అనుచరులు మరికొందరిపై కేసు నమోదు చేశారు. పోలీసులు ఆమెపై ఎస్సీ, ఎస్టీ అట్రాసిటీ చట్టం కింద కేసు నమోదు చేయడంతో అరెస్టు చేయకుండా కోర్టుకు వెళ్లారు.

ఈ కేసు విచారణ వేగవంతం కావడంతో, అరెస్ట్ భయంతో ఆమె చట్టపరమైన రక్షణ కోసం న్యాయస్థానాన్ని ఆశ్రయించారు. ఈ అట్రాసిటీ కేసులో ముందస్తు బెయిల్ లేదా కఠిన చర్యల నుండి మినహాయింపు కోరుతూ విడదల రజని దాఖలు చేసిన పిటిషన్‌పై విచారణ జరిపిన ఏపీ హైకోర్టు షరతులతో కూడిన ఆదేశాలను జారీ చేసింది. నిందితురాలు కేసు దర్యాప్తు సంస్థలకు అందుబాటులో ఉండాలని, విచారణ నుంచి తప్పించుకోవడానికి విదేశాలకు పారిపోయే అవకాశం లేకుండా ఉండేందుకు తక్షణమే తన పాస్‌పోర్ట్‌ను స్థానిక పోలీసు అధికారుల వద్ద డిపాజిట్ చేయాలని న్యాయస్థానం గట్టి నిబంధన విధించింది.