నియోజకవర్గంలోని వితంతువులు, ఒంటరి మహిళలకు అండగా నిలవాలనే ఉద్దేశంతో ఆయన ఈ పండుగ వేళ వారికి ఆత్మీయ భరోసా కల్పించారు. ప్రభుత్వ రికార్డుల ప్రకారం పింఛన్లు పొందుతున్న 45 ఏళ్ల లోపు వయసు కలిగిన 2,439 మంది అర్హులైన మహిళలను ఎంపిక చేసి, వారికి ప్రత్యేకంగా పట్టు , నూలు చీరలను రాఖీ కానుకగా పంపిణీ చేశారు.

ఈ పంపిణీ కార్యక్రమం గొల్లప్రోలు మున్సిపల్ కార్యాలయ ప్రాంగణంలో అత్యంత వైభవంగా, పండుగ వాతావరణంలో జరిగింది. గొల్లప్రోలు పురపాలిక కమిషనర్ ఆధ్వర్యంలో స్థానిక జనసేన పార్టీ నాయకులు, ప్రభుత్వ అధికారులు సంయుక్తంగా ఈ కార్యక్రమంలో పాల్గొన్నారు. అర్హులైన ప్రతి ఒక్క మహిళకూ ఆత్మీయంగా చీరలను అందజేసి, పవన్ కళ్యాణ్ తరఫున రాఖీ పౌర్ణమి శుభాకాంక్షలు తెలియజేశారు.

సమాజంలో పలు కారణాల వల్ల ఆత్మీయ భరోసా కరవై, ఆర్థికంగా , మానసికంగా ఇబ్బందులు ఎదుర్కొంటున్న ఒంటరి మహిళల జీవితాల్లో వెలుగులు నింపాలనే లక్ష్యంతోనే ఉప ముఖ్యమంత్రి ఈ నిర్ణయం తీసుకున్నట్లు జనసైనికులు తెలిపారు. కేవలం ఒక నాయకుడిగానే కాకుండా ఒక సొంత అన్నగా, తమ్ముడిగా నియోజకవర్గ ఆడపడుచులకు అండగా ఉంటానని పవన్ కళ్యాణ్ ఈ రూపంలో నిరూపించుకున్నారని హర్షం వ్యక్తం చేశారు. అత్యంత గౌరవప్రదమైన వాతావరణంలో ఈ కార్యక్రమాన్ని నిర్వహించారు.

తమ నియోజకవర్గ ఎమ్మెల్యే, డిప్యూటీ సీఎం హోదాలో ఉన్న పవన్ కళ్యాణ్ తమను ప్రత్యేకంగా గుర్తుపెట్టుకుని పండుగ వేళ ఇలాంటి ఆత్మీయ కానుకను పంపడం పట్ల లబ్ధిదారులు ఆనందం వ్యక్తం చేస్తున్నారు. సమాజంలో వెనుకబడిన, ఒంటరి మహిళలకు ఆత్మీయతను, గౌరవాన్ని ఇచ్చేలా చేపట్టిన ఈ పంపిణీ కార్యక్రమం స్థానికంగా తీవ్ర ప్రభావం చూపడమే కాకుండా, ప్రజాప్రతినిధుల బాధ్యతకు నిదర్శనంగా నిలిచింది.