తెలంగాణ రాజకీయాల్లో ముఖ్యమంత్రి ఎనుముల రేవంత్ రెడ్డి, ప్రధానమంత్రి నరేంద్ర మోదీ మధ్య ఉన్న సత్సంబంధాలపై బీజేపీ ఎంపీ ధర్మపురి అరవింద్ చేసిన వ్యాఖ్యలు కాంగ్రెస్, బీజేపీల మధ్య తీవ్ర మాటల దాడికి దారితీశాయి.
పశ్చిమ బెంగాల్ రాజకీయాల్లో నాడు మమతా బెనర్జీకి అత్యంత సన్నిహితంగా ఉండి, ఆ తర్వాత బీజేపీలోకి చేరిన సువేందు అధికారితో సీఎం రేవంత్ రెడ్డిని అరవింద్ పోల్చడం కాంగ్రెస్ వర్గాల్లో తీవ్ర కలకలం రేపింది. ప్రధాని మోదీకి, రేవంత్ రెడ్డికి మధ్య సువేందు అధికారి తరహా బంధం ఏమైనా ఉందేమోనంటూ ఆయన అనుమానాలు వ్యక్తం చేశారు. అంతేకాకుండా, రాబోయే రోజుల్లో కాంగ్రెస్ పార్టీ రాష్ట్రంలో తుడిచిపెట్టుకుపోవడం ఖాయమంటూ ఆయన చేసిన జోస్యం.. రేవంత్ రెడ్డి ఇమేజ్ను డ్యామేజ్ చేసేలా ఉందనే చర్చ రాజకీయ వర్గాల్లో నడుస్తోంది.
ధర్మపురి అరవింద్ చేసిన ఈ వ్యూహాత్మక వ్యాఖ్యలపై కాంగ్రెస్ శ్రేణులు, ముఖ్యంగా సీఎం రేవంత్ రెడ్డి సన్నిహిత నేతలు తీవ్రస్థాయిలో విరుచుకుపడ్డారు. కాంగ్రెస్ సీనియర్ నేత అద్దంకి దయాకర్తో పాటు పలువురు అధికార ప్రతినిధులు అరవింద్ను ఒక కిరాయి నాయకుడు గా అభివర్ణిస్తూ ఘాటుగా కౌంటర్ ఇచ్చారు. తెలంగాణ రాజకీయాల్లో డీ.శ్రీనివాస్ కుమారుడు కాకపోతే, అరవింద్కు అసలు రాజకీయ జీవితమే ఉండేది కాదని వారు ఎద్దేవా చేశారు. తండ్రి పేరు చెప్పుకుని రాజకీయాల్లోకి వచ్చిన అరవింద్కు సీఎం రేవంత్ రెడ్డి నిబద్ధతను శంకించే నైతిక హక్కు లేదని మండిపడ్డారు.
రాష్ట్ర అభివృద్ధిని కాంక్షించే ముఖ్యమంత్రి రేవంత్ రెడ్డి.. ప్రధాని నరేంద్ర మోదీని కలిశారే తప్ప, అందులో ఎలాంటి రాజకీయ లబ్ధి లేదని కాంగ్రెస్ నేతలు స్పష్టం చేశారు. కేంద్రం నుంచి రాష్ట్రానికి రావాల్సిన నిధులు, ప్రాజెక్టుల సాధన కోసమే సీఎం నిరంతరం ఢిల్లీ పర్యటనలు చేస్తున్నారని, ఒక ముఖ్యమంత్రిగా ప్రధానిని కలవడం రాజ్యాంగబద్ధమైన ప్రక్రియ అని గుర్తు చేశారు. కిరాయి నాయకుడిగా వ్యవహరిస్తూ, కేవలం పబ్లిసిటీ కోసం ఇరు పార్టీల మధ్య అనుమానాలు రేకెత్తించేలా మాట్లాడుతున్న అరవింద్ను బీజేపీ అధిష్టానం కూడా ఎప్పటికీ గుర్తించదని, ఆయన సొంత పార్టీలోనే ఒంటరి అవుతున్నారని అంటున్నారు.
ప్రస్తుతం ఈ సువేందు అధికారి పోలిక వ్యవహారం అటు రాజకీయ వేదికలపైనే కాకుండా, సోషల్ మీడియాలోనూ హాట్ టాపిక్గా మారింది. రేవంత్ రెడ్డి కాంగ్రెస్ అధిష్టానానికి నమ్మకస్తుడిగా ఉంటూనే, మరోవైపు కేంద్రంతో సత్సంబంధాలు కొనసాగించడాన్ని బీజేపీ నేతలు తమకు అనుకూలంగా మార్చుకునే ప్రయత్నం చేస్తుండగా.. కాంగ్రెస్ మాత్రం ఈ మైండ్ గేమ్స్ను గట్టిగానే తిప్పికొడుతోంది.