తనపై నమోదైన కేసులో పోటెన్సీ టెస్ట్ నిర్వహించాలంటూ కింది కోర్టు ఇచ్చిన ఉత్తర్వులను సవాలు చేస్తూ ఆయన హైకోర్టును ఆశ్రయించారు. ఈ పిటిషన్‌పై ఇరుపక్షాల వాదనలు విన్న న్యాయస్థానం తదుపరి విచారణను వాయిదా వేస్తూ.. ఈ అంశంపై మంగళవారం తమ నిర్ణయాన్ని వెల్లడిస్తామని స్పష్టం చేసింది.

విచారణ సందర్భంగా ఉదయ్ కృష్ణా రెడ్డి తరఫు న్యాయవాది హైకోర్టులో కీలక వాదనలు వినిపించారు. ఎఫ్ఐఆర్‌లో పోలీసులు నమోదు చేసిన సెక్షన్ల ప్రకారం నిందితుడికి పోటెన్సీ పరీక్షలు నిర్వహించే చట్టపరమైన అధికారం దర్యాప్తు సంస్థకు లేదని వాదించారు. నిబంధనలకు విరుద్ధంగా కింది కోర్టు ఈ పరీక్షకు అనుమతి ఇచ్చిందని, ఆ ఉత్తర్వులను వెంటనే రద్దు చేయాలని కోర్టుకు విజ్ఞప్తి చేశారు.

దీనికి ప్రతిగా పబ్లిక్ ప్రాసిక్యూటర్ వాదనలు వినిపిస్తూ.. కేసు దర్యాప్తు సమగ్రంగా ముందుకు సాగాలంటే పోటెన్సీ పరీక్ష అత్యంత కీలకమని న్యాయస్థానానికి తెలిపారు. కేసులోని కీలక అంశాలను నిరూపించేందుకు మరియు దర్యాప్తు ప్రక్రియలో భాగంగానే ఈ పరీక్ష అవసరమని స్పష్టం చేస్తూ, కింది కోర్టు ఇచ్చిన ఆదేశాలు సబబేనని సమర్థించారు. ఇరుపక్షాల వాదనలను నమోదు చేసుకున్న హైకోర్టు.. ఈ పిటిషన్‌పై తన నిర్ణయాన్ని మంగళవారానికి వాయిదా వేసింది. ఈ కేసులో ట్రైనీ ఐపీఎస్ ఉదయ్ కృష్ణా రెడ్డికి పోటెన్సీ పరీక్ష నిర్వహించవచ్చా లేదా అనే దానిపై హైకోర్టు వెల్లడించనున్న నిర్ణయం ఇప్పుడు తీవ్ర ఉత్కంఠను రేపుతోంది.